വികസിത് ഭാരത് 2047: ഇന്ത്യയ്ക്ക് പ്രതിവർഷം 9-10% വളർച്ച അനിവാര്യമെന്ന് നബാർഡ് ചെയർമാൻ ഡോ. ഷാജി കൃഷ്ണൻ

കൊച്ചി: 2047-ഓടെ 'വികസിത് ഭാരത്' എന്ന ലക്ഷ്യം കൈവരിക്കുന്നതിന് അടുത്ത 25 വർഷത്തേക്ക് ഇന്ത്യ പ്രതിവർഷം 9% മുതൽ 10% വരെ സുസ്ഥിര സാമ്പത്തിക വളർച്ച കൈവരിക്കേണ്ടതുണ്ടെന്ന് നാഷണൽ ബാങ്ക് ഫോർ അഗ്രികൾച്ചർ ആൻഡ് റൂറൽ ഡെവലപ്‌മെൻ്റ് (നബാർഡ്) ചെയർമാൻ ഡോ. ഷാജി കൃഷ്ണൻ പറഞ്ഞു. ഇതിനായി രാജ്യത്തെ ആഭ്യന്തര നിക്ഷേപ അനുപാതം വർദ്ധിപ്പിക്കുകയും രാജ്യത്തെ ഏകദേശം 45 ലക്ഷം കോടി രൂപയുടെ അസംഘടിത പണമിടപാട് സമ്പദ്‌വ്യവസ്ഥയെ ഔപചാരിക സാമ്പത്തിക മേഖലയുടെ ഭാഗമാക്കുകയും ചെയ്യേണ്ടത് അടിയന്തിര ആവശ്യമാണെന്ന് അദ്ദേഹം ചൂണ്ടിക്കാട്ടി.

കോൺഫെഡറേഷൻ ഓഫ് ഇന്ത്യൻ ഇൻഡസ്ട്രി (CII) കൊച്ചിയിൽ സംഘടിപ്പിച്ച 'കേരള ഫിനാൻഷ്യൽ സർവീസസ് സമ്മിറ്റ്' ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ചൈനയുടെയും ജപ്പാന്റെയും അനുഭവങ്ങൾ ഉയർന്ന നിക്ഷേപ നിരക്കാണ് ദ്രുതഗതിയിലുള്ള വളർച്ചയ്ക്ക് വഴിയൊരുക്കിയതെന്ന് വ്യക്തമാക്കുന്നുണ്ട്.

"നവീകരണവും സാമ്പത്തിക പ്രതിരോധശേഷിയും പരസ്പരവിരുദ്ധമായ മുൻഗണനകളല്ല. പ്രതിരോധശേഷിയില്ലാത്ത നവീകരണം സ്ഥാപനങ്ങളെ ദുർബലമാക്കും, എന്നാൽ നവീകരണമില്ലാത്ത പ്രതിരോധശേഷി സ്ഥാപനങ്ങളെ കാലഹരണപ്പെട്ടതാക്കും," ഡോ. ഷാജി കൃഷ്ണൻ ഓർമ്മിപ്പിച്ചു. ജനധൻ യോജന പോലുള്ള പദ്ധതികളിലൂടെ എല്ലാവർക്കും ബാങ്കിംഗ് സേവനങ്ങൾ ലഭ്യമാക്കാൻ സാധിച്ചിട്ടുണ്ടെങ്കിലും, ഈ പ്രാപ്തിയെ ഉൽപ്പാദനക്ഷമമായ സാമ്പത്തിക പ്രവർത്തനങ്ങളാക്കി മാറ്റുകയാണ് അടുത്ത വെല്ലുവിളി. ഈട് (collateral) അധിഷ്ഠിത വായ്പാ രീതികളിൽ നിന്ന് മാറി, ക്യാഷ്-ഫ്ലോ, വാല്യൂ-ചെയിൻ അധിഷ്ഠിത വായ്പാ രീതികളിലേക്ക് ബാങ്കുകൾ മാറണമെന്നും കാലാവസ്ഥാ വ്യതിയാന സാധ്യതകളെ ക്രെഡിറ്റ് റിസ്കിന്റെ ഭാഗമായി പരിഗണിക്കണമെന്നും അദ്ദേഹം നിർദേശിച്ചു.

കേരളത്തിന്റെ സാമ്പത്തിക ശേഷിയെക്കുറിച്ച് സംസാരിക്കവേ, വൻകിട നിർമ്മാണ മേഖലയിൽ പിന്നിലാണെങ്കിലും ഉയർന്ന മൂല്യമുള്ള വിജ്ഞാന സംരംഭങ്ങൾ, ടൂറിസം, സുഗന്ധവ്യഞ്ജനങ്ങൾ, ആരോഗ്യ സംരക്ഷണം, കുടുംബശ്രീ കൂട്ടായ്മകൾ എന്നിവ വഴി വളർച്ച കൈവരിക്കാനുള്ള ലോകോത്തര കഴിവ് കേരളത്തിനുണ്ടെന്ന് അദ്ദേഹം കൂട്ടിച്ചേർത്തു.

സി.ഐ.ഐ സതേൺ റീജിയൻ മുൻ ചെയർമാനും ഗ്രൂപ്പ് മീരാൻ ചെയർമാനുമായ നവാസ് മീരാൻ ചടങ്ങിൽ മുഖ്യപ്രഭാഷണം നടത്തി. കേരളത്തിലെ ബാങ്കിംഗ് മേഖലയുടെ ശക്തമായ സാമ്പത്തിക സ്ഥിതി അദ്ദേഹം കണക്കുകൾ സഹിതം വ്യക്തമാക്കി. കേരളത്തിലെ വാണിജ്യ ബാങ്കുകളിൽ നിലവിൽ 10.6 ലക്ഷം കോടി രൂപയുടെ നിക്ഷേപവും 7.74 ലക്ഷം കോടി രൂപയുടെ വായ്പകളുമുണ്ടെന്ന് അദ്ദേഹം പറഞ്ഞു. 72.88% എന്ന മികച്ച ക്രെഡിറ്റ്-ഡെപ്പോസിറ്റ് അനുപാതമാണ് സംസ്ഥാനത്തുള്ളത്. പ്രവാസി നിക്ഷേപം 3.24 ലക്ഷം കോടി രൂപയും എം.എസ്.എം.ഇ വായ്പകൾ 1.05 ലക്ഷം കോടി രൂപയും കടന്ന സാഹചര്യത്തിൽ, പുതിയ സംരംഭങ്ങൾ ആരംഭിക്കുന്നതിന് മികച്ച ലിക്വിഡിറ്റിയാണ് കേരളം വാഗ്ദാനം ചെയ്യുന്നതെന്ന് അദ്ദേഹം വ്യക്തമാക്കി.

ബാങ്കുകൾ, എൻ.ബി.എഫ്.സികൾ, ഫിൻടെക്കുകൾ എന്നിവ പരസ്പരം മത്സരിക്കുന്ന പഴയ രീതി കാലഹരണപ്പെട്ടുവെന്നും ഡിജിറ്റൽ രൂപയും ആർട്ടിഫിഷ്യൽ ഇന്റലിജൻസും അടങ്ങുന്ന പുതിയ സാങ്കേതികവിദ്യകളിലേക്ക് മേഖല മാറുകയാണെന്നും അദ്ദേഹം പറഞ്ഞു. "അക്കൗണ്ടുകൾ തുറക്കുന്നതിലല്ല, മറിച്ച് മനുഷ്യരുടെ ജീവിതനിലവാരം ഉയർത്തുന്നതിലാണ് സാമ്പത്തിക ഉൾക്കൊള്ളലിന്റെ വിജയം," നവാസ് മീരാൻ പറഞ്ഞു.

ധനകാര്യ മേഖല ചരിത്രത്തിലെ ഏറ്റവും വലിയ മാറ്റങ്ങളിലൂടെയാണ് കടന്നുപോകുന്നതെന്ന് സി.ഐ.ഐ ബാങ്കിംഗ് & എൻ.ബി.എഫ്.സി പാനൽ കൺവീനർ ശാലിനി വാരിയർ പറഞ്ഞു. ഉദ്ദേശ്യപൂർണ്ണമായ നവീകരണം, സ്ഥാപനപരമായ പ്രതിരോധശേഷി, ബാങ്കുകളും ഫിൻടെക്കുകളും തമ്മിലുള്ള പങ്കാളിത്തം എന്നിവയാണ് വരുംദിവസങ്ങളിൽ ഈ മേഖലയെ നയിക്കുക. എം.എസ്.എം.ഇ, ടൂറിസം, ഹെൽത്ത്‌കെയർ, എജ്യുക്കേഷൻ വായ്പകൾക്കൊപ്പം ഗ്ലോബൽ കേപ്പബിലിറ്റി സെന്ററുകൾ സ്ഥാപിക്കുന്നതിലൂടെ കേരളത്തെ അന്താരാഷ്ട്ര ധനകാര്യ ഹബ്ബാക്കി മാറ്റാൻ കഴിയുമെന്ന് അവർ കൂട്ടിച്ചേർത്തു.

സി.ഐ.ഐ കേരള വൈസ് ചെയർമാൻ സന്തോഷ് കുമാർ സ്വാഗതം ആശംസിച്ചു. കേരളത്തിലെ ഉയർന്ന സാമ്പത്തിക സാക്ഷരതയും ശക്തമായ സമ്പാദ്യ ശീലവും ഡിജിറ്റൽ ബാങ്കിംഗിനും ഗ്രീൻ-ടെക് സാമ്പത്തിക സഹായങ്ങൾക്കും അനുയോജ്യമായ അന്തരീക്ഷമൊരുക്കുന്നുവെന്ന് അദ്ദേഹം പറഞ്ഞു.

ഫെഡറൽ ബാങ്ക് എം.ഡിയും സി.ഇ.ഒയുമായ കെ.വി.എസ് മണിയൻ, സൗത്ത് ഇന്ത്യൻ ബാങ്ക് എം.ഡിയും സി.ഇ.ഒയുമായ മഹേഷ് മുരളിധർ പൈ, ജിയോജിത് ഫിനാൻഷ്യൽ സർവീസസ് എം.ഡി ജോൺസ് ജോർജ്ജ്, ധനലക്ഷ്മി ബാങ്ക് എം.ഡിയും സി.ഇ.ഒയുമായ അജിത് കുമാർ, ഇസാഫ് സ്മോൾ ഫിനാൻസ് ബാങ്ക് എം.ഡിയും സി.ഇ.ഒയുമായ ഡോ. പോൾ തോമസ്, സുസന്ന മുത്തൂറ്റ് തുടങ്ങിയ ധനകാര്യ മേഖലയിലെ പ്രമുഖർ ഉച്ചകോടിയിൽ സംസാരിച്ചു.

ഫെഡറൽ ബാങ്ക്, എ.യു സ്മോൾ ഫിനാൻസ് ബാങ്ക്, കെ.പി.എം.ജി , സൗത്ത് ഇന്ത്യൻ ബാങ്ക്, മുത്തൂറ്റ് ഫിൻ കോർപ്പ്, ഇസാഫ് സ്മോൾ ഫിനാൻസ് ബാങ്ക്, കെ.എൽ.എം അക്സിവ ഫിൻവെസ്റ്റ്, ഐ.സി.എ.ഐ, ഐ.സി.എം.എ.ഐ എന്നിവരുടെ പങ്കാളിത്തത്തോടെയാണ് ഉച്ചകോടി സംഘടിപ്പിച്ചത്.

Content Highlights: India needs 9% to 10% annual economic growth to achieve 'Viksit Bharat' by 2047., Integrating the informal economy into the formal sector is vital for domestic investment., Kerala possesses strong credit-deposit ratios and high potential in knowledge enterprises and tourism., Banks need to shift towards cash-flow and value-chain based lending models.