ടാറ്റ ഗ്രൂപ്പിന്റെ ആർ.എൻ.ടി അസോസിയേറ്റ്സിൽനിന്ന് മെഹ്ലി മിസ്ത്രി രാജിവെച്ചു
രത്തൻ ടാറ്റയുടെ ഫാമിലി ഇൻവെസ്റ്റ്മെന്റ് ഓഫീസായ ആർ.എൻ.ടി അസോസിയേറ്റ്സിന്റെ ഡയറക്ടർ സ്ഥാനത്തുനിന്നും മെഹ്ലി മിസ്ത്രി രാജിവെച്ചു. ടാറ്റാ ഗ്രൂപ്പുമായും അനുബന്ധ സ്ഥാപനങ്ങളുമായും മെഹ്ലി മിസ്ത്രിക്കുണ്ടായിരുന്ന ദീർഘകാല ബന്ധം ഇതോടെ അവസാനിച്ചേക്കും. 2025 നവംബറിൽ ടാറ്റാ ട്രസ്റ്റിൽ നിന്ന് പുറത്താക്കപ്പെട്ടതിനെത്തുടർന്ന് ആരംഭിച്ച അകൽച്ചയുടെ തുടർച്ചയാണിത്. ടാറ്റ ട്രസ്റ്റിൽ നിന്ന് പുറത്താക്കിയതിനെതിരെ നിയമ പോരാട്ടം തുടരുന്നുണ്ടെങ്കിലും അനുദിന പ്രവർത്തനങ്ങളിൽനിന്നുള്ള വിട്ടുനിൽക്കുന്നതിന്റെ സൂചനയാണ് രാജി.
രാജിയുടെ കാരണങ്ങൾ
രത്തൻ ടാറ്റയുടെ വിശ്വസ്തനായിരുന്ന മെഹ്ലി മിസ്ത്രി മൂന്ന് വർഷത്തിലേറെയായി ആർ.എൻ.ടി അസോസിയേറ്റ്സിന്റെ ബോർഡ് അംഗമായിരുന്നു.
- വ്യക്തിപരമായ തിരക്കുകൾ കാരണമാണ് സ്ഥാനമൊഴിയുന്നത് എന്നാണ് മിസ്ത്രി കത്തിൽ സൂചിപ്പിച്ചിരിക്കുന്നത്.
- 2023 മാർച്ചിലാണ് അദ്ദേഹം ആർ.എൻ.ടി അസോസിയേറ്റ്സിന്റെ ബോർഡിൽ ചേർന്നത്.
നിലവിലെ ബോർഡ് അംഗങ്ങൾ:
- ഷെറിൻ ജെജീഭോയ് (രത്തൻ ടാറ്റയുടെ സഹോദരി)
- ഡീന്ന ജെജീഭോയ് (രത്തൻ ടാറ്റയുടെ സഹോദരി)
- ജംഷീദ് പോഞ്ച (ടാറ്റ സൺസിലെ സീനിയർ എക്സിക്യൂട്ടീവ്)
- സിദ്ധാർത്ഥ് ശർമ്മ (ടാറ്റ സൺസ് ജനറൽ കൗൺസൽ)
ആർ.എൻ.ടി അസോസിയേറ്റ്സ്
2009 മാർച്ചിൽ സ്ഥാപിതമായ ആർ.എൻ.ടി, രത്തൻ ടാറ്റയുടെ സ്റ്റാർട്ടപ്പ് നിക്ഷേപങ്ങൾക്കും കുടുംബ ആവശ്യങ്ങൾക്കുമായുള്ള പ്രധാന കമ്പനിയായി പ്രവർത്തിച്ചുവരുന്നു.
- പേടിഎം (Paytm), ഓല (Ola), ഓൺലൈൻ ജ്വല്ലറി ഗ്രൂപ്പായ ബ്ലൂസ്റ്റോൺ (BlueStone) തുടങ്ങി ഇരുപതിലേറെ സ്റ്റാർട്ടപ്പുകളിൽ നിക്ഷേപമുണ്ട്.
- ലാഭവീതം , കൺസൾട്ടൻസി സേവനം എന്നിവയിലൂടെയാണ് കമ്പനി വരുമാനം കണ്ടെത്തുന്നത്. 2023 മാർച്ചിൽ അവസാനിച്ച സാമ്പത്തിക വർഷത്തിൽ കമ്പനിയുടെ വരുമാനം 36 കോടി രൂപയായിരുന്നു. ഇതിൽ പകുതിയോളം ലാഭവീതത്തിൽ നിന്നുള്ളതായിരുന്നു.
- തുടക്കത്തിൽ രത്തൻ ടാറ്റയും ആർ. കെ. കൃഷ്ണകുമാറുമായിരുന്നു പ്രധാന ഓഹരിയുടമകൾ. എന്നാൽ രത്തൻ ടാറ്റയുടെ മരണത്തിന് മുൻപ് (2022ൽ) അദ്ദേഹം ഇതിന്റെ ഓഹരികൾ 'രത്തൻ ടാറ്റ എൻഡോവ്മെന്റ് ഫൗണ്ടേഷൻ' (RTEF), 'രത്തൻ ടാറ്റ എൻഡോവ്മെന്റ് ട്രസ്റ്റ്' (RTET) എന്നിവയിലേക്ക് മാറ്റി.
ടാറ്റാ സൺസിലെ ഉടമസ്ഥാവകാശ ഘടന
ടാറ്റാ ഗ്രൂപ്പിന്റെ ഹോൾഡിംഗ് കമ്പനിയായ ടാറ്റാ സൺസിലെ ഉടമസ്ഥാവകാശം വിവിധ ട്രസ്റ്റുകൾക്കും കമ്പനികൾക്കുമായി വിഭജിക്കപ്പെട്ടിരിക്കുന്നു. അതിന്റെ ഏകദേശ രൂപം താഴെ നൽകുന്നു:
ഓഹരിയുടമകൾ | ഓഹരി പങ്കാളിത്തം (%) |
|---|---|
സർ ദൊറാബ്ജി ടാറ്റാ ട്രസ്റ്റ് | 27.98% |
സർ രത്തൻ ടാറ്റാ ട്രസ്റ്റ് | 23.56% |
മറ്റ് ചെറിയ ട്രസ്റ്റുകൾ | 14.4% |
ആകെ ട്രസ്റ്റുകൾ (Philanthropic Entities) | 65.9% |
ഷാപ്പൂർജി പല്ലോൺജി ഗ്രൂപ്പ് | 18.38% |
ടാറ്റാ ഗ്രൂപ്പ് കമ്പനികൾ (ഒൻപത് എണ്ണം) | 12.86% |
വ്യക്തികൾ (ഏഴ് പേർ) | 2.87% |
ടാറ്റാ ഗ്രൂപ്പിന്റെ ആഭ്യന്തര അധികാരശ്രേണിയിൽ വന്ന മാറ്റങ്ങളെ തുടർന്നാണ് മെഹ്ലി മിസ്ത്രിയുടെ നിന്നുള്ള രാജി. രത്തൻ ടാറ്റയുടെ അടുത്ത വിശ്വസ്തനായിരുന്ന മിസ്ത്രി, ഗ്രൂപ്പിന്റെ ഭാഗമായ എല്ലാ ഔദ്യോഗിക പദവികളിൽ നിന്നും പടിപടിയായി ഒഴിവാകുകയാണ്. നിലവിൽ ടാറ്റാ എഡ്യൂക്കേഷൻ ആൻഡ് ഡെവലപ്മെന്റ് ട്രസ്റ്റിൽ അംഗമായി തുടരുന്നുണ്ടെങ്കിലും ഗ്രൂപ്പുമായുള്ള ബന്ധം പൂർണമായും ഒഴിവായതായാണ് വിലയിരുത്തൽ.
Content Highlights: Mehli Mistry resigns from RNT Associates board citing personal commitments., Follows his 2025 removal from Tata Trusts., RNT Associates continues to manage investments in firms like Paytm and Ola., Ownership of RNT transitioned to Ratan Tata Endowment Foundation and Trust.