ഷാര്ജ അന്താരാഷ്ട്ര പുസ്തകമേള: കാവ്യസന്ധ്യയില് റഫീഖ് അഹമ്മദും പി പി രാമചന്ദ്രനും
ഷാര്ജ: ഷാര്ജ അന്താരാഷ്ട്ര പുസ്തക മേളയില് കവിതാസ്വാദകര്ക്കായി ഒരുക്കുന്ന കാവ്യസന്ധ്യയില് ഇത്തവണ റഫീഖ് അഹമ്മദും പി പി രാമചന്ദ്രനും ഒന്നിക്കും. ഇരുവരും കവിതകള് ചൊല്ലി സദസ്യരുമായി സംവദിക്കും. നവംബര് 16 ശനിയാഴ്ച വൈകീട്ട് 6.30 മുതല് 8 മണി വരെ കോണ്ഫറന്സ് ഹാളിലാണ് കാവ്യസന്ധ്യ നടക്കുക.
നവംബര് 15 ന് രാത്രി 8 മുതല് 9.30 വരെ കോണ്ഫറന്സ് ഹാളില് നടക്കുന്ന പരിപാടിയില് യുവഎഴുത്തുകാരന് അഖില് പി ധര്മജന് പങ്കെടുക്കും. 'പുസ്തകത്തിനപ്പുറമുള്ള കഥകള് - റാം C/O ആനന്ദിയുടെ കഥാകാരന് അഖില് പി ധര്മജനുമൊത്ത് ഒരു സായാഹ്നം' എന്ന പരിപാടിയില് തന്റെ കൃതികള് സ്വയം പ്രസിദ്ധീകരിച്ചിരുന്ന കാലത്ത് നിന്ന് ആഘോഷിക്കപ്പെടുന്ന എഴുത്തുകാരനിലേക്കുള്ള മാറ്റത്തെക്കുറിച്ച് അഖില് സംവദിക്കും.
നവംബര് 10 ഞായറാഴ്ച അവതാരകയും നടിയും എഴുത്തുകാരിയുമായ അശ്വതി ശ്രീകാന്ത് ' റേഡിയോ വീചികളില് നിന്ന് ലിഖിതാക്ഷരത്തിലേക്ക്-അശ്വതി ശ്രീകാന്തുമൊത്ത് ഒരു വൈകുന്നേരം' എന്ന പരിപാടിയില് പങ്കെടുക്കും. വൈകീട്ട് 6 മുതല് 7 വരെ കോണ്ഫറന്സ് ഹാളിലാണ് പരിപാടി.
നവംബര് 16 ന് മലയാളത്തിലെ പ്രമുഖ കഥാകൃത്തും നോവലിസ്റ്റുമായ വിനോയ് തോമസ് വായനക്കാരുമായി സംവദിക്കാനെത്തും. രാത്രി 8.30 മുതല് 9.30 വരെ ബുക്ക് ഫോറം ഒന്നിലാണ് പരിപാടി.
Content Highlights: sharjah international book fair 2024 rafeek ahammed and pp ramachandran will participate