ഭജനമണ്ഡലങ്ങൾ, മതബോധം, കേരളസമൂഹം

നന്ദഗോവിന്ദം എന്ന വൃന്ദഗാനസംഘം കേരളത്തിൽ സമീപകാലത്ത് ജനപ്രിയസംഗീതത്തിൽ ഒരുതരം തരംഗമായി മാറി. ആ തരംഗം ചെറുതും വലുതുമായ നിരവധി ഭജനസംഘങ്ങളെ കേരളത്തിലങ്ങോളമിങ്ങോളം പുതുതായി ഉണ്ടാക്കി. കേരളത്തിൽ സർവ്വമതവിഭാഗങ്ങൾക്കും ഭജനസംഘങ്ങൾ പണ്ടേ ഉണ്ടായിരുന്നുവെങ്കിലും നന്ദഗോവിന്ദം അഭൂതപൂർവമായ രീതിയിൽ ജനക്കൂട്ടത്തെ ആകർഷിച്ചു. ഇത്ര വലിയ ആൾക്കൂട്ടം ഭജന കേൾക്കാനെത്തുന്ന രീതി കേരളത്തിന് പരിചയമുള്ളതല്ല. ഭക്തി മലയാളിക്ക് ചിരപരിചിതമെങ്കിലും, വ്യത്യസ്ത ദേവസങ്കല്പങ്ങൾ ചിരന്തനമെങ്കിലും ഈ ആൾക്കൂട്ട ഭക്തിസംഗീതലഹരി പുതുതാണ്. അതിന് പ്രധാനമായും രണ്ട് കാരണങ്ങളുണ്ട്. ഒന്ന് ശബ്ദസാങ്കേതികതയുടെ ആധുനികമേന്മകൾ സ്വംശീകരിക്കുന്നതിൽ നന്ദഗോവിന്ദം സവിശേഷ ശ്രദ്ധ പതിപ്പിച്ചു. രണ്ടാമത്തെ കാരണം കേരളസമൂഹത്തിൽ രൂഢമൂലമായ ദൈവഭക്തി മറ്റുജീവിതസൗകര്യങ്ങളിലുണ്ടായ ഉയർച്ചയോടൊപ്പം ആധുനിക ശബ്ദതരംഗങ്ങൾ ഉയർത്തുന്ന ഇത്തരം ഒരു live ഭക്തിഗാനസാന്ദ്രതയ്ക്ക് തയ്യാറായിനിൽക്കുകയായിരുന്നു എന്നതുമാണ്. പണ്ടേ ഉണ്ടായിരുന്ന ഭക്തി ഇപ്പോൾ വ്യക്തിപരമെന്നതിൽ നിന്നുമാറി സാമൂഹ്യപ്രകാശനമായി അങ്ങനെ മാറുന്നു, സംഘടിത മതബോധത്തിനുള്ള networking നുള്ള മണ്ഡലമായി വ്യക്തിവിശ്വാസത്തിനെ കൂട്ടംകൂടലിലേക്ക് മാറ്റുന്നു.

ഇതൊരു പുതിയ കാര്യമാണോ? യേശുദാസിന്റെ ഗാനമേളകൾ കേൾക്കാൻ പതിനായിരങ്ങൾ പണ്ട് തടിച്ചുകൂടിയിരുന്നു. ഇക്കാലത്ത് വേടൻ എന്ന ഗായകൻ പാടാൻ വരുമ്പോൾ ചെറുപ്പക്കാർ ആയിരക്കണക്കിന് ഒത്തുകൂടുന്നതും ആ റാപ് അന്തരീക്ഷത്തിൽ ആടിയുലയുന്നതും കാണുന്നുണ്ട്. എന്നാൽ അത്തരം ഗാനമേളകളിൽ നിന്നും നന്ദഗോവിന്ദമുളവാക്കുന്ന ആൾക്കൂട്ടയുന്മാദത്തിനുള്ള വ്യത്യസ്തത വ്യക്തിപരമായി ഇന്നും തുടരുന്ന മലയാളി ഹിന്ദുവിന്റെ ഈശ്വരഭക്തിയെ ഒരു സാമൂഹ്യാവിഷ്‌കാരമായി, പ്രകാശനമായി അതുമാറ്റുന്നുണ്ട് എന്നതാണ്. 'പറയരുതേ, രാധ അറിയരുതേ ഗുരുവായൂരപ്പാ ഈ രഹസ്യം' എന്ന വ്യക്ത്യധിഷ്ഠിതമായ ഒരു ഗാനാഭ്യർത്ഥന കേരളത്തിൽ ഒരാൾക്കൂട്ടത്തിന്റെ ഭക്തിപാരവശ്യത്തിന്റെ പരസ്യപ്രകാശനമാകുകയാണ്. അതിലെന്താണ് തെറ്റ്? അത്തരമൊരു ഇടം ഇപ്പോഴുണ്ടയെന്നേയുള്ളൂ, ഈശ്വരഭക്തി വ്യക്തിപരമായ ഒരു കാര്യമായി തുടരുമ്പോഴും ഭക്തനും ഭക്തയും ഒരു സംഘസത്തയുടെ അഭിമാനവും ആഹ്‌ളാദവും പങ്കിടുന്ന സാമൂഹ്യാന്തരീക്ഷത്തിലേക്ക് മാറിക്കഴിഞ്ഞിരിക്കുന്നു. ആ അന്തരീക്ഷത്തിന്റെ ദൃശ്യ-ശബ്ദ ഏകോപനമാണ് നന്ദഗോവിന്ദം സമർത്ഥമായി നിർവഹിക്കുന്നത്.

Content Highlights: Transition of personal devotion to public, collective expression., Role of modern sound technology in shaping religious gatherings., Analysis of 'evangelical-like' characteristics in modern Hindu devotional music., The duality of coexistence vs. exclusion in religious crowds., Contextualizing current trends against historical Kerala social consciousness.