യുഎസിൽ 73 കാരിയെ കൊലപ്പെടുത്തി പിറ്റ്ബുളുകൾ; നായകൾ കൊക്കെയ്‌ൻ ലഹരിയിലായിരുന്നെന്ന് കണ്ടെത്തൽ
അമേരിക്കയിൽ പിറ്റ്ബുൾ നായകളുടെ ആക്രമണത്തിൽ 73-കാരി കൊല്ലപ്പെട്ട സംഭവത്തിൽ പുതിയ വെളിപ്പെടുത്തൽ. പരിശോധനയിൽ, ആക്രമണം നടത്തിയ നായകളുടെ ശരീരത്തിൽ കൊക്കെയ്ന്‍റെ സാന്നിധ്യം കണ്ടെത്തി. 2024 ഒക്ടോബറിലാണ് 73-കാരിയായ ജോവാൻ എച്ചല്‍ബാര്‍ഗ് അയല്‍വാസികൾ വളർത്തുന്ന പിറ്റ്ബുള്‍ നായകളുടെ ആക്രമണത്തില്‍ ദാരുണമായി കൊല്ലപ്പെട്ടത്.
പൂന്തോട്ടത്തിലായിരുന്ന ജോവാനെ പിറ്റ്ബുള്‍ നായകള്‍ ആക്രമിക്കുകയായിരുന്നു. ഡെമന്‍ഷ്യ ബാധിച്ച് വീല്‍ച്ചെയറിലായിരുന്ന ജോവാന്‍റെ ഭര്‍ത്താവിന് അവരെ രക്ഷിക്കാനായില്ല. സംഭവം അറിഞ്ഞ് സ്ഥലത്തെത്തിയ പോലീസ് ഇരുനായകളെയും വെടിവെച്ചുവീഴ്ത്തി. പിന്നീട് നടത്തിയ ടോക്‌സിക്കോളജി പരിശോധനകളിലാണ് നായകളുടെ ശരീരത്തില്‍ കൊക്കെയന്റെ അംശം കണ്ടെത്തിയത്.
പിറ്റ്ബുള്‍ നായകളുടെ ആക്രമണത്തില്‍ 73-കാരി മരിച്ച സംഭവത്തില്‍ ഇക്കഴിഞ്ഞ ഫെബ്രുവരിയിൽ അയൽക്കാരായ ആദത്തിനും അമ്മ സൂസനും എതിരേ മനപൂര്‍വ്വമല്ലാത്ത നരഹത്യയ്ക്ക് കേസെടുത്തിരുന്നു. 25,000 അമേരിക്കന്‍ ഡോളര്‍ നഷ്ടപരിഹാരവും കേസ് നടത്താനായി ചെലവഴിക്കുന്ന തുകയും ആവശ്യപ്പെട്ടാണ് ഇരുവര്‍ക്കും എതിരേ 73-കാരിയുടെ കുടുംബം കോടതിയില്‍ കേസ് ഫയല്‍ ചെയ്തത്.
മുന്‍പും ഇത്തരം അക്രമങ്ങൾ നടത്തിയിട്ടുള്ള ഈ പിറ്റ്ബുള്‍ നായകള്‍ക്ക് എതിരേ യാതൊരുവിധ നടപടിയും സ്വീകരിച്ചിരുന്നില്ലെന്ന് കോടതിയില്‍ ഫയല്‍ ചെയ്ത കേസില്‍ 73-കാരിയുടെ കുടുംബം പറയുന്നു.
Content Highlights: ohio grandmother was killed by pitbulls high on cocaine