കാബ് ഡ്രൈവർക്ക് ഉറങ്ങാനായി സ്റ്റിയറിങ് ഏറ്റെടുത്ത് യാത്രികൻ, വൈറൽ വീഡിയോ

രാത്രി യാത്രക്കിടെ കാബ് ഡ്രൈവര്‍ ഉറക്കച്ചടവോടെ വണ്ടിയോടിച്ചാല്‍ നിങ്ങള്‍ എന്തു ചെയ്യും? അര്‍ദ്ധരാത്രി മൂന്ന് മണിക്ക് ബെം​ഗളൂരു വിമാനത്താവളത്തില്‍ നിന്നുള്ള യാത്രക്കായി വിളിച്ച കാബ് ഡ്രൈവര്‍ ഉറക്കത്തിന്റെ വക്കിലെത്തിയപ്പോള്‍ സംഭവിച്ച അപ്രതീക്ഷിത അനുഭവം പങ്കുവെച്ചിരിക്കുകയാണ് ബെം​ഗളൂരു സ്വദേശിയായ മിലിൻ  ചാന്ദ്വാനി. 

ഉറക്കച്ചവടോടെ വണ്ടിയോടിച്ചിരുന്ന കാബ് ഡ്രൈവര്‍ ഉറക്കം മാറാനായി ചായ കുടിക്കാനും സിഗരറ്റ് വലിക്കാനും ഇടക്ക് നിര്‍ത്തിയെങ്കിലും ഉറക്കത്തിന് ശമനമുണ്ടായില്ല. താന്‍ വണ്ടിയോടിക്കണോ എന്ന മിലിന്റെ ചോദ്യത്തിന് താക്കോൽ കൈമാറാൻ കാബ് ഡ്രൈവറിന് അധികം സമയം വേണ്ടിവന്നില്ല. 

സീറ്റ് പിന്നിലേക്കാക്കി ഗൂഗിള്‍ മാപ്പ് നോക്കി ലക്ഷ്യസ്ഥാനത്തേക്കെത്താനുള്ള നിര്‍ദ്ദേശവും നല്‍കി ഇയാള്‍ ഉറങ്ങിയെന്നും യാത്രക്കാരൻ ഇന്‍സ്റ്റഗ്രാമില്‍ പങ്കുവെച്ച കുറിപ്പില്‍ പറയുന്നു. സ്ഥലത്തെത്തുന്നതിന് അഞ്ച് മി‌നിറ്റ് മുമ്പ് കാബ് ഡ്രൈവറെ തേടി മുതലാളിയുടെ വിളി വന്നു. തനിക്ക് രാത്രി ഷിഫ്റ്റ് പറ്റുന്നില്ലെന്നും ഡേ ഷിഫ്റ്റിലേക്ക് ജോലി സമയം മാറ്റുമോയെന്നും ഇയാള്‍ ചോദിച്ചതായും മിലിൻ പറയുന്നുണ്ട്. തന്നെ വിശ്വസിച്ച് ജോലി ഏല്‍പ്പിച്ചതിലും ഇത്തരത്തില്‍ ഉറക്കം കാരണം ഡ്രൈവർ ബുദ്ധിമുട്ടിയതുമോര്‍ത്ത് സഹതാപം തോന്നിയതായും കുറിപ്പിൽ പറയുന്നു. 

'അപ്രതീക്ഷിത സംഭവങ്ങളാണ് ജീവിതത്തില്‍ പലപ്പോഴും നടക്കുന്നത്. മറ്റുള്ളവരോട് കരുണയും സഹാനുഭൂതിയുമുണ്ടാകണം', കുറിപ്പില്‍ പറയുന്നു. ഡ്രൈവിങ് സ്കിൽ പൊടിതട്ടി വെക്കുന്നത് നന്നാകുമെന്നും എപ്പോഴാണ് പ്രയോജനപ്പെടുകയെന്ന് പറയാന്‍ കഴിയില്ലെന്നും മിലിന്‍ തമാശരൂപേണ കുറിപ്പില്‍ പങ്കുവെക്കുന്നുണ്ട്. മറ്റൊരാള്‍ക്ക് സഹായം വാഗ്ദാനനം ചെയ്യുമ്പോള്‍ അത് സ്വീകരിക്കാന്‍ എതിര്‍വശത്തുള്ളയാള്‍ തയ്യാറാകുന്നതിനെ സ്വീകരിക്കാനുളള മനസ്സ് നിങ്ങൾക്കുണ്ടാകണമെന്നും കുറിപ്പില്‍ പറയുന്നുണ്ട്. 

നിരവധി പേരാണ് സമാനമായ അനുഭവങ്ങള്‍ പങ്കുവെച്ചുകൊണ്ട് കമന്റുകളുമായെത്തിയത്. ഏതു ബ്രാൻ്റിനു കീഴിൽ ജോലി ചെയ്യുന്ന കാബ് ഡ്രൈവറാണെന്ന് താൻ വെളിപ്പെടുത്തില്ലെന്നും കുറിപ്പിൽ പറയുന്നു. 

Content Highlights: cab driverfound drowsy during a midnight ride from Bengaluru airport,passenger took over driver seat