ജോ ജൊനാസും ടിമോതിയും ബിടിഎസ് ഗായകരെ കോപ്പിയടിച്ചു; സാമൂഹിക മാധ്യമത്തിൽ നിറഞ്ഞ് മീമുകൾ
ലോകത്ത് ഏറ്റവും അധികം ആരാധകരുള്ള മ്യൂസിക് ബാൻഡുകളിൽ ഒന്നാണ് ബിടിഎസ്. ഏഴ് പേരടങ്ങുന്ന ഈ സംഗീത കൂട്ടായ്മ 2010 ലാണ് പ്രവർത്തനം ആരംഭിക്കുന്നത്. കൊറിയയിൽ വളരെ പെട്ടന്ന് തന്നെ ജനപ്രീതി നേടിയ ബി.ടി.എസ് 2018 ലാണ് ലോകമൊട്ടാകെ പ്രശസ്തി നേടുന്നത്. ബിടിഎസ് ഗായകരുടെ പാട്ടിനു മാത്രമല്ല ഫാഷനും പലയിടങ്ങളിലും ആരാധകരുണ്ട്. ഇപ്പോഴിതാ ഓസ്കർ വേദിയിലും ബിടിഎസ് ഫാഷന്റെ സ്വാധീനമുണ്ടെന്നാണ് ആരാധകരുടെ കണ്ടെത്തൽ.
94ാമത് ഓസ്കർ വേദിയിലെത്തിയ ചില താരങ്ങളുടെ ഔട്ട്ഫിറ്റുകൾ ബിടിഎസ് ഗായകരുടേതിന് സമാനമാണെന്നാണ് കണ്ടെത്തൽ. ഗായകൻ ജോ ജൊനാസ് നടൻ ടിമോതി ഷാലമെ തുടങ്ങിയവരുടെ ഔട്ട്ഫിറ്റുകൾ ബിടിഎസ് ഗായകരുടെ ലുക്കിൽ നിന്ന് പകർത്തിയതാണ് എന്നാണ് കമന്റുകൾ.
ഭാര്യയും നടിയുമായ സോഫീ ടർണറിനൊപ്പമാണ് ജോ ജൊനാസ് വേദിയിലെത്തിയത്. ലൂയീ വിറ്റോണിന്റെ ഏറ്റവും പുതിയ കളക്ഷനിൽ നിന്നുള്ള ബ്ലാക് സ്യൂട്ട് ധരിച്ചാണ് ജോ ഓസ്കർ പാർട്ടിക്കെത്തിയത്. ബിടിഎസിലെ ഏറ്റവും സ്റ്റൈലിഷ് അംഗങ്ങളിലൊരാളായ ജെ ഹോപ്പിനെ കോപ്പിയടിച്ചിരിക്കുകയാണ് ജോ എന്നാണ് പലരുടെയും കണ്ടെത്തൽ. ഒരു മാഗസിന്റെ ഫോട്ടോഷൂട്ടിനായി ഹോപ് ധരിച്ച സ്യൂട്ടിന് സമാനമാണ് ജോയുടെയും ഔട്ട്ഫിറ്റ്.