യു.എസ്സിൽ പ്രോസ്റ്റേറ്റ് അർബുദം വീണ്ടും ഉയരുന്നുവെന്ന് റിപ്പോർട്ട്; രോഗലക്ഷണങ്ങളും പരിഹാരവും അറിയാം

പലപ്പോഴും ഏറെ വൈകി തിരിച്ചറിയുന്ന രോഗങ്ങളിൽ ഒന്നാണ് പ്രോസ്റ്റേറ്റ് അർബുദം. വ്യാപിക്കുന്നവേളയിലാണ് പലപ്പോഴും കണ്ടെത്തുന്നത്. പുരുഷന്മാരിൽ മൂത്രസഞ്ചിക്ക് താഴെ മൂത്രനാളിക്കുഴലിനെ ആവരണംചെയ്യുന്ന 20 മുതൽ 30 ഗ്രാംവരെ ഭാരമുള്ള ഗ്രന്ഥിയാണ് പ്രോസ്റ്റേറ്റ്. പുരുഷന്മാരിൽ കൂടുതൽ കണ്ടുവരുന്ന അർബുദബാധകളിലൊന്നാണിത്. 

ഇപ്പോഴിതാ, യു.എസ്സിൽ പ്രോസ്റ്റേറ്റ് അർബുദം വർധിക്കുന്നതായാണ് ഏറ്റവും പുതിയ ​ഗവേഷണങ്ങൾ സൂചിപ്പിക്കുന്നത്. അമേരിക്കൻ കാൻസർ സൊസൈറ്റിയാണ് ഈ റിപ്പോർട്ട് പുറത്തുവിട്ടിരിക്കുന്നത്. രോഗത്തിന്റെ കൂടുതൽ മൂർച്ഛിച്ചതും അപകടകരവുമായ തരങ്ങളിലാണ് ഈ വർധനവ് പ്രകടമാകുന്നത്. പുരുഷന്മാർ സ്ക്രീനിങ്ങിന് വിധേയരാകുന്നത് കുറഞ്ഞതും മറ്റ് ഘടകങ്ങളും ഇക്കാര്യത്തിൽ ഒരു പങ്കുവഹിച്ചേക്കാമെന്നാണ് വിദഗ്ദ്ധർ പറയുന്നത്.

പഠനം പറയുന്നത് 
2007 മുതൽ 2014 വരെ, ഓരോ വർഷവും കേസുകൾ ഏകദേശം ആറു ശതമാനംവരെ കുറഞ്ഞിരുന്നു. എന്നാൽ 2014 മുതൽ 2021 വരെ, അവ വർഷം തോറും മൂന്ന് ശതമാനം വർധിക്കാൻ ആരംഭിച്ചു. അതേസമയം, പ്രോസ്റ്റേറ്റ് കാൻസർ മൂലമുള്ള മരണങ്ങൾ ഇപ്പോഴും കുറയുന്നുണ്ട്. പക്ഷേ, ഇത് വളരെ സാവധാനത്തിലാണ് എന്നാണ് കണക്കുകൾ വ്യക്തമാക്കുന്നത്. 1990-കളിലും 2000-കളിലും, മരണങ്ങൾ വർഷം തോറും 3–4% കുറഞ്ഞിരുന്നു. ഇപ്പോൾ ഇത് വർഷം തോറും 0.6% മാത്രമാണ് കുറയുന്നത്. ശ്വാസകോശാർബുദം കഴിഞ്ഞാൽ, യുഎസിലെ പുരുഷന്മാരിലെ ക്യാൻസർ മരണങ്ങളുടെ രണ്ടാമത്തെ പ്രധാന കാരണം ഇപ്പോഴും പ്രോസ്റ്റേറ്റ് കാൻസറാണ്. 

രോ​ഗത്തിന്റെ ലക്ഷണങ്ങൾ
പലപ്പോഴും ആദ്യഘട്ടത്തിൽ എടുത്തുപറയാനാകുന്ന ലക്ഷണങ്ങൾ  പ്രോസ്റ്റേറ്റ് കാൻസറിന് ഇല്ല എന്നാണ് ഡോക്ടർ പറയുന്നത്. എന്നാലും, ഏറ്റവും സാധാരണയായി കാണുന്ന ലക്ഷണങ്ങളിൽ ഒന്നാണ് മൂത്രസംബന്ധമായ പ്രശ്നങ്ങൾ. രാത്രിയിൽ ഇടയ്ക്കിടെ മൂത്രമൊഴിക്കുക, മൂത്രപ്രവാഹം കുറയുകയോ തടസ്സപ്പെടുകയോ ചെയ്യുക, വേദനാജനകമായ അല്ലെങ്കിൽ പുകച്ചിലോടുകൂടിയ മൂത്രമൊഴിക്കൽ എന്നിവ പ്രോസ്റ്റേറ്റ് കാൻസറിന്റെ ലക്ഷണങ്ങളാകാൻ സാധ്യതയുണ്ട്. മൂത്രത്തിൽ രക്തത്തിന്റെ സാന്നിധ്യം, അടിവയറ്റിലോ, ഇടുപ്പിലോ, അല്ലെങ്കിൽ നടുവിലോ വേദനയും അസ്വസ്ഥതയും ഉണ്ടെങ്കിലും ഒരു ഡോക്ടറെ കാണുന്നതാണ് ഉചിതം. 

ചികിത്സ
1. ശസ്ത്രക്രിയ
പ്രോസ്റ്റേറ്റ് ഗ്രന്ഥി, സെമിനൽ വെസിക്കിളുകൾ, ലിംഫ് നോഡുകൾ എന്നില പൂർണമായും നീക്കം ചെയ്യുന്നതാണ് റാഡിക്കൽ പ്രോസ്റ്റേറ്റ്ക്ടമി(Radical Prostatectomy). എന്നാൽ, റോബോട്ടിന്റെ സഹായത്തോടെയുള്ള റോബോട്ട് അസിസ്റ്റഡ് ശസ്ത്രക്രിയയാണ് നിലവിൽ ലഭ്യമായതിൽ വെച്ചുള്ള ഏറ്റവും മികച്ച ചികിത്സാരീതി എന്നാണ് ഡോക്ടർ പറയുന്നത്. അതേസമയം, മൂത്രം നിയന്ത്രിക്കാനാവാതെ ഇരിക്കുക(urinary incontinence), ലൈംഗിക ശേഷിക്കുറവ് (erectile dysfunction) എന്നിവ ശസ്ത്രക്രിയയുടെ അപകടസാധ്യതകളാണ്. 

2. ഹോർമോൺ തെറാപ്പി (Androgen Deprivation Therapy)
ടെസ്റ്റോസ്റ്റിറോണിന്റെ ഉത്പാദനം നിയന്ത്രിക്കുക എന്നതാണ് ഹോർമോൺ തെറാപ്പിയുടെ പ്രധാന ലക്ഷ്യം. അപകടസാധ്യതയുള്ളതോ ​ഗുരുതുരമായതോ ആയ രോ​ഗികളിൽ റേഡിയേഷനൊപ്പവും ഇത് ചെയ്യാറുണ്ട്. ക്ഷീണം, തളർച്ച, എല്ലുകൾക്ക് ബലക്ഷയമുണ്ടാകാനുള്ള സാധ്യത, മെറ്റബോളിക് മാറ്റങ്ങൾ എന്നീ പാർശ്വഫലങ്ങളുണ്ടാകാൻ സാധ്യതയുണ്ട്.

3. കീമോതെറാപ്പി
​ഗുരുതരാവസ്ഥയിലുള്ള ​രോ​ഗികൾക്കാണ് കീമോതെറാപ്പ് ആവശ്യമായി വരിക. ഡോസെറ്റാക്സെൽ (docetaxel), കബാസിറ്റാക്സെൽ (cabazitaxel) എന്നീ മരുന്നുകൾ രോഗം പടരുന്നത് പതുക്കെയാക്കുമെന്ന് നേരത്തെ തെളിയിക്കപ്പെട്ടിട്ടുണ്ട്. 

(ഈ ലേഖനം പൊതുവായ വിവരങ്ങൾക്കായാണ്. ഇത് വൈദ്യോപദേശത്തിനോ രോഗനിർണ്ണയത്തിനോ ചികിത്സയ്ക്കോ പകരമല്ല. ആരോഗ്യ പ്രശ്നങ്ങൾക്കോ ജീവിതശൈലി മാറ്റങ്ങൾക്കോ എപ്പോഴും ആരോഗ്യ വിദഗ്ധന്റെ ഉപദേശം തേടുക)
 

Content Highlights: Prostate Cancer Cases Rising in the US: New Research and Treatment Options