പുഴുങ്ങിയ മുട്ട ഉടൻ ഉപയോഗിക്കണോ? എത്ര നാൾ സൂക്ഷിക്കാം?

പുഴുങ്ങിയ മുട്ട ഒരെണ്ണമെങ്കിലും ദിവസേന കഴിക്കാത്തവർ വിരളമായിരിക്കും. പോഷകങ്ങളുടെ കലവറയാണ് മുട്ട. എന്നാൽ പുഴുങ്ങിയ മുട്ട എത്രകാലം സൂക്ഷിക്കാനാകുമെന്ന് അറിയുമോ? 

യു.എസ്. ഡിപ്പാർട്ട്‌മെന്റ് ഓഫ് അഗ്രികൾച്ചർ (USDA) നൽകുന്ന മാർഗ്ഗനിർദ്ദേശങ്ങൾ അനുസരിച്ച്, ഹാർഡ്-ബോയിൽഡ് മുട്ടകൾ ഫ്രിഡ്ജിൽ ഒരാഴ്ച വരെ സുരക്ഷിതമായി സൂക്ഷിക്കാം. മുട്ട തോട്  കളഞ്ഞതായാലും അല്ലാത്തതായാലും, സ്ഥിരമായി തണുപ്പിൽ സൂക്ഷിക്കുകയാണെങ്കിൽ ഈ സമയപരിധി ബാധകമാണ്. മുട്ട തിളപ്പിക്കുമ്പോൾ അതിന്റെ സ്വാഭാവിക സംരക്ഷിത ആവരണം നീക്കം ചെയ്യപ്പെടുന്നതിനാൽ, കൂടുതൽ നേരം പുറത്ത് വെച്ചാൽ ബാക്ടീരിയകൾക്ക് എളുപ്പത്തിൽ വളരാൻ കഴിയുന്നതുകൊണ്ട് ഫ്രിഡ്ജിൽ സൂക്ഷിക്കുന്നതാണ് ഉചിതം.

ശരിയായ രീതിയിൽ സൂക്ഷിക്കേണ്ടത് എങ്ങനെ?

• ഉടൻ തന്നെ ഫ്രിഡ്ജിൽ വെക്കുക: പാചകം ചെയ്ത് രണ്ട് മണിക്കൂറിനുള്ളിൽ പുഴുങ്ങിയ മുട്ടകൾ ഫ്രിഡ്ജിൽ വെക്കണം, ഇത് ബാക്ടീരിയകളുടെ വളർച്ച തടയാൻ സഹായിക്കുന്നു.
• കണ്ടെയ്‌നറുകൾ ഉപയോഗിക്കുക: ഈർപ്പം നഷ്ടപ്പെടാതിരിക്കാനും ഫ്രിഡ്ജിലെ മറ്റ് ഗന്ധങ്ങൾ ആഗിരണം ചെയ്യുന്നത് തടയാനും മുട്ടകൾ വായു കടക്കാത്ത, സീൽ ചെയ്ത കണ്ടെയ്‌നറിൽ സൂക്ഷിക്കുക.
• ഏറ്റവും തണുപ്പുള്ള ഭാഗം: താപനിലയിൽ മാറ്റമുണ്ടാകുന്ന ഡോറിൽ വെക്കാതെ, റഫ്രിജറേറ്ററിൻ്റെ ഏറ്റവും തണുപ്പുള്ള ഭാഗത്ത്, ഫ്രിഡ്ജിനുള്ളിലെ നടുവിലെ ഷെൽഫിൽ വെക്കാൻ ശ്രമിക്കുക.
• തീയതി രേഖപ്പെടുത്തുക: എപ്പോഴാണ് വെച്ചതെന്ന് മറക്കാനിടയുണ്ടെങ്കിൽ ബോക്സിനു പുറമേ തിയതി രേഖപ്പെടുത്താം. 

തോടുള്ളതും തോട് കളഞ്ഞതും

• തോട് നീക്കം ചെയ്യാത്ത മുട്ടകൾ: തോട് കളഞ്ഞിട്ടില്ലെങ്കിൽ  കൂടുതൽ സമയം ഫ്രഷ് ആയി നിലനിൽക്കും. വൃത്തിയുള്ള, എയർടൈറ്റ് കണ്ടെയ്‌നറിൽ ഇവ സൂക്ഷിക്കുക.
• തോട് കളഞ്ഞ മുട്ടകൾ: ഇവയുടെ ഈർപ്പം നഷ്ടമാകാതിരിക്കാൻ നനഞ്ഞ പേപ്പർ ടവൽ വെച്ച ഒരു എയർടൈറ്റ് ബോക്സിൽ സൂക്ഷിക്കാം. 

ഒരാഴ്ചക്കുള്ളിൽ പോലും മുട്ടകൾ ചിലപ്പോൾ കേടായേക്കാം. ചീത്തയായതായി തോന്നുന്നുണ്ടെങ്കിൽ അവ ഉപയോഗിക്കാതിരിക്കാം. 

ഫ്രീസ് ചെയ്യാമോ?

ഫ്രീസ് ചെയ്യുന്ന പ്രക്രിയ മുട്ടയുടെ വെള്ളയ്ക്ക് ഉചിതമല്ല. വേവിച്ച മുട്ടയുടെ മഞ്ഞക്കരു മാത്രം വേർതിരിച്ച് ഫ്രീസ് ചെയ്യാമെങ്കിലും, പുതിയ മുട്ടകൾ പുഴുങ്ങുന്നതാണ് ഉചിതം.

Content Highlights: Learn how to properly store hard-boiled eggs in the fridge.