വന്യജീവി സങ്കേതത്തിൽ കടുവയും നാല് കടുവക്കുട്ടികളും ചത്ത നിലയിൽ; മൂന്നു പേർ അറസ്റ്റിൽ

ബെം​ഗളൂരു: കർണാടകയിൽ പെൺകടുവയും നാല് കടുവക്കുട്ടികളും ചത്തതുമായി ബന്ധപ്പെട്ട കേസിൽ മൂന്നുപേർ അറസ്റ്റിൽ. കടുവയെ കൊല്ലുന്നതിന് പശുവിന്റെ ജഡത്തിൽ കീടനാശിനി പ്രയോ​ഗിച്ച സംഭവത്തിൽ കൊപ്പ ​ഗ്രാമനിവാസികളായ കൊണപ്പ, മദരാജ്, നാ​ഗരാജ് എന്നിവരെ അറസ്റ്റുചെയ്തതായി വനംവകുപ്പ് സ്ഥിരീകരിച്ചു. മലെെ മഹാദേശ്വര വന്യജീവി സങ്കേതത്തിലാണ് സംഭവം റിപ്പോർട്ട് ചെയ്തത്. 

വനംവകുപ്പിന്റെ പതിവ് പട്രോളിങ്ങിനിടെയാണ് ചത്ത പശുവിന്റെ ജഡത്തിനു സമീപം പെൺകടുവയെയും നാല് കടുവക്കുട്ടികളെയും ചത്തതായി കണ്ടെത്തിയത്. കടുവ ഭക്ഷിച്ച പശുവിന്റെ ജഡത്തിൽ കീടനാശിനി പ്രയോ​ഗിച്ചതായി അന്വേഷണത്തില്‍ കണ്ടെത്തി. പ്രതികളിലൊരാളായ കൊണപ്പയുടെ പശുവിനെ തന്നെയാണ് കടുവകളെ പിടികൂടുന്നതിനായി ഉപയോ​ഗിച്ചത്. കന്നുകാലി മേയ്ക്കുന്നവരെ ചോദ്യംചെയ്താണ് അധികൃതർ പ്രതികളിലേക്കെത്തിയത്. 

നാഷണൽ ടെെ​ഗർ കൺസർവേഷൻ അതോറിറ്റി (എൻടിസിഎ) പ്രത്യേക സംഘവുമായി ചേര്‍ന്ന് അന്വേഷണം പ്രഖ്യാപിച്ചിട്ടുണ്ട്. 1972-ലെ വന്യജീവി സംരക്ഷണ നിയമം, 1969-ലെ കർണാടക വന നിയമം എന്നിവ പ്രകാരം കേസ് രജിസ്റ്റർ ചെയ്തിട്ടുണ്ട്.

Content Highlights: three arrested after tigress and four cubs found dead in wildlife sanctuary