ചീറ്റകളുടെ പുതിയ വാസസ്ഥലം; ഗാന്ധിസാഗറിൽ അത്ഭുത കാഴ്ചയായി അപൂർവ്വ കാട്ടുപൂച്ചയും

ഭോപ്പാൽ: മധ്യപ്രദേശിലെ ​ഗാന്ധിസാ​ഗർ വന്യജീവി സങ്കേതത്തിൽ വർഷങ്ങൾക്കുശേഷം അപൂർവ്വ കാട്ടുപൂച്ചയായ കാരക്കലിന്റെ (caracal) സാന്നിധ്യം. സ്യാഹ​ഘോഷ് എന്ന് പ്രാദേശികമായ അറിയപ്പെടുന്ന കാട്ടുപൂച്ചയുടെ ചിത്രം ക്യാമറ ട്രാപ്പിലാണ് പതിഞ്ഞത്. 

മന്ദ്സൗർ ഫോറസ്റ്റ് ഡിവിഷനിൽ സ്ഥാപിച്ചിരിക്കുന്ന ക്യാമറ ട്രാപ്പിലാണ് പ്രായപൂർത്തിയായ ആൺ കാരക്കലിന്റെ ചിത്രം പതിഞ്ഞതെന്ന് വനംവകുപ്പ് ഉദ്യോ​ഗസ്ഥർ പ്രതികരിച്ചു.  

പൊതുവെ നാണക്കാരും വേ​ഗത്തിൽ ഓടാന്‍ കഴിവുള്ളവയുമായ ഈ കാട്ടുപൂച്ചകൾ രാത്രികാലങ്ങളിലാണ് സജീവമാകുക. മാംസഭുക്കുകളായ ഇവ ഇന്ത്യയിൽ വംശനാശഭീഷണി നേരിടുന്ന വിഭാ​ഗക്കാരാണ്. അതിനാൽ ഇവയുടെ സാന്നിധ്യം അപൂർവ്വമായി വിലയിരുത്തപ്പെടുന്നു. 

വന്യജീവി സങ്കേതത്തിന്റെ മികച്ച പരിപാലനമാണ് കാരക്കലിന്റെ സാന്നിധ്യം രേഖപ്പെടുത്താൻ കാരണമായതെന്നാണ് വനംവകുപ്പിന്റെ പക്ഷം. 

അടുത്ത കാലത്ത് മധ്യപ്രദേശിലെ കുനോ ദേശീയോദ്യാനത്തിലെത്തിച്ച ചീറ്റകളിൽ രണ്ടെണ്ണത്തെ ​ഗാന്ധിസാ​ഗർ വന്യജീവി സങ്കേതത്തിലേക്ക് മാറ്റിയിരുന്നു. പ്രഭാഷ്, പവക് എന്ന് വിളിപ്പേരുള്ള രണ്ട് ദക്ഷിണാഫ്രിക്കൻ ചീറ്റകളെയാണ് ​ഗാന്ധിസാ​ഗറിലെത്തിച്ചത്. 

Content Highlights: rare caracal spotted in Madhya pradeshs Gandhi sagar sanctuary