മറ്റു ജീവജാലങ്ങൾക്ക് ഭീഷണി; വേട്ടക്കാരായ കാട്ടുപൂച്ചകളെ ഉന്മൂലനം ചെയ്യാനൊരുങ്ങി ന്യൂസിലൻഡ്

ന്യൂസിലൻഡ്: 2050- ഓടെ രാജ്യത്തുടനീളമുള്ള കാട്ടുപൂച്ചകളെ (Feral Cats) ഉന്മൂലനംചെയ്യാൻ ന്യൂസിലൻഡ് പദ്ധതിയിടുന്നു. ന്യൂസിലൻഡിലെ പ്രിഡേറ്റർ-ഫ്രീ 2050 പട്ടികയിൽ ഈ കാട്ടുപൂച്ചകളെയും ഉൾപ്പെടുത്തിയതായി മന്ത്രി തമ പൊട്ടക പ്രഖ്യാപിച്ചു. മനുഷ്യരുമായി ഇണങ്ങാത്ത പ്രകൃതക്കാരായ കാട്ടുപൂച്ചകൾ മറ്റു ജീവജാലങ്ങൾക്ക് വലിയ ഭീഷണി ഉയർത്തുന്ന സാഹചര്യത്തിലാണ് രാജ്യത്തെ തദ്ദേശീയ വന്യജീവികളെ സംരക്ഷിക്കുക എന്ന ലക്ഷ്യത്തോടെ പദ്ധതി ആവിഷ്കരിച്ചത്.

പക്ഷികൾ, വവ്വാലുകൾ, പല്ലികൾ, പ്രാണികൾ എന്നിവയ്ക്ക് ഭീഷണിയാകുന്ന അധിനിവേശ ജീവിവർഗങ്ങളെ ഇല്ലാതാക്കുക എന്നതാണ് പദ്ധതിയുടെ ലക്ഷ്യം. ന്യൂസിലാൻഡിന്റെ കുറ്റിക്കാടുകളിലും കടൽത്തീര ദ്വീപുകളിലും 2.5 ദശലക്ഷത്തിലധികം കാട്ടുപൂച്ചകൾ ഉണ്ടെന്നാണ് കണക്കുകൾ. ഇവയ്ക്ക് ഒരു മീറ്റർ വരെ നീളവും ഏഴ് കിലോഗ്രാം വരെ ഭാരവും ഉണ്ടാകും. വളർത്തുപൂച്ചകളിൽ നിന്ന് വ്യത്യസ്തമായി, വേട്ടയാടിയാണ് ഇവ ജീവിക്കുന്നത്.

ന്യൂസിലൻഡിലെ സ്റ്റുവർട്ട് ദ്വീപിലെ റാക്കിയുറയിലെ പുക്കുനുയി (സതേൺ ഡോട്ടറൽ) പോലുള്ള തദ്ദേശീയ ഇനത്തിൽപ്പെട്ട പക്ഷികളെ ഈ കാട്ടുപൂച്ചകൾ കൊന്നുതിന്നുന്നത് പതിവായിരുന്നു. അവയാകട്ടെ ഇപ്പോൾ വംശനാശം നേരിടുകയാണ്. ഇത്തരത്തിലുള്ള വേട്ടയാടലുകൾ പലപ്പോഴും ന്യൂസിലൻഡിന്റെ അതുല്യമായ ജൈവവൈവിധ്യത്തിന് വെല്ലുവിളി ഉയർത്തിയിട്ടുണ്ട്. ഇതിന്റെ പശ്ചാത്തലത്തിലാണ് കാട്ടുപൂച്ചകളുടെ എണ്ണം നിയന്ത്രിക്കാൻ അധികൃതർ തീരുമാനിച്ചത്.

Content Highlights: New Zealand plans to eliminate wild cats by 2050 as part of Predator Free 2050 initiative to protect endangered native birds, bats, and other wildlife from invasive predators.