കനയ്യയെ തേടി ബെഗുസരായിയിലേക്ക്; ഉപ്പുമാങ്ങകള് വിശപ്പടക്കിയ തിരഞ്ഞെടുപ്പ് യാത്ര
വാരാണസിയില് നിന്ന് അതിരാവിലെയുള്ള ട്രെയിനിലാണ് പട്നയിലെത്തിയത്. പട്നയില് നിന്ന് ബെഗുസരായി വഴി പോകുന്ന ഇന്റര്സിറ്റി എക്സ്പ്രസിന്റെ സമയം രാവിലെ എട്ടര. നേരത്തെ എത്തിയതിനാല് ആവശ്യത്തിന് സമയമുണ്ട്. അതിമധുരപ്പായസം പോലെയാണെങ്കിലും ഇഞ്ചി ചേര്ത്ത ഒരു ചായ പകുതി കുടിച്ച് മേല്പ്പാലങ്ങള് മാറിമാറി കയറി പ്ലാറ്റ്ഫോമിലെത്തി. വണ്ടി കിടപ്പുണ്ട്. പക്ഷെ ശര്ക്കരക്കുടത്തില് ഈച്ച പൊതിഞ്ഞതുപോലെ ഓരോ കംപാര്ട്ട്മെന്റിനും മുന്നില് ആള്ക്കൂട്ടത്തിന്റെ ആര്ത്തടുക്കലുകള്. ചെറുവാതില് പൊളിച്ചെടുക്കുമെന്ന് തോന്നും പോലെ ആളുകള് അകത്തു കടക്കാന് കയ്യാങ്കളിയും കായികാഭ്യാസങ്ങളും.
നീണ്ട യാത്രക്കുള്ള വലിയ പെട്ടിയും തൂക്കി ആള്ക്കൂട്ടത്തിന് പിന്നിലായി നിന്നു. പത്ത് ദിവസത്തെ തിരഞ്ഞെടുപ്പ് റിപ്പോര്ട്ടിംഗിനായി പുറപ്പെട്ടതിനാല് പെട്ടിക്ക് സാമാന്യം നല്ല ഭാരം. സമയം ചോരും തോറും ആള്ക്കൂട്ടം പെരുകുന്നു. ഓണ്ലൈന് ബുക്ക് ചെയ്തെടുത്ത ടിക്കറ്റില് ഒന്നു കൂടി ഉറപ്പിച്ച് നിശ്ചിത കംപാര്ട്ട്മെന്റിന് മുന്നിലെത്തി. സ്ഥിതിക്ക് ഒരു മാറ്റവുമില്ല. ചെറുവാതില് നൂണ്ടുകയറാന് പത്തിരട്ടി ആളുകള് ഇടിയോടിടി. പലര്ക്കും റിസര്വേഷനുമില്ല, ബുക്കിംഗുമില്ല. മറ്റാരോ ബുക്ക് ചെയ്ത ടിക്കറ്റ് ലക്ഷ്യമാക്കിയുള്ള ഇരമ്പമാണ്. സീറ്റ് നമ്പര് അച്ചടിച്ച ടിക്കറ്റും കയ്യില് പിടിച്ച് ഇടിക്കൂട്ടത്തിന് പിന്നില് ഭാരപ്പെട്ടിയുമായി എപ്രിലിന്റെ ദാക്ഷിണ്യമില്ലാത്ത ചൂടില് ഉരുകിയൊലിച്ചു നില്ക്കുമ്പോള് കയറിയവരെയും കയറിക്കൂടിയവരെയും പേറി ഇന്റര്സിറ്റി എകസ്പ്രസ് പട്ന സ്റ്റേഷനില് നിന്ന് നീങ്ങി.
Content Highlights: election memories by manoj menon