മാവേലിക്കരയ്ക്കുണ്ടോ മനംമാറ്റം? യുവത്വവും പരിചയസമ്പത്തും ഏറ്റുമുട്ടുമ്പോള് പോര് മുറുക്കാന് NDA
മൂന്ന് ജില്ലകളിലായി പരന്നുകിടക്കുന്ന മണ്ഡലം, രാഷ്ട്രീയത്തെ സ്വാധീനിക്കും വിധം സാമുദായിക ചേരുവകളും കെട്ടുപിണഞ്ഞുകിടക്കുന്ന മാവേലിക്കര. നായർ സർവീസ് സൊസൈറ്റിയുടെ ആസ്ഥാനം, കത്തോലിക്ക സഭയുടെ രൂപതകൾ, വിവിധ ക്രൈസ്തവ സഭകളുടെ ഭദ്രാസനങ്ങൾ, വിശ്വകർമസഭയുടെ ആസ്ഥാനം, കേരള പുലയർ മഹാസഭയുടെ ശക്തമായ യൂണിയനുകൾ അങ്ങനെ നിരവധി സാമുദായിക സംഘടനകളുടെ പ്രഭാവം പ്രബലമാണ് സംവരണമണ്ഡലമായ മാവേലിക്കരയിൽ. കോൺഗ്രസിൻ്റെ ത്രിവർണം പാറിയ തിരഞ്ഞെടുപ്പ് ജയങ്ങൾക്കാണ് മാവേലിക്കര ഏറെയും സാക്ഷിയായത്. എങ്കിലും ഇടതിനോട് പൂർണമായും ഇടഞ്ഞു നിൽക്കുന്ന മണ്ഡലമാണ് മാവേലിക്കരയെന്നും പറയാനാകില്ല. കോൺഗ്രസ് സിറ്റിങ്ങ് എം.പി.യെ തോൽപ്പിച്ച് എൽ.ഡി.എഫ്. അട്ടിമറി വിജയം നേടിയ ചരിത്രവും മാവേലിക്കരയ്ക്ക് പറയാനുണ്ട്.
തുടർച്ചയായ മൂന്ന് തിരഞ്ഞെടുപ്പിലും കൊടിക്കുന്നിൽ സുരേഷിനെ പാർലമെൻ്റിലേക്ക് വണ്ടി കയറ്റിവിട്ട മണ്ഡലത്തിൽ വിജയസാധ്യതയുള്ള മറ്റൊരാളെ പകരംവെയ്ക്കാൻ കോൺഗ്രസിനില്ല. കൊടിക്കുന്നിൽ വിജയക്കൊടി പാറിച്ച മാവേലിക്കര ഏതുവിധേനയും പിടിച്ചെടുക്കുമെന്ന നിശ്ചയദാർഢ്യത്തിലാണ് പുതുമുഖമായ സി.എ. അരുൺകുമാറിനെ സി.പി.ഐ. രംഗത്തിറക്കിയത്. എൽ.ഡി.എഫിനു മേൽക്കൈയുള്ള നിയമസഭാ മണ്ഡലങ്ങളുടെ കരുത്ത് ലോക്സഭയിൽ തങ്ങളെ തുണയ്ക്കുമെന്ന വിശ്വാസം ഇടതുമുന്നണിക്കുണ്ട്.
Content Highlights: who will win in mavelikkara lok sabha constituency kodikunnil suresh or c a arun kumar