അമേഠിയിലെ കോൺഗ്രസ് ഓഫീസിനുനേരെ ആക്രമണം, വാഹനങ്ങൾ തകർത്തു; സ്മൃതി ഇറാനി ഭീതിയിലെന്ന് കോൺഗ്രസ്

ലഖ്നൗ: അമേഠിയിലെ കോൺ​ഗ്രസ് പാർട്ടി ഓഫീസിനുനേരെ ആക്രമണം. അക്രമിസംഘം ഓഫീസിനുമുന്നിൽ നിർത്തിയിട്ടിരുന്ന വാഹനങ്ങൾ തകർത്തു. ഞായറാഴ്ച അർധരാത്രിയായിരുന്നു സംഭവം. അക്രമത്തിന് പിന്നിൽ ബി.ജെ.പിയാണെന്ന് കോൺ​ഗ്രസ് ആരോപിച്ചു. 

അക്രമവിവരം പുറത്തായതോടെ നിരവധി പാർട്ടി പ്രവർത്തകരാണ് ഓഫീസിലേക്കെത്തിയത്. ജില്ലാ അധ്യക്ഷൻ സിം​ഗലും സ്ഥലത്തെത്തി. സി.ഒ മായങ്ക് ദ്വിവേദിക്കൊപ്പം വൻ പോലീസ് സന്നാഹം സ്ഥലത്തെത്തിയാണ് പ്രവര്‍ത്തകരെ അനുനയിപ്പിച്ചത്. സംഭവത്തിൽ കൃത്യമായ അന്വേഷണമുണ്ടാകുമെന്നും ഉത്തരവാദികളായവർക്കെതിരെ തക്കതായ നടപടിയുണ്ടാകുമെന്നും പോലീസ് ഉറപ്പുനൽകി. 

അമേഠിയിൽ സ്മൃതി ഇറാനിയും പ്രവർത്തകരും കടുത്ത ഭീതിയിലാണെന്ന് കോൺ​ഗ്രസ് ആരോപിച്ചു. ആസന്നമായ തോൽവിയിൽ നിരാശരായ ബി.ജെ.പി ​ഗുണ്ടകൾ കോൺ​ഗ്രസ് ഓഫീസിലെത്തി വാഹനങ്ങൾ തകർത്തു. സംഭവസമയത്ത് പോലീസ് കാഴ്ചക്കാരായിരുന്നു. അമേഠിയിൽ ബി.ജെ.പി കനത്ത് തോൽവി ഏറ്റുവാങ്ങുമെന്നതിന്റെ തെളിവാണ് ഈ സംഭവമെന്നും കോൺ​ഗ്രസ് എക്സിൽ കുറിച്ചു. 

അമേഠിയിൽ രാഹുലിന് പകരം ഗാന്ധികുടുംബത്തിന്റെ വിശ്വസ്തനായ കിശോരി ലാൽ ശർമയാണ് ഇത്തവണ സ്ഥാനാർഥി. രാഹുൽ ​ഗാന്ധി ഇക്കുറി റായ്ബറേലിയിൽ നിന്ന് മത്സരിക്കും. സോണിയാ ഗാന്ധി 1999-ൽ അമേഠിയിൽ ജയിക്കുകയും അടുത്തതവണ രാഹുലിന് മണ്ഡലം കൈമാറുകയുംചെയ്ത് കാൽനൂറ്റാണ്ടിനുശേഷമാണ് ഗാന്ധികുടുംബം അമേഠിയെ കൈയൊഴിയുന്നത്. 2019-ലെ പൊതുതിരഞ്ഞെടുപ്പിൽ അമേഠിയിൽ രാഹുൽ പരാജയപ്പെട്ടിരുന്നു.

Content Highlights: Congress Office In UPs Amethi Attacked