പാലക്കാട് നഗരസഭയിൽ ഭരണം ഉറപ്പിക്കാന്‍ ബിജെപി; തുറുപ്പുചീട്ടാക്കി മുന്നണികൾ

പാലക്കാട്: പാലക്കാട് നഗരസഭയില്‍ ഭൂരിപക്ഷമായ 27 സീറ്റെന്ന മാജിക് സംഖ്യയ്ക്ക് രണ്ടടി പിന്നിലായി ബിജെപി. 53 അംഗസഭയില്‍ പാര്‍ട്ടിക്ക് 25 സീറ്റ് ലഭിച്ചപ്പോള്‍ യുഡിഎഫ് 18ഉം എല്‍ഡിഎഫ് ഒന്‍പതും സീറ്റ് സ്വന്തമാക്കി. ഒരുസീറ്റില്‍ സ്വതന്ത്ര സ്ഥാനാര്‍ഥിയും വിജയിച്ചു. ഏറ്റവും ശ്രദ്ധേയമായത് 48-ാം വാര്‍ഡ് പള്ളിപ്പുറത്ത് മുന്നണി സ്ഥാനാര്‍ഥികളെ വീഴ്ത്തിയ സ്വതന്ത്രന്‍ എം.എം. അഷ്‌കറിന്റേതാണ്. ഈ ജയം നഗരസഭയില്‍ പത്ത് വര്‍ഷമായി തുടരുന്ന ബിജെപിയെ തളയ്ക്കാനുള്ള തുറുപ്പുചീട്ടാകുമോയെന്നാണ് ഇനി അറിയാനുള്ളത്.

ഏറ്റവും വലിയ ഒറ്റക്കക്ഷിയായ ബിജെപിക്ക് സ്വഭാവികമായും തുടര്‍ഭരണത്തിന് അവകാശവാദമുന്നയിക്കാം. നിയമസഭാ തിരഞ്ഞെടുപ്പിന് ആറുമാസം മാത്രം ബാക്കി നില്‍ക്കേ യുഡിഎഫിനെ പുറത്തു നിന്നെങ്കിലും പിന്തുണയ്ക്കുന്നതിന് എല്‍ഡിഎഫിനോ മറിച്ച് ചിന്തിയ്ക്കുന്നതിന് യുഡിഎഫിനോ പരിമിതികളേറെയാണ്. മറിച്ചായാല്‍ ബിജെപിയ്ക്കത് വലിയ രാഷ്ടീയ ആയുധമാകുകയും ചെയ്യും.

ഈ സാഹചര്യം മറികടക്കാനുള്ള ഫോര്‍മുലയും രാഷ്ട്രീയ വൃത്തങ്ങളില്‍ സജീവ ചര്‍ച്ചയാണിപ്പോള്‍. പള്ളിപ്പുറം വാര്‍ഡിലെ സ്വതന്ത്ര അംഗത്തിന്റെ നേതൃത്വത്തില്‍ ബിജെപിക്ക് ബദല്‍ എന്ന സാധ്യതയാണിത്. യുഡിഎഫും എല്‍ഡിഎഫും സ്വതന്ത്രനെ പിന്തുണച്ചാല്‍ അത് നയവിരുദ്ധമാകില്ലെന്നതാണ് വാദം. 28 സീറ്റ് ഉറപ്പാക്കാനുമാവും. ഇതിന് കോണ്‍ഗ്രസ്, എല്‍ഡിഎഫ് നേതൃത്വങ്ങളുടെ ഇടപെടലുണ്ടാവുമോ എന്നതാണ് ഇനി കണ്ടറിയേണ്ടത്.

പന്ത് രണ്ടാമത്തെ വലിയ കക്ഷിയായ കോണ്‍ഗ്രസിന്റെ കോര്‍ട്ടിലാണിപ്പോഴെന്നാണ് എല്‍ഡിഎഫ് വൃത്തങ്ങള്‍ നല്‍കുന്ന സൂചന. സിപിഎം, കോണ്‍ഗ്രസ് നേതാക്കള്‍ വിഷയത്തില്‍ നേരിട്ട് പ്രതികരിക്കാന്‍ തയ്യാറായിട്ടുമില്ല.

നഗരസഭാ ഭരണമേറ്റെടുക്കാനുള്ള നടപടികളുമായി മുന്നോട്ടുപോകുമെന്നാണ് ബിജെപി നിലപാട്. നിലവിലെ വൈസ് ചെയര്‍മാന്‍ അടക്കമുള്ള നേതാക്കള്‍ വിജയിച്ച സാഹചര്യത്തില്‍ എന്ത് വിലകൊടുത്തും ഭരണം നിലനിര്‍ത്തുമെന്നും അവര്‍ പറയുന്നു.

Content Highlights: Palakkad Municipality election results are out! BJP missed majority by 2 seats. UDF & LDF eye a coalition