യു.പി. തിരഞ്ഞെടുപ്പ് നാലാം ഘട്ടം: ഉന്നാവും ലഖിംപുര് ഖേരിയും ഉള്പ്പെടെ 59 മണ്ഡലങ്ങള് ബൂത്തിലേക്ക്
ലഖ്നൗ: നിയമസഭാ തിരഞ്ഞെടുപ്പിന്റെ നാലാം ഘട്ടത്തില് ഉത്തർപ്രദേശില് വോട്ടെടുപ്പ് പുരോഗമിക്കുന്നു. ഒന്പത് ജില്ലകളില് വ്യാപിച്ചു കിടക്കുന്ന 59 മണ്ഡലങ്ങളിലാണ് ഇന്ന് വോട്ടെടുപ്പ് നടക്കുന്നത്. വൈകുന്നേരം ആറുമണിക്ക് പോളിങ് അവസാനിക്കും. തിങ്കളാഴ്ച വൈകിട്ടാണ് പ്രചാരണം അവസാനിച്ചത്.
ലഖ്നൗ, ഉന്നാവോ, ലഖിംപുര് ഖേരി, പിലിഭിത്ത്, റായ് ബറേലി തുടങ്ങിയ ജില്ലകളാണ് നാലാംഘട്ട വോട്ടെടുപ്പില് ഉള്പ്പെടുന്നത്. 624 സ്ഥാനാര്ഥികളാണ് ജനവിധി തേടുന്നത്. 403 അംഗ ഉത്തര് പ്രദേശ് നിയമസഭയിലേക്കുള്ള തിരഞ്ഞെടുപ്പ് ഏഴുഘട്ടമായാണ് നടക്കുന്നത്. മാര്ച്ച് പത്തിനാണ് വോട്ടെണ്ണല്.
2017-ല് 51 സീറ്റുകളില് ബി.ജെ.പി. ആയിരുന്നു വിജയിച്ചത്. നാല് സീറ്റുകളില് സമാജ് വാദി പാര്ട്ടിയും രണ്ടിടത്ത് കോണ്ഗ്രസും വിജയിച്ചു. മായാവതിയുടെ ബി.എസ്.പി. രണ്ടു സീറ്റിലും ബി.ജെ.പി. സഖ്യകക്ഷി അപ്നാദള് (സോനേലാല്) ഒരു സീറ്റിലും വിജയിച്ചിരുന്നു.
Content Highlights: uttar pradesh assembly election fourth phase