സ്വകാര്യ സ്കൂൾ ഫീസ് നിയന്ത്രിക്കാൻ തമിഴ്‌നാട്; പുതിയ നിയമം പാസാക്കി, രക്ഷിതാക്കൾക്ക് ആശ്വാസം
ചെന്നൈ: സ്വകാര്യ സ്കൂളുകളുടെ അമിതമായ ഫീസ് വർധനവിന്‌ തടയിടാൻ ലക്ഷ്യമിട്ടുള്ള സുപ്രധാന നിയമഭേദഗതി തമിഴ്‌നാട് നിയമസഭ പാസാക്കി. തമിഴ്‌നാട് സ്‌കൂൾസ്‌ (റഗുലേഷൻ ഓഫ് കളക്ഷൻ ഓഫ് ഫീ) ഭേദഗതി ബിൽ 2026 ആണ് നിയമസഭ അംഗീകരിച്ചത്. ഇതോടെ സംസ്ഥാനത്തെ സ്വകാര്യ സ്‌കൂളുകളിൽ ഫീസ് ഘടനയിൽ പ്രധാന മാറ്റങ്ങൾ ഉണ്ടാകും.
ഏഴംഗ സമിതി ഫീസ് നിശ്ചയിക്കും
പുതിയ നിയമപ്രകാരം, വിരമിച്ച ഹൈക്കോടതി ജഡ്ജി അധ്യക്ഷനായ ഏഴംഗ സമിതിയായിരിക്കും സംസ്ഥാനത്തെ സ്വകാര്യ സ്കൂളുകളുടെ ഫീസ് ഘടന തീരുമാനിക്കുന്നത്. സമിതി നിശ്ചയിക്കുന്ന ഫീസ് എല്ലാ സ്വകാര്യ സ്‌കൂളുകൾക്കും നിർബന്ധിതമായിരിക്കും.
സമിതിയിലെ അംഗങ്ങൾ:
വിരമിച്ച ഹൈക്കോടതി ജഡ്ജി (അധ്യക്ഷൻ)
സ്റ്റേറ്റ് പാരന്റ്-ടീച്ചേഴ്സ് അസോസിയേഷനിൽ നിന്നുള്ള രക്ഷിതാക്കളുടെ പ്രതിനിധി
സ്കൂൾ വിദ്യാഭ്യാസ ഡയറക്ടർ
സ്വകാര്യ സ്കൂൾ പ്രതിനിധികൾ
എലിമെന്ററി വിദ്യാഭ്യാസ വിഭാഗം പ്രതിനിധി
പൊതുമരാമത്ത് വകുപ്പിലെ ജോയിന്റ് ചീഫ് എഞ്ചിനീയർ
സ്കൂൾ വിദ്യാഭ്യാസ വകുപ്പിലെ ഉദ്യോഗസ്ഥൻ
പ്രധാന മാറ്റങ്ങൾ
മൂന്ന് വർഷത്തേക്ക് മാറ്റമില്ല: സമിതി ഒരിക്കൽ നിശ്ചയിക്കുന്ന ഫീസ് തുടർച്ചയായ മൂന്ന് അധ്യയന വർഷത്തേക്ക് നിലനിൽക്കും. ഇത് രക്ഷിതാക്കൾക്കും സ്കൂൾ മാനേജ്‌മെന്റുകൾക്കും ഫീസിനെക്കുറിച്ച് മുൻകൂട്ടി വ്യക്തമായ ധാരണ നൽകാൻ സഹായിക്കും.
രക്ഷിതാക്കളുടെ പങ്കാളിത്തം: 2009-ലെ പഴയ നിയമത്തിൽ ഫീസ് നിശ്ചയിക്കുന്ന പ്രക്രിയയിൽ രക്ഷിതാക്കൾക്ക് നേരിട്ട് പങ്കാളിത്തമില്ലായിരുന്നു. പുതിയ ഭേദഗതിയിലൂടെ രക്ഷിതാക്കളുടെ പ്രതിനിധിയെ കൂടി ഉൾപ്പെടുത്തിയത് നടപടികൾ കൂടുതൽ സുതാര്യമാക്കും.
മാനദണ്ഡങ്ങൾ: സ്കൂളിലെ അടിസ്ഥാന സൗകര്യങ്ങൾ, പ്രവർത്തന ചെലവുകൾ, രക്ഷിതാക്കളുടെ പരാതികൾ എന്നിവ പരിഗണിച്ച ശേഷമേ സമിതി അന്തിമ ഫീസ് നിശ്ചയിക്കുകയുള്ളൂ.
സിബിഎസ്ഇ , ഐസിഎസ്ഇ സ്കൂളുകളുടെ ഫീസ് ഘടനയുമായി ബന്ധപ്പെട്ട കേസ് നിലവിൽ കോടതിയുടെ പരിഗണനയിലായതിനാൽ, ഈ സ്കൂളുകളുടെ കാര്യത്തിൽ കോടതി വിധിക്ക് അനുസൃതമായ തീരുമാനമേ ഉണ്ടാകൂ എന്ന് സർക്കാർ വ്യക്തമാക്കിയിട്ടുണ്ട്.
അമിത ഫീസ് ഈടാക്കുന്ന സ്കൂളുകൾക്കെതിരെ കർശന നടപടി സ്വീകരിക്കാനും പുതിയ നിയമം വ്യവസ്ഥ ചെയ്യുന്നു. നിയമം നടപ്പിലാക്കുന്ന തീയതി സർക്കാർ ഉടൻ വിജ്ഞാപനം ചെയ്യും.
Content Highlights: Tamil Nadu passes landmark bill to regulate private school fee hikes.