അന്ന് അമ്മയ്ക്കായി മാറ്റിവെച്ച പഠനം ഇന്ന് പൂർത്തിയാക്കി; പത്മാവതി അമ്മയുടെ വിജയത്തിന് പത്തരമാറ്റ്

76-ാം വയസ്സിൽ പത്താം ക്ലാസ് തുല്യതാപരീക്ഷ വിജയിച്ച കോഴിക്കോട് കൊടുവള്ളി വാരിക്കുഴിത്താഴം അരിക്കോട്ടിൽ പത്മാവതി അമ്മ ആഗ്രഹപൂർത്തീകരണത്തിന്റെ സന്തോഷത്തിലാണിപ്പോൾ. 1968-69 ബാച്ചിൽ പത്താംക്ലാസ് പരീക്ഷയെഴുതി തോറ്റപ്പോൾ വീട്ടിലെ സാഹചര്യം തുടർപഠനത്തിന് തടസ്സമായി. അമ്മ വീണ് തോളെല്ലുപൊട്ടി കിടപ്പിലായപ്പോൾ അമ്മയെ ശുശ്രൂഷിക്കാൻ ആളില്ലാതായപ്പോഴാണ് പത്മാവതി അമ്മയ്ക്ക് പഠനം നിർത്തേണ്ടിവന്നത്.

അന്ന് മനസ്സിലുദിച്ച ആഗ്രഹമായിരുന്നു പത്താം ക്ലാസ് പരീക്ഷയെഴുതി വിജയിക്കണമെന്നത്. പത്മാവതി അമ്മയ്ക്ക് പഠനം പാതിവഴിയിൽ നിർത്തിയവരോട് പറയാനുള്ളത് ആഗ്രഹവും പരിശ്രമവുമുണ്ടെങ്കിൽ വിജയം ഉറപ്പാണെന്നാണ്. നല്ലപോലെ കഷ്ടപ്പെട്ടാണ് പത്മാവതി അമ്മ ഇംഗ്ലീഷും ഹിന്ദിയും ഉൾപ്പെടെയുള്ള വിഷയങ്ങൾ പഠിച്ചെടുത്തത്.

മറവിയും ഇംഗ്ലീഷ് ഹിന്ദി വാക്കുകളുടെ അർഥങ്ങൾ മനസ്സിലാകാത്തതും വലിയ പ്രയാസങ്ങളുണ്ടാക്കിയിരുന്നതായി പത്മാവതി അമ്മ പറഞ്ഞു. എന്നാൽ, അധ്യാപകരുടെ പൂർണ സഹകരണമാണ് പത്മാവതി അമ്മയ്ക്ക് പരീക്ഷയെഴുതാനുള്ള ആത്മവിശ്വാസം നൽകിയത്. തുല്യതാ പഠനക്ലാസിൽ ഏറ്റവും പ്രായംകൂടിയ പഠിതാവായിരുന്നു പത്മാവതി അമ്മ.

ക്ലാസിൽ ഏറ്റവും ആക്ടീവായിരുന്ന പത്മാവതി അമ്മയെ ഞങ്ങളെല്ലാവരും അമ്മേ എന്നായിരുന്നു വിളിച്ചിരുന്നതെന്നും ഈ അമ്മയെ പഠിപ്പിക്കാൻ സാധിച്ചതിൽ അഭിമാനിക്കുന്നതായും പത്മാവതി അമ്മയുടെ ഹിന്ദി അധ്യാപകനായ കൊടുവള്ളി ഗവ. ഹയർസെക്കൻഡറി സ്കൂൾ റിട്ട. അധ്യാപകൻ ചാത്തമംഗലം പുനത്തിൽ കെ.ടി. സന്തോഷ് പറഞ്ഞു.

മലയാളം, ഇംഗ്ലീഷ്, ഹിന്ദി എന്നിവ അക്ഷരത്തെറ്റില്ലാതെ എഴുതാൻ പത്മാവതി അമ്മയ്ക്ക് സാധിച്ചിരുന്നു. സ്കൂൾ പഠനകാലത്ത് സ്വായത്തമാക്കിയതായിരുന്നു ഈ കഴിവ്. പ്രായം 76 ആയെങ്കിലും വെറുതെയിരിക്കുന്ന പതിവ് പത്മാവതി അമ്മയ്ക്കില്ല.

മൈ ലൈഫ് സ്റ്റൈൽ മാർക്കറ്റിങ് ഗ്ലോബൽ പ്രൈവറ്റ് ലിമിറ്റഡിൽ ഡിസ്ട്രി ബ്യൂട്ടർ ഏരിയാ ടീം കോഡിനേറ്ററായി പ്രവർത്തിക്കുകയാണിപ്പോൾ. വാരിക്കഴിത്താഴം കണ്ണിക്കകരുമകൻ ക്ഷേത്രം മുൻ മാതൃസമിതി പ്രസിഡന്റും ഇപ്പോൾ ക്ഷേത്രകമ്മിറ്റി അംഗവുമാണ് പത്മാവതി അമ്മ. പരേതനായ ഗോപാലൻനായരാണ് ഭർത്താവ്. വിമുക്തഭടനായ പ്രദീപ് മകനാണ്.

Content Highlights: Discover the inspiring story of Padmavathi Amma, who passed her 10th-grade equivalency exams at 76 in Kozhikode, overcoming past challenges.