MBBS ഫീസ് 4.5 വർഷത്തേക്ക് മാത്രം; അധിക ഫീസ് ഈടാക്കുന്ന കോളേജുകൾക്കെതിരെ മുന്നറിയിപ്പുമായി എൻ.എം.സി

രാജ്യത്തെ മുഴുവൻ മെഡിക്കൽ കോളേജുകൾക്കും സർവ്വകലാശാലകൾക്കുമായി നാഷണൽ മെഡിക്കൽ കമ്മീഷൻ പുതിയ മാർഗ്ഗനിർദ്ദേശങ്ങൾ പുറപ്പെടുവിച്ചു. എം.ബി.ബി.എസ് കോഴ്സിന്റെ നിശ്ചിത പഠനകാലയളവായ 4.5 വർഷത്തേക്ക് മാത്രമേ ട്യൂഷൻ ഫീസ് ഈടാക്കാവൂ എന്നാണ് കമ്മീഷന്റെ ഉത്തരവ്. ചില സ്ഥാപനങ്ങൾ അഞ്ച് മുതൽ അഞ്ചര വർഷം വരെ ഫീസ് ഈടാക്കുന്നു എന്ന പരാതികളെത്തുടർന്നാണ് നടപടി.

പഠനകാലയളവ് മാത്രം കണക്കിലെടുക്കുക: കോംപിറ്റൻസി ബേസ്ഡ് മെഡിക്കൽ എഡ്യൂക്കേഷൻ' (സിബിഎംഇ) 2024 മാർഗ്ഗനിർദ്ദേശങ്ങൾ പ്രകാരം എം.ബി.ബി.എസ് കോഴ്സിൽ 4.5 വർഷത്തെ അക്കാദമിക് പഠനവും തുടർന്ന് ഒരു വർഷത്തെ നിർബന്ധിത ഇന്റേൺഷിപ്പും (സിആർഎംഐ) ആണുള്ളത്.

ഇന്റേൺഷിപ്പിന് ഫീസ് വേണ്ട: ഇന്റേൺഷിപ്പ് കാലയളവിൽ ക്ലാസ് മുറികളിലെ അക്കാദമിക് അധ്യാപനം നടക്കുന്നില്ല. അതിനാൽ ഈ കാലയളവ് കൂടി ഉൾപ്പെടുത്തി അഞ്ച് വർഷത്തേക്കോ അഞ്ചര വർഷത്തേക്കോ ഫീസ് ഈടാക്കുന്നത് തെറ്റായ നടപടിയാണെന്ന് എൻ.എം.സി വ്യക്തമാക്കി.

നിയമപരമായ പിൻബലം: നാഷണൽ മെഡിക്കൽ കമ്മീഷൻ ആക്ട് 2019 പ്രകാരം എല്ലാ സ്ഥാപനങ്ങളും നിശ്ചിത കോഴ്സ് ഘടന പാലിക്കാൻ ബാധ്യസ്ഥരാണ്. ടി.എം.എ പൈ ഫൗണ്ടേഷൻ, പി.എ ഇനാംദാർ തുടങ്ങിയ കേസുകളിലെ സുപ്രീം കോടതി വിധികൾ പ്രകാരം വിദ്യാഭ്യാസ സ്ഥാപനങ്ങൾ ഈടാക്കുന്ന ഫീസ് ന്യായവും സുതാര്യവും ചൂഷണമില്ലാത്തതുമാകണം.

സ്റ്റൈപ്പൻഡ് കാര്യത്തിലും ജാഗ്രത

അഭിഷേക് യാദവ് വേഴ്സസ് യൂണിയൻ ഓഫ് ഇന്ത്യ എന്ന കേസിൽ സുപ്രീം കോടതി നൽകിയ ഇടക്കാല ഉത്തരവും എൻ.എം.സി ചൂണ്ടിക്കാട്ടി. ഇന്റേൺഷിപ്പ് ചെയ്യുന്ന വിദ്യാർത്ഥികൾക്ക് സ്റ്റൈപ്പൻഡ് നൽകാതിരിക്കുന്നതും അവരിൽ നിന്ന് ഇന്റേൺഷിപ്പ് ഫീസുകൾ ഈടാക്കുന്നതും ഗൗരവകരമായ കാര്യമാണെന്ന് കമ്മീഷൻ ഓർമ്മിപ്പിച്ചു.

നിർദ്ദേശങ്ങൾ ലംഘിക്കുന്ന മെഡിക്കൽ കോളേജുകൾക്കെതിരെ നിയമപ്രകാരം കർശനമായ നടപടികൾ സ്വീകരിക്കുമെന്ന് എൻ.എം.സി താക്കീത് നൽകി. ഫീസ് ഘടനയിൽ കൃത്യത വരുത്താനും വിദ്യാർത്ഥികളെ സാമ്പത്തികമായി ചൂഷണം ചെയ്യുന്നത് അവസാനിപ്പിക്കാനുമാണ് ഈ നീക്കം.

Content Highlights: NMC Bans MBBS Internship Fees: What Every Student Must Know