വിസ്മയ കേസ്: ശിക്ഷാവിധിക്കെതിരേ കിരണ്കുമാര് അപ്പീലുമായി ഹൈക്കോടതിയില്
കൊച്ചി: കൊല്ലത്തെ വിസ്മയ കേസിലെ പ്രതി കിരണ്കുമാര് അപ്പീലുമായി ഹൈക്കോടതിയില്. കൊല്ലം അഡീഷണല് സെഷന്സ് കോടതിയുടെ ശിക്ഷാവിധിക്കെതിരേയാണ് പ്രതി ഹൈക്കോടതിയെ സമീപിച്ചത്. കിരണ്കുമാറിന്റെ അപ്പീലില് അടുത്തമാസം ഹൈക്കോടതി വാദം കേള്ക്കും.
സ്ത്രീധനപീഡനം കാരണം ബി.എ.എം.എസ്. വിദ്യാര്ഥിനി വിസ്മയ ജീവനൊടുക്കിയെന്ന കേസില് ഭര്ത്താവ് കിരണ്കുമാറിനെ മേയ് 24-നാണ് കോടതി ശിക്ഷിച്ചത്. പത്തുവര്ഷത്തെ തടവും 12.55 ലക്ഷം രൂപ പിഴയുമായിരുന്നു ശിക്ഷ. അഞ്ചുവകുപ്പുകളിലായി ആകെ 25 വര്ഷത്തെ തടവിനാണ് ശിക്ഷിച്ചിരുന്നതെങ്കിലും ശിക്ഷകളെല്ലാം ഒരേകാലയളവില് അനുഭവിച്ചാല് മതിയെന്ന് കോടതി വ്യക്തമാക്കിയിരുന്നു. ശിക്ഷിക്കപ്പെട്ട കിരണ്കുമാര് നിലവില് പൂജപ്പുര സെന്ട്രല് ജയിലിലെ തടവുകാരനാണ്.
കൊല്ലം പോരുവഴിയിലെ ഭര്ത്തൃവീട്ടില് കഴിഞ്ഞ ജൂണ് 21-നാണ് വിസ്മയയെ മരിച്ചനിലയില് കണ്ടെത്തിയത്. സ്ത്രീധനമായി നല്കിയ കാറില് തൃപ്തനല്ലാത്തതിനാലും വാഗ്ദാനംചെയ്ത സ്വര്ണം ലഭിക്കാത്തതിനാലും ശാരീരികമായും മാനസികമായും പീഡിപ്പിച്ചതിനെത്തുടര്ന്ന് വിസ്മയ ജീവനൊടുക്കിയെന്നാണ് കേസ്. മോട്ടോര് വാഹന വകുപ്പിലെ ഉദ്യോഗസ്ഥനായിരുന്ന കിരണിനെ അറസ്റ്റിലായതിന് പിന്നാലെ ജോലിയില്നിന്ന് പിരിച്ചുവിട്ടിരുന്നു.
Content Highlights: vismaya case accused kiran kumar given appeal in high court