ഉത്തരാഖണ്ഡിൽ 16-കാരി കൂട്ടബലാത്സംഗത്തിനിരയായി; ABVP നേതാവുൾപ്പെടെ നാല് വിദ്യാർഥികൾ അറസ്റ്റിൽ

ദെഹ്‌റാദൂൺ: ഉത്തരാഖണ്ഡിലെ ഹൽദ്വാനിയിൽ 16 വയസ്സുള്ള പെൺകുട്ടിയെ കൂട്ടബലാത്സംഗത്തിന് ഇരയാക്കിയ സംഭവത്തിൽ നാല് യുവാക്കളെ പോലീസ് അറസ്റ്റ് ചെയ്തു. പെൺകുട്ടിയുടെ കുടുംബം നൽകിയ പരാതിയുടെ അടിസ്ഥാനത്തിൽ കേസെടുത്ത പോലീസ്, ആറുമണിക്കൂറിനുള്ളിൽ തന്നെ എല്ലാ പ്രതികളെയും പിടികൂടി. സംഭവത്തിൽ വിശദമായ അന്വേഷണം നടന്നുവരികയാണെന്ന് പോലീസ് അറിയിച്ചു.

പ്രതികളിൽ ഒരാൾ കോളേജ് യൂണിയൻ പ്രസിഡന്റ് തിരഞ്ഞെടുപ്പിൽ മത്സരിക്കുകയും വിദ്യാർഥി സംഘടനയായ എ.ബി.വി.പിയുമായി  ബന്ധപ്പെട്ട് പ്രവർത്തിക്കുകയും ചെയ്തിരുന്നുവെന്ന റിപ്പോർട്ടുകളെ തുടർന്ന് സംഭവം രാഷ്ട്രീയ ശ്രദ്ധയും നേടിയിട്ടുണ്ട്. നൈനിറ്റാൾ ജില്ലയിലെ ഹൽദ്വാനി മുഖാനി മേഖലയിൽ നവംബർ 12-ന് രാത്രിയിലാണ് സംഭവം നടന്നത്.

പ്രതികൾ ഭീഷണിപ്പെടുത്തി ഹോട്ടലിലേക്ക് വിളിച്ചുവരുത്തി പീഡിപ്പിച്ചതായാണ് പെൺകുട്ടി നൽകിയ പരാതിയിൽ പറയുന്നത്. ശാരീരിക അസ്വസ്ഥതകൾ വളരെ രൂക്ഷമായ സ്ഥിതിയിലാണ് പെൺകുട്ടി വീട്ടിലെത്തിയത്. വീട്ടുകാർ കാര്യമന്വേഷിച്ചപ്പോഴാണ് പീഡന വിവരം പുറത്തുപറഞ്ഞത്. തുടർന്ന് ബന്ധുക്കൾ മുഖാനി പോലീസ് സ്റ്റേഷനിൽ പരാതി നൽകി.

പിന്നാലെ, മുഖാനി സ്റ്റേഷൻ ഹൗസ് ഓഫീസർ സുശീൽ ജോഷിയുടെ നേതൃത്വത്തിലുള്ള പോലീസ് സംഘം കേസിൽ അന്വേഷണം ആരംഭിച്ചു. ആറ് മണിക്കൂറിനുള്ളിൽ നാല് പ്രതികളെയും അറസ്റ്റ് ചെയ്യുകയും ചെയ്തു. ധീരജ് ബിഷ്ട്, നിതീഷ് പാൽ, അൻഷ് ഖത്രി, ഹിമാൻഷു ഗൗണി എന്നിവർക്കെതിരെയാണ് പോലീസ് കേസെടുത്തിരിക്കുന്നത്.

ഇവർ ഹൽദ്വാനിയിലെ വിവിധ കോളേജുകളിലെ വിദ്യാർത്ഥികളാണെന്ന് പോലീസ് അറിയിച്ചു. പോക്‌സോ നിയമത്തിലെയും കൂട്ടബലാത്സംഗത്തിനെതിരെയുള്ള വകുപ്പുകളുടെയും അടിസ്ഥാനത്തിലാണ് കേസ് രജിസ്റ്റർ ചെയ്തിരിക്കുന്നത് എന്ന് അന്വേഷണ ഉദ്യോഗസ്ഥൻ അറിയിച്ചു. രാത്രി വൈകി പെൺകുട്ടിയുടെ കുടുംബം നൽകിയ പരാതിയുടെ അടിസ്ഥാനത്തിലാണ് കേസ് എടുത്തതെന്ന് നൈനിറ്റാൾ സീനിയർ സൂപ്രണ്ട് ഓഫ് പോലീസ് മഞ്ജുനാഥ് ടി.സി. പറഞ്ഞു.

നാലുപേരെയും അറസ്റ്റ് ചെയ്തിട്ടുണ്ടെന്നും വിശദമായ അന്വേഷണം നടക്കുകയാണെന്നും അദ്ദേഹം വ്യക്തമാക്കി. പ്രതികൾ പ്രദേശികമായി 'ഐടിഐ ഗാങ്' (ITI gang) എന്നറിയപ്പെടുന്ന സംഘവുമായി ബന്ധമുള്ളവരാണെന്നാണ് പോലീസ് വ്യക്തമാക്കുന്നു. പ്രതികളിൽ ഒരാൾക്ക് എ.ബി.വി.പിയുമായി ബന്ധമുണ്ടെന്ന ആരോപണം കോൺഗ്രസിന്റെ വിമർശനത്തിന് വഴിവെച്ചിട്ടുണ്ട്.

എന്നാൽ കുറ്റകൃത്യത്തിൽ ഏതെങ്കിലും സംഘടനയ്ക്ക് പങ്കുള്ളതായി സൂചന ലഭിച്ചിട്ടില്ലെന്ന് പോലീസ് അറിയിച്ചു. നിയമപരമായ സംരക്ഷണത്തിന്റെ ഭാഗമായി, ഇരയായ പെൺകുട്ടിയുടെ വിവരങ്ങൾ പോലീസ് പുറത്തുവിട്ടിട്ടില്ല. കേസിൽ അന്വേഷണം പുരോഗമിക്കുകയാണ്.

Content Highlights: In Haldwani, Uttarakhand, four young men were arrested for the gang rape of a 16-year-old girl, with the police acting swiftly to apprehend the suspects within six hours of the complaint being filed by the victim's family. The incident, which occurred on the night of November 12, gained political attention due to one suspect's involvement with a student organization and a college union election, although no organizational links to the crime have been confirmed. The police have registered the case under the POCSO Act and gang rape charges, with ongoing investigations revealing the suspects' association with a local group known as the 'ITI gang.'