പുണെ അപകടം: രക്തസാമ്പിളില്‍ തിരിമറി, 17-കാരന്റേത് മാറ്റി അമ്മയുടെ രക്തസാമ്പിള്‍ പരിശോധനയ്ക്കയച്ചു

മുംബൈ: പുണെയില്‍ പതിനേഴുകാരന്‍ ഓടിച്ച ആഡംബരകാറിടിച്ച് രണ്ട് യുവ എന്‍ജിനിയര്‍മാര്‍ കൊല്ലപ്പെട്ട സംഭവത്തില്‍ വീണ്ടും ട്വിസ്റ്റ്. കേസില്‍നിന്ന് 17-കാരനെ രക്ഷിക്കാനായി ഡോക്ടര്‍മാര്‍ നടത്തിയ ക്രമക്കേടുകള്‍ സംബന്ധിച്ചാണ് കൂടുതല്‍വിവരങ്ങള്‍ പുറത്തുവരുന്നത്. അപകടത്തിന് പിന്നാലെ പരിശോധനയ്ക്കായി 17-കാരന്റെ രക്തസാമ്പിളുകള്‍ ശേഖരിച്ചെങ്കിലും ഇതില്‍ പിന്നീട് കൃത്രിമം കാട്ടിയതായാണ് റിപ്പോര്‍ട്ട്. 17-കാരന്റെ രക്തസാമ്പിളിന് പകരം അമ്മയുടെ രക്തസാമ്പിള്‍ ഉപയോഗിച്ചാണ് ഡോക്ടര്‍മാര്‍ പരിശോധന നടത്തിയതെന്നും വിവിധ മാധ്യമങ്ങള്‍ റിപ്പോര്‍ട്ട്‌ചെയ്തു. 

മേയ് 19-ന് അപകടം നടന്നതിന് പിന്നാലെ 17-കാരന്‍ മദ്യപിച്ചിരുന്നോ എന്നതടക്കം കണ്ടെത്താനായി ഇയാളെ വൈദ്യപരിശോധനയ്ക്ക് കൊണ്ടുപോയിരുന്നു. തുടര്‍ന്ന് രക്തസാമ്പിളും ശേഖരിച്ചു. എന്നാല്‍, 17-കാരന്റെ പിതാവും ഇടനിലക്കാരനും ഡോക്ടര്‍മാരെ സ്വാധീനിച്ച് വൈദ്യപരിശോധനയില്‍ കൃത്രിമം കാട്ടിയതായാണ് കണ്ടെത്തല്‍. പ്രതിയുടെ രക്തസാമ്പിളിന് പകരം അമ്മയായ ശിവാനി അഗര്‍വാളിന്റെ രക്തസാമ്പിള്‍ ഉപയോഗിച്ചാണ് പരിശോധന നടത്തിയതെന്നും തുടര്‍ന്ന് പ്രതിക്ക് അനുകൂലമായ വൈദ്യപരിശോധനാ ഫലം നല്‍കിയെന്നുമാണ് പോലീസ് പറയുന്നത്. ഇതേത്തുടര്‍ന്ന് സംഭവസമയത്ത് പ്രതി മദ്യപിച്ചിട്ടില്ലെന്ന വൈദ്യപരിശോധന ഫലമാണ് കിട്ടിയതെന്നും പോലീസ് പറയുന്നു. ശിവാനി അഗര്‍വാള്‍ ഈസമയം ആശുപത്രിയിലുണ്ടായിരുന്നതായും റിപ്പോര്‍ട്ടുകളുണ്ട്.സംഭവവുമായി ബന്ധപ്പെട്ട് പുണെ സസൂണ്‍ ജനറല്‍ ആശുപത്രിയിലെ ഫൊറന്‍സിക് വിഭാഗം മേധാവി ഡോ. അജയ് താവഡെ, അത്യാഹിതവിഭാഗത്തിലെ മെഡിക്കല്‍ ഓഫീസര്‍ ഡോ.ശ്രീഹരി ഹല്‍നോര്‍ എന്നിവരെയും ആശുപത്രി ജീവനക്കാരനായ മറ്റൊരാളെയും പോലീസ് അറസ്റ്റ് ചെയ്തിരുന്നു. 

അപകടത്തിന് പിന്നാലെ 17-കാരന്റെ പിതാവായ വിശാല്‍ അഗര്‍വാള്‍ ഒരു ഇടനിലക്കാരന്‍ മുഖേനയാണ് ഡോക്ടര്‍ അജയ് താവഡെയുമായി ബന്ധപ്പെട്ടത്. വിശാലിന്റെ ബംഗ്ലാവില്‍നിന്ന് പിടിച്ചെടുത്ത മൊബൈല്‍ഫോണില്‍നിന്ന് ഇയാള്‍ ഡോക്ടറെ വിളിച്ചതിന്റെ തെളിവ് കണ്ടെടുത്തിരുന്നു. ഇതിനുപുറമേ ഫോണിലെ മറ്റൊരു ആപ്പ് മുഖേന ഇരുപതിലേറെ തവണ ഇയാള്‍ ഡോക്ടറുമായി ബന്ധപ്പെട്ടിരുന്നതായും അന്വേഷണത്തില്‍ കണ്ടെത്തി. 

രക്തസാമ്പിളിലും വൈദ്യപരിശോധനയിലും കൃത്രിമം കാട്ടാനായി ഡോ. അജയ് താവഡെ മൂന്നുലക്ഷം രൂപ നല്‍കിയിരുന്നതായി കൂട്ടുപ്രതിയായ ഡോ.ശ്രീഹരിയും പോലീസിനോട് സമ്മതിച്ചിരുന്നു. ഡോ. ശ്രീഹരിയാണ് 17-കാരന്റെ രക്തസാമ്പിള്‍ ചവറ്റുക്കുട്ടയില്‍ ഉപേക്ഷിച്ചതെന്നും തുടര്‍ന്ന് ഇയാള്‍ തന്നെയാണ് ശിവാനിയുടെ രക്തസാമ്പിള്‍ പകരമായിവെച്ചതെന്നും പോലീസ് പറഞ്ഞു. അതേസമയം, കേസില്‍ ശിവാനി അഗര്‍വാളിനായും പോലീസ് അന്വേഷണം ആരംഭിച്ചതായാണ് വിവരം. എന്നാല്‍, ഇവര്‍ പുണെയില്‍നിന്ന് കടന്നുകളഞ്ഞെന്നാണ് സൂചനയെന്നും പോലീസ് വൃത്തങ്ങളെ ഉദ്ധരിച്ച് വിവിധ മാധ്യമങ്ങള്‍ റിപ്പോര്‍ട്ട് ചെയ്തു. 

മേയ് 19-ന് പുലര്‍ച്ചെ 2.15-ഓടെയാണ് 17-കാരന്‍ ഓടിച്ച പോര്‍ഷെ കാറിടിച്ച് ബൈക്ക് യാത്രക്കാരായ യുവ എന്‍ജിനിയര്‍മാര്‍ കൊല്ലപ്പെട്ടത്. പുണെയിലെ സ്വകാര്യ ഐടി കമ്പനിയിലെ ജീവനക്കാരായ അശ്വിനി കോസ്റ്റ(24) അനീഷ് ആവാഡിയ(24) എന്നിവര്‍ക്കാണ് സംഭവത്തില്‍ ജീവന്‍ നഷ്ടമായത്. പ്ലസ്ടു ജയിച്ചതിന്റെ പാര്‍ട്ടി കഴിഞ്ഞ് മദ്യലഹരിയിലാണ് 17-കാരന്‍ അതിവേഗത്തില്‍ പോര്‍ഷെ കാറില്‍ യാത്രചെയ്തതെന്ന് അന്വേഷണത്തില്‍ കണ്ടെത്തിയിരുന്നു. അതിനിടെ അപകടം നടന്ന് 15 മണിക്കൂറിനുള്ളില്‍ 17-കാരന് ജാമ്യം അനുവദിച്ചത് വ്യാപക വിമര്‍ശനത്തിനിടയാക്കി. റോഡപകടങ്ങളെക്കുറിച്ച് ഉപന്യാസം എഴുതുക, രണ്ടാഴ്ച ട്രാഫിക് പോലീസിനൊപ്പം പ്രവര്‍ത്തിക്കുക, കൗണ്‍സിലിങ്ങിന് വിധേയമാവുക തുടങ്ങിയ ഉപാധികളോടെയാണ് 17-കാരന് ജാമ്യം അനുവദിച്ചിരുന്നത്. ഇത് വാര്‍ത്തായയതോടെ പുണെ അപകടം ദേശീയശ്രദ്ധ നേടി. പിന്നാലെ സംഭവം ഒതുക്കിതീര്‍ക്കാന്‍ ശ്രമിച്ച 17-കാരന്റെ പിതാവും മുത്തച്ഛനും ഉള്‍പ്പെടെയുള്ളവര്‍ അറസ്റ്റിലായി. പ്രതിയായ 17-കാരന്റെ ജാമ്യം റദ്ദാക്കി. 17-കാരന്‍ ഉള്‍പ്പെടെയുള്ളവര്‍ക്ക് മദ്യം വിളമ്പിയ പബ്ബ് ജീവനക്കാരും ഉടമകളും പിടിയിലായി. ഇതിനുപിന്നാലെയാണ് ജനറല്‍ ആശുപത്രിയിലെ ഡോക്ടര്‍മാരും കേസില്‍ അറസ്റ്റിലായത്. 

Content Highlights: pune porsche accident case accused blood sample swapped with his mother blood sample