ലോക്കപ്പിന്റെ കുറ്റിതകർത്ത് രക്ഷപ്പെട്ട പ്രതി പിടിയിൽ; സംഭവം കൊല്ലം റെയിൽവേ സ്റ്റേഷനിൽ
കൊല്ലം: റെയിൽവേ പോലീസ് സ്റ്റേഷനിലെ ലോക്കപ്പിന്റെ കുറ്റിതകർത്ത് രക്ഷപ്പെട്ട പ്രതി പിടിയിലായി. വടക്കേക്കര കൽപ്പടിക്കൽ പുത്തൻവീട്ടിൽ അബ്ദുൽ സലാം (38) ആണ് ചൊവ്വാഴ്ച രാത്രി കേരളപുരത്തിനു സമീപം മാമൂട്ടിലുള്ള സഹോദരന്റെ വീട്ടിൽനിന്നും റെയിൽവേ പോലീസിന്റെ പിടിയിലായത്.
തമിഴ്നാട് ഉൾപ്പെടെയുള്ള ഇടങ്ങളിൽ മോഷണക്കേസുകളിൽ പ്രതിയായ അബ്ദുൾ സലാം ഞായറാഴ്ച രാത്രി സ്റ്റേഷൻ പരിസരത്തുനിന്നു കഞ്ചാവുമായാണ് പിടിയിലായത്. ഇയാൾക്കെതിരേ പോലീസിനെ ആക്രമിച്ച കേസുമുണ്ട്.
കോടതിയിൽ ഹാജരാക്കാനായി ലോക്കപ്പിൽ പാർപ്പിച്ചുവരുന്നതിനിടെ തിങ്കളാഴ്ച ഉച്ചയോടെ കൊല്ലം റെയിൽവേ സ്റ്റേഷൻ ലോക്കപ്പിൽനിന്ന് ചാടിപ്പോകുകയായിരുന്നു. ചൊവ്വാഴ്ച ഇയാൾ വീട്ടിലെത്തി മടങ്ങിയതായി പോലീസിനു വിവരം ലഭിച്ചിരുന്നു. ഉച്ചമുതൽ പലപ്പോഴായി പോലീസിന്റെ സാന്നിധ്യംകണ്ട് ഇയാൾ വിവിധ സ്ഥലങ്ങളിൽനിന്നു കടന്നു. ജില്ല വിട്ടുപോയിട്ടില്ലെന്ന കണക്കുകൂട്ടലിൽ നിരീക്ഷണം ശക്തമാക്കിയിരിക്കെയാണ് രാത്രി എട്ടോടെ സാഹസികമായി പോലീസ് പിടികൂടിയത്. തുടർന്ന് ഇയാളെ റെയിൽവേ പോലീസ് സ്റ്റേഷനിലെത്തിച്ചു.
തിരുവനന്തപുരം ഐ.ആർ.പി. ജി.എസ്. സജിയുടെ നേതൃത്വത്തിൽ കൊല്ലം എസ്.എച്ച്.ഒ. ശ്യാമകുമാരി, പുനലൂർ എസ്.എച്ച്.ഒ. പി.കെ. പ്രദീപ്, സി.പി.ഒ.മാരായ ധനീഷ്, രതീഷ്, ബിജു, ബർണബാസ്, ആൽബി, റോജൻ, ലിനു തുടങ്ങിയവരടങ്ങുന്ന സംഘമാണ് പ്രതിയെ പിടികൂടിയത്.