90 ദിവസം, 100 കോടിയുടെ ലഹരിവസ്തുക്കള്, കരിപ്പൂര് ലഹരിക്കടത്തിന് താവളം; എന്താണീ ഹൈബ്രിഡ്?
കരിപ്പൂര്: കരിപ്പൂര് വിമാനത്താവളത്തില് ലഹരിക്കടത്ത് മാഫിയ പിടിമുറുക്കുന്നു. മൂന്ന് മാസത്തിനിടെ നാല് ലഹരിക്കടത്ത് കേസുകളാണ് റിപ്പോര്ട്ട് ചെയ്തത്. ഹൈബ്രിഡ് കഞ്ചാവിന് പുറമേ ഇ-ലഹരി വസ്തുക്കളും രാസലഹരികളും സ്റ്റിറോയ്ഡുകളടങ്ങിയ രാസലഹരികളും, ലഹരിമിഠായികളും വരെ കള്ളക്കടത്തിലുണ്ടായിരുന്നു. 100 കോടി രൂപയിലധികം വിലവരുന്ന ലഹരിക്കടത്താണ് പിടികൂടിയത്. സ്വര്ണക്കടത്തില് ഒരു വര്ഷം 180 കോടിയാണ് ഏറ്റവും ഉയര്ന്ന തുക. ഇതിലുമധികം ലഹരിവസ്തുക്കള് പിടിക്കപ്പെടാതെ പുറത്തെത്തിയതായാണ് ആശങ്ക.
സ്വര്ണക്കടത്ത് ലാഭകരമല്ലാതായതോടെയാണ് കള്ളക്കടത്ത് സംഘങ്ങള് ലഹരിക്കടത്തിലേക്ക് തിരിഞ്ഞതെന്നാണ് കസ്റ്റംസ് കരുതുന്നത്. ഒരു കിലോ സ്വര്ണം കടത്തുമ്പോള് ലഭിക്കുന്ന ലാഭം പരമാവധി ഏഴുലക്ഷം രൂപ വരെയായിരുന്നു. എന്നാല് രാജ്യത്ത് നികുതി കുറച്ചതോടെ ഇത് മൂന്നു ലക്ഷത്തില് താഴെയായി. വാഹകര്ക്കും സംഘത്തിലെ മറ്റ് അംഗങ്ങള്ക്കും വീതംവെച്ച് കഴിയുംമ്പോള് കള്ളക്കടത്ത് നേതാക്കന്മാര്ക്ക് വലിയ നേട്ടം ലഭിക്കാത്ത അവസ്ഥ. എന്നാല് ലഹരിക്കടത്തില് ലാഭം പത്തിരട്ടിയാണ്.
വിദേശത്ത് 10 ലക്ഷം രൂപ വിലവരുന്ന ഒരു കിലോ ഹൈബ്രിഡ് കഞ്ചാവ് ഇന്ത്യയിലേക്ക് കടത്തുമ്പോള് വിപണിമൂല്യം ഒരു കോടിയോളമായി മാറും. 90 ലക്ഷത്തിന്റെ ലാഭമാണ് മയക്കുമരുന്ന് മാഫിയയ്ക്ക് ലഭിക്കുന്നത്. കസ്റ്റംസിന്റെ എക്സ്റേ പരിശോധനയില് ഇവ കണ്ടെത്താന് എളുപ്പമല്ലെന്നതാണ് കള്ളകടത്തുകാര്ക്ക് അനുഗ്രഹമാകുന്നത്. സ്വര്ണക്കടത്തില് എക്സ്റേയില് ലഭിക്കുന്ന രൂപങ്ങളും വസ്തുക്കള്ക്ക് വരുന്ന ഭാരവ്യത്യാസവുമാണ് സ്വര്ണക്കടത്ത് പിടിക്കാന് സഹായകമാകുന്നത്.
എന്നാല് ലഹരിവസ്തുക്കളുടെ കാര്യത്തില് ഈ രണ്ട് സാധ്യതകളും വളരെ കുറവാണ്. അതിനാല്ത്തന്നെ കരിപ്പൂരില് സജീവമായിരുന്ന സ്വര്ണക്കടത്ത് മാഫിയ ലഹരിക്കടത്തിലേക്ക് ചുവട് മാറ്റിയതായാണ് കസ്റ്റംസ് സംശയിക്കുന്നത്. ആഗോളതലത്തില് തീവ്രവാദ പ്രവര്ത്തനങ്ങളുടെ മുഖ്യ വരുമാനസ്ത്രോതസ്സാണ് മയക്കുമരുന്ന് വ്യാപാരം. അതിനാല് തീവ്രവാദ പ്രസ്ഥാനങ്ങള്ക്ക് ലഹരിക്കടത്ത് സംഘങ്ങളുമായി ബന്ധമുണ്ടോയെന്നും അന്വേഷണ ഏജന്സികള് പരിശോധിക്കുന്നുണ്ട്.
സ്കാനിങ്ങില് ലഹരി മരുന്ന് കണ്ടെത്താന് സംവിധാനമില്ല
ഉപകരണങ്ങളുടെ സഹായത്തോടെ ലഹരിമരുന്നുകള് കണ്ടെത്തുന്നതിന് വിമാനത്താവളങ്ങളില് സംവിധാനമില്ലാത്താണ് മാഫിയകള്ക്ക് ധൈര്യമേകുന്നത്. ലഗേജ് സ്കാന് ചെയ്താല് ഭക്ഷ്യവസ്തുക്കളുടെ പ്രതിബിംബമാണ് ലഹരിമരുന്നുകള്ക്കും ലഭിക്കുക. അതുകൊണ്ട് പരിശോധനാ വേളയില് ലഹരി വസ്തുക്കള് കണ്ടെത്താന് എളുപ്പമല്ല.
കഴിഞ്ഞദിവസം ലഹരി മരുന്ന് പിടികൂടാനായത് രഹസ്യ വിവരത്തിന്റെ അടിസ്ഥാനത്തിലാണ്. അതിവിദഗ്ധമായാണ് രാസ ലഹരിമരുന്ന് മിഠായികളിലും കേക്ക്, ബിസ്കറ്റുകള് എന്നിവയിലും കലര്ത്തിയത്. ബ്രാന്ഡഡ് മിഠായികളില് തിരിച്ചറിയാന് കഴിയാത്ത വിധമാണ് ലഹരിമരുന്നുണ്ടായിരുന്നത്. വിശദ പരിശോധന നടത്തിയാണ് കസ്റ്റംസ് ലഹരിമരുന്നിന്റെ സാന്നിധ്യം ഉറപ്പാക്കിയത്.
എന്താണീ ഹൈബ്രിഡ്?
ഹൈഡ്രോപോണിക് സംവിധാനത്തില് ആധുനിക രീതിയില് വളര്ത്തിയെടുക്കുന്ന കഞ്ചാവാണ് ഹൈബ്രിഡ് കഞ്ചാവ്. മണ്ണ് ഉപയോഗിക്കാതെ വെള്ളം അടിസ്ഥാനമാക്കി, പോഷക ലായനികളില് കഞ്ചാവ് വളര്ത്തുന്ന രീതിയാണിത്. ഹൈഡ്രോപോണിക് സംവിധാനങ്ങള് സസ്യങ്ങള്ക്ക് നേരിട്ട് പോഷകങ്ങളും വെള്ളവും നല്കുന്നു. ഇത് വേഗത്തിലുള്ള വളര്ച്ചയ്ക്കും ഉയര്ന്ന വിളവിനും വഴിയൊരുക്കുന്നു.
ഇത്തരത്തില് വളര്ത്തി വിളവെടുക്കുന്ന കഞ്ചാവിന് സാധാരണ കഞ്ചാവിനേക്കാള് വീര്യം വളരെ കൂടുതലാണ്. അതുകൊണ്ടു തന്നെ ഇതിന് ആവശ്യക്കാരും കൂടുതലാണെന്ന് എക്സൈസ് ഉദ്യോഗസ്ഥര് പറയുന്നു. ആഭ്യന്തര വിപണിയില് ഗ്രാമിന് 5000 മുതല് 8000 രൂപ വരെയാണ് ഇതിനു വില.
Content Highlights: karipur becomes hybrid ganja hub of kerala police seized 100 crores ganja in 90 days