‘അടിക്കല്ലെടാ’; കാലുപിടിച്ച് കരഞ്ഞിട്ടും നിർത്തിയില്ല, ഇരട്ടപ്പേര് വിളിച്ചതിന് 16-കാരന് ക്രൂരമർദനം

കല്പറ്റ: വയനാട് കൽപ്പറ്റയിൽ 16 വയസ്സുകാരനുനേരെ വിദ്യാർഥികളുടെ ക്രൂരമർദനം. പതിനാറുകാരനെ ഫോണിൽ വിളിച്ചുവരുത്തി വിദ്യാർഥികളായ ഒരുകൂട്ടം മർദിക്കുകയായിരുന്നു. മുഖത്തും പുറത്തും ഉൾപ്പെടെ ക്രൂരമായി മർദിക്കുന്നതിന്റേയും കാലിൽ പിടിച്ച് മാപ്പ് പറയിപ്പിക്കുന്നതിന്റേയും ദൃശ്യങ്ങൾ പുറത്തുവന്നു. വിദ്യാർഥികളിലൊരാളെ പോലീസ് കസ്റ്റഡിയിലെടുത്ത് ജുവനൈൽ ജസ്റ്റിസ് ഹോമിലേക്ക് മാറ്റി.

കഴിഞ്ഞ ദിവസം രാത്രിയാണ് കൽപ്പറ്റ പോലീസിന് ഈ ദൃശ്യം ലഭിക്കുന്നത്. ഇരട്ടപ്പേര് വിളിച്ചെന്നും മോശം വാക്കുകൾ ഉപയോഗിച്ചെന്നും ആരോപിച്ചാണ് കുട്ടിയെ വിളിച്ചുവരുത്തി സംഘം ആക്രമിച്ചത്. അഞ്ചു മിനിറ്റോളം നീണ്ടതാണ് വീഡിയോ. മർദനം സഹിക്കവയ്യാതെ കുട്ടി മാപ്പു പറയുന്നതും കാലുപിടിക്കുന്നതും ദൃശ്യങ്ങളിലുണ്ട്. എന്നിട്ടും മർദനം തുടർന്നുകൊണ്ടിരുന്നു. അടിക്കല്ലെടാ, മതിയെടാ എന്നൊക്കെ പലതവണ പറഞ്ഞെങ്കിലും നീ കരഞ്ഞിട്ടൊന്നും കാര്യമില്ലെന്ന് പറഞ്ഞ് മറ്റുള്ളവർ അടി തുടർന്നുകൊണ്ടിരുന്നു.

ദൃശ്യം പകർത്തുന്ന കുട്ടി മർദിച്ചത് മതിയെന്ന് ആവശ്യപ്പെടുന്നുണ്ടെങ്കിലും കൂടെയുള്ളവർ അതിന് തയ്യാറാവുന്നില്ല. മർദകരിൽ ഒരാളെ ശനിയാഴ്ച രാത്രി തന്നെ പോലീസ് കസ്റ്റഡിയിലെടുത്ത് സിഡബ്ല്യുസിക്ക് മുന്നിൽ ഹാജരാക്കി ജുവനൈൽ ജസ്റ്റിസ് ഹോമിലേക്ക് മാറ്റി. മറ്റു കുട്ടികളെ ഹാജരാക്കാൻ രക്ഷിതാക്കളോട് ആവശ്യപ്പെട്ടിട്ടുണ്ട്.

Content Highlights: Violent Student Assault on 16-Year-Old in Wayanad: Disturbing Video Surfaces