കോഴിഫാമിൽ 'ബ്രേക്കിംഗ് ബാഡ്' മോഡൽ മയക്കുമരുന്ന് നിർമാണ കേന്ദ്രം; പൊളിച്ചടുക്കി തെലങ്കാന പോലീസ്

ഹൈദരാബാദ്: തെലങ്കാനയിലെ ഹൈദരാബാദിന് സമീപം കോഴിഫാം കേന്ദ്രമാക്കി പ്രവർത്തിച്ചിരുന്ന വൻ മയക്കുമരുന്ന് നിർമ്മാണ ശാല പോലീസ് തകർത്തു. നെറ്റ്ഫ്‌ളിക്‌സിലെ പ്രശസ്തമായ 'ബ്രേക്കിംഗ് ബാഡ്' (Breaking Bad) സീരീസിനെ അനുസ്മരിപ്പിക്കും വിധം അതീവ രഹസ്യമായാണ് ഈ ലാബ് പ്രവർത്തിച്ചിരുന്നത്. മഹബൂബ് നഗറിലെ അണ്ണാസാഗർ ഗ്രാമത്തിന് പുറത്തുള്ള ഒരു കോഴിഫാമിൽ സജ്ജീകരിച്ചിരുന്ന ഈ കേന്ദ്രത്തിൽ നിന്ന് നാലുപേരെ പോലീസ് അറസ്റ്റ് ചെയ്തു. ആളുകളുടെ ശ്രദ്ധയിൽപ്പെടാതിരിക്കാൻ ഒരു കോഴിഫാമിനുള്ളിലായിരുന്നു ഈ മയക്കുമരുന്ന് ലാബ് പ്രവർത്തിച്ചിരുന്നത്. 18 പ്ലാറ്റ്ഫോമുകളും, അൽപ്രാസോളം (Alprazolam) എന്ന മരുന്ന് നിർമ്മാണത്തിന് ആവശ്യമായ റൗണ്ട്-ബോട്ടം ഫ്‌ലാസ്‌കുകളും അത്യാധുനിക ഉപകരണങ്ങളും ഇവിടെ സജ്ജീകരിച്ചിരുന്നു.

നിയന്ത്രിത രാസവസ്തുക്കളുടെ വിഭാഗത്തിൽ വരുന്നതാണ് അൽപ്രാസോളം. പ്രധാനമായും ഉത്കണ്ഠ, പരിഭ്രമം (Panic disorders) എന്നിവയുടെ ചികിത്സയ്ക്കായി ഡോക്ടർമാർ നിർദ്ദേശിക്കുന്ന ഒരു മരുന്നാണിത്. ഡോക്ടർമാരുടെ കുറിപ്പടി ഇല്ലാതെ ഇവ വിൽക്കാനോ, വാങ്ങാനോ ഉപയോഗിക്കാനോ അനുമതി ഇല്ല.

ഈ മരുന്ന് തുടർച്ചയായി കഴിച്ചാൽ ഇതിന് അടിമപ്പെടാൻ വലിയ സാധ്യതയുണ്ട്. അതിനാലാണ് ഇതിന് നിയന്ത്രണം ഏർപ്പെടുത്തിയിരിക്കുന്നത്. ഇതുപയോഗിച്ചാൽ മസ്തിഷ്‌കത്തിലെയും നാഡീവ്യൂഹത്തിലെയും പ്രവർത്തനങ്ങളെ മന്ദഗതിയിലാകുന്നതിന് കാരണമാകും.

മയക്കുമരുന്ന് നിർമ്മാണ ശൃംഖലയുടെ സൂത്രധാരനായ 39 വയസ്സുകാരൻ മാലേല ജയപ്രകാശ് ഗൗഡാണ് അറസ്റ്റിലായ പ്രധാനി. ഇയാൾ ഇതിന് മുൻപും മയക്കുമരുന്ന് നിർമ്മാണത്തിന് പിടിയിലായിട്ടുണ്ട്. 2025 സെപ്റ്റംബറിൽ ഒരു സ്‌കൂളിനുള്ളിൽ ലാബ് നടത്തിയതിനാണ് ഇയാൾ മുൻപ് അറസ്റ്റിലായത്.

മുൻപത്തെ കേസിൽ ജുഡീഷ്യൽ കസ്റ്റഡിയിലായിരുന്ന ഗൗഡ് 2026 മാർച്ച് 16-നാണ് ഉപാധികളോടെ ജാമ്യത്തിലിറങ്ങിയത്. എന്നാൽ ജാമ്യം ലഭിച്ച് രണ്ട് മാസത്തിനുള്ളിൽ തന്നെ ഇയാൾ കൂടുതൽ വലിയ തോതിൽ മയക്കുമരുന്ന് നിർമ്മാണം പുനരാരംഭിക്കുകയായിരുന്നു.

തെലങ്കാന പോലീസിന്റെ കീഴിൽ പ്രവർത്തിക്കുന്ന പ്രത്യേക മയക്കുമരുന്ന് വിരുദ്ധ സേനയായ 'ഈഗിൾ ഫോഴ്‌സ്' (EAGLE Force) നടത്തിയ റെയ്ഡിൽ ഏകദേശം 20.30 ലക്ഷം രൂപ വിലമതിക്കുന്ന 1.15 കിലോ അൽപ്രാസോളം മയക്കുമരുന്നും ഇത് നിർമിക്കാനായി ഉപയോഗിക്കുന്ന രാസവസ്തുക്കളും പിടിച്ചെടുത്തു. മയക്കുമരുന്ന് നിർമ്മാണത്തിന് ആവശ്യമായ രാസവസ്തുക്കൾ എത്തിച്ചുനൽകിയ തിലക് റോഡിലെ പ്രിൻസ് സയന്റിഫിക് ഫാർമ ഉടമ മിർസയെയും പോലീസ് ജൂലൈ 29-ന് അറസ്റ്റ് ചെയ്തു.

സ്ഥിരം കുറ്റവാളിയായ ജയപ്രകാശ് ഗൗഡിനെ വിചാരണ കൂടാതെ ഒരു വർഷം വരെ തടങ്കലിൽ വെക്കാൻ അനുവദിക്കുന്ന പിഐടി-എൻഡിപിഎസ് (PIT-NDPS) നിയമപ്രകാരം നടപടിയെടുക്കുന്നത് പോലീസ് ആലോചിക്കുന്നുണ്ട്. കർശനമായ രേഖകളില്ലാതെ നിയന്ത്രിത രാസവസ്തുക്കൾ വിൽക്കുന്ന വ്യാപാരികൾക്കെതിരെ ശക്തമായ നടപടിയുണ്ടാകുമെന്ന് അന്വേഷണ ഉദ്യോഗസ്ഥർ മുന്നറിയിപ്പ് നൽകി.

Content Highlights: Police discovered a high-tech drug lab hidden inside a poultry farm in Mahbubnagar., The lab was producing Alprazolam, a controlled substance used for panic disorders., Main suspect Jayaprakash Gouda, a repeat offender, was arrested shortly after his release on bail in March 2026., EAGLE Force seized 1.15 kg of Alprazolam worth 20.30 lakh rupees., Authorities are considering invoking the PIT-NDPS Act to detain the suspect for one year.