അധോലോക തലവന്റെ ഭാര്യയുമായി സഹായിക്ക് പ്രണയം; ഭാര്യ മരണപ്പെട്ടപ്പോള്, സഹായിയെ കൊല്ലാനിറങ്ങി 40 പേര്
നാഗ്പൂര്: നഗരത്തില് ഭീതി പരത്തി കുപ്രസിദ്ധ അധോലോക സംഘമായ ഇപ്പാ ഗാങ്. സിനിമാ കഥകളെ വെല്ലുന്ന സംഭവവികാസങ്ങളാണ് മധ്യ നാഗ്പൂരില് അരങ്ങേറിയിരിക്കുന്നത്. സംഘത്തിന്റെ തലവന്റെ ഭാര്യയും സംഘാംഗം അര്ഷാദ് ടോപിയും തമ്മിലുള്ള പ്രണയമാണ് പ്രശ്നങ്ങള്ക്ക് തുടക്കം.
കാമഠിയിലെ ഇപ്പാ ഗാങില് വര്ഷങ്ങളായി പ്രവര്ത്തിക്കുന്നയാളാണ് അര്ഷാദ് ടോപി. കഴിഞ്ഞ വെള്ളിയാഴ്ച അര്ഷാദ് കാമുകിയെ കാണാനും ഒരുമിച്ച് സമയം ചെലവഴിക്കാനും നഗരത്തിലെത്തി. ഇരുവരും ബൈക്കില് യാത്ര ചെയ്യവേ ഒരു ജെസിബി വന്ന് ഇടിച്ചു. റോഡിലേക്ക് ഇരുവരും തെറിച്ച് വീണതോടെ യുവതിക്ക് ഗുരുതരമായി പരിക്കേറ്റു. അപകടത്തില് അര്ഷാദിന് നിസ്സാര പരിക്കുകള് മാത്രമേ ഉണ്ടായിരുന്നുള്ളൂ. പരിഭ്രമിച്ച ഇയാള് സംഭവസ്ഥലത്ത് നിന്ന് രക്ഷപ്പെടുകയും ചെയ്തു.
സംഭവസ്ഥലത്തെത്തിയ ഒരു പെട്രോള് വാഹനം പരിക്കേറ്റ് കിടക്കുന്ന യുവതിയെ ആശുപത്രിയിലേക്ക് കൊണ്ടുപോയി. ആദ്യം രണ്ട് സ്വകാര്യ ആശുപത്രികളില് പ്രവേശിപ്പിക്കാന് ശ്രമിച്ചുവെങ്കിലും അവര് അവിടെ പ്രവേശനം നല്കിയില്ല. ഇപ്പോഴേക്കും അര്ഷാദ് അവിടെ എത്തുകയും ഒരു ആംബുലന്സ് ഡ്രൈവറുടെ സഹായത്തോടെ നാഗ്പൂരിലെ സര്ക്കാര് മെഡിക്കല് കോളേജില് പ്രവേശിപ്പിക്കുകയും ചെയ്തു. എന്നാല്, ആരോഗ്യനില തീരെ മോശമായ യുവതി വെള്ളിയാഴ്ച രാവിലെ മരണത്തിന് കീഴടങ്ങി.
ഭാര്യയുടെ പ്രണയബന്ധവും മരണവാര്ത്തയും അറിഞ്ഞ സംഘത്തലവന്, പ്രതികാരമായി അര്ഷാദിനെ കൊല്ലാൻ സഹായികളോട് ആവശ്യപ്പെട്ടു. തന്റെ ഭാര്യ അപകടത്തില് മരിച്ചതല്ലെന്നും അര്ഷാദ് കൊലപ്പെടുത്തിയതാണെന്നും നേതാവ് സംശയിച്ചു. 40 പേര് അടങ്ങുന്ന സംഘം തന്നെ തേടി നഗരത്തില് ചുറ്റിക്കറങ്ങുന്നുവെന്ന് മനസ്സിലാക്കിയ അര്ഷാദ് ഉടന് തന്നെ നാഗ്പൂര് ഡിസിപി നികേതന് കദമിന് മുന്നില് അഭയം തേടി. സാഹചര്യത്തിന്റെ ഗൗരവം കണക്കിലെടുത്ത് ഡിസിപി അദ്ദേഹത്തെ കൊറാഡി പോലീസ് സ്റ്റേഷനിലേക്ക് അയച്ചു. അവിടെയെത്തിയ അര്ഷാദ് പോലീസിന് മൊഴി നല്കി.
സ്ത്രീയുടെ മരണത്തില് അര്ഷാദിന് പങ്കില്ലെന്നും അപകടമാണെന്നുമുള്ള നിഗമനത്തിലാണ് പോലീസ്. കഴിഞ്ഞ ദിവസം പോലീസ് സ്റ്റേഷനില് നിന്ന് പുറത്തിറങ്ങിയ ഇയാള് ഇപ്പോള് ഒളിവിലാണ്.
Content Highlights: Nagpur Underworld On Edge After Woman’s Mystery Death, Wife of leader, lover of gang member