സിനഗോഗ് തീയിട്ടതിന് പിന്നിൽ ബിഷ്ണോയ് സംഘമോ? എബിൻ പോൾ ‘ലോറൻസ് ബിഷ്ണോയി’ ഗ്രൂപ്പംഗമെന്ന് സൂചന

കൊച്ചി: എറണാകുളം മാർക്കറ്റിലെ ജൂത ആരാധനാലയമായ കടവുംഭാഗം സിനഗോഗിന് മുന്നിൽ തീയിട്ട കേസിലെ പ്രതി എബിന് ലോറൻസ് ബിഷ്‌ണോയി സംഗവുമായി ബന്ധമുള്ളതായി സംശയം. ലോറൻസ് ബിഷ്‌ണോയി ഗ്രൂപ്പിന്റെ പേരിലുള്ള ടെലിഗ്രാം ഗ്രൂപ്പ് അംഗമാണ് എബിൻ. ഗ്രൂപ്പിലെ 'ബോസ്' എന്ന ഐഡിയിൽ നിന്നുള്ള നിർദേശ തുടർന്നാണ് സിനഗോഗിന് മുന്നിൽ തീയിട്ടത്. ബോസ് ആരാണെന്നത് സംബന്ധിച്ച് പോലീസിന് ഇതുവരെ കണ്ടെത്താനായിട്ടില്ല. ബോസിന് ബിഷ്‌ണോയി സംഘവുമായി ബന്ധമുണ്ടെന്നാണ് സംശയിക്കുന്നത്. ബോസ് നൽകിയ നിർദേശപ്രകാരമാണ് എബിൻ പോൾ സിനഗോഗിന് മുന്നിൽ തീയിട്ടത്. കേസിൽ കൂടുതൽ അന്വേഷണത്തിലാണ് പോലീസ്.

ഞായറാഴ്ച എബിൻ പോളിനെ തെളിവെടുപ്പിനായി എത്തിച്ചിരുന്നു. ജൂതപ്പള്ളി പരിസരം, ലൈറ്ററും പടക്കവും വാങ്ങിയ തൃപ്പൂണിത്തുറയിലെ കട, പെട്രോൾ വാങ്ങിയ പുത്തൻകുരിശിലെ പമ്പ് എന്നിവിടങ്ങളിലെത്തിച്ചായിരുന്നു തെളിവെടുപ്പ്. സിനഗോഗിന് മുന്നിലെ ഹോർട്ടിക്കൾച്ചർ നഴ്‌സറിയിലായിരുന്നു തെളിവെടുപ്പ്.

വ്യാപാരസ്ഥാപനങ്ങളിലെ ജീവനക്കാർ പ്രതിയെ തിരിച്ചറിഞ്ഞിട്ടുണ്ട്. ജൂതപ്പള്ളിക്കുമുൻപിലെ ബാനറുകളും ഫ്‌ലക്‌സുകളുമുൾപ്പെടെ തീയിട്ടതെങ്ങനെയെന്ന് എബിൻ വിശദീകരിച്ചു. തുടർന്ന് തൃപ്പൂണിത്തുറയിലെ കടകൾ, പുത്തൻകുരിശിലെ പെട്രോൾ പമ്പ് എന്നിവിടങ്ങളിലെത്തിച്ചു. പെട്രോൾ, ലൈറ്റർ എന്നിവ വാങ്ങിയ കടകൾ എബിൻ പോലീസ് ഉദ്യോഗസ്ഥർക്ക് കാണിച്ചുകൊടുത്തു.

അതിനിടെ എബിന്റെ പക്കൽനിന്ന് പിടിച്ചെടുത്ത ഡിജിറ്റൽ ഉപകരണങ്ങളുടെ ഫൊറൻസിക് പരിശോധന തുടരുകയാണ്. ഇതിന്റെ റിപ്പോർട്ട് അന്വേഷണസംഘത്തിന് ലഭിക്കാൻ ഇനിയും കാത്തിരിക്കണം. എബിന്റെ ടെലഗ്രാം ചാറ്റുകളെക്കുറിച്ച് വിവരം ശേഖരിക്കുന്നതിന്റെ ഭാഗമായി ടെലഗ്രാമിന് പോലീസ് കത്തയച്ചിട്ടുണ്ട്. അവിടെ നിന്നുള്ള മറുപടിയും ലഭിക്കേണ്ടതുണ്ട്. മൂവാറ്റുപുഴയിലെ യൂസ്ഡ് കാർ ഷോറൂമിൽ തീയിട്ടതിന് 5,000 രൂപയും സിനഗോഗിന് മുന്നിൽ തീയിട്ടതുമായി ബന്ധപ്പെട്ട് രണ്ടുലക്ഷം രൂപ മൂല്യമുള്ള ക്രിപ്‌റ്റോ കറൻസിയും ഇയാൾ സ്വീകരിച്ചതായി മൊഴി നൽകിയിട്ടുണ്ടെന്ന് പോലീസ് പറഞ്ഞു.

കസ്റ്റഡി കാലാവധി അവസാനിക്കുന്ന തിങ്കളാഴ്ച പ്രതിയെ വീണ്ടും കോടതിയിൽ ഹാജരാക്കും. പ്രതിയെ വീണ്ടും കസ്റ്റഡിയിൽവാങ്ങി ചോദ്യം ചെയ്യുന്നതിനെക്കുറിച്ചും അന്വേഷണസംഘം ആലോചിക്കുന്നുണ്ട്. എൻ.ഐ.എ., ഐ.ബി. ഉദ്യോഗസ്ഥരുമായി കൂടിയാലോചിച്ചശേഷമാകും വീണ്ടും കസ്റ്റഡിയിൽ വാങ്ങുക. സിനഗോഗിന് തീയിട്ടത് 'ബോസി'ന്റെ നിർദേശപ്രകാരമാണെന്ന് എബിൻ പറയുമ്പോഴും അത് ആരെന്ന് കണ്ടെത്താനായിട്ടില്ല.

Content Highlights: Accused Ebin Paul is a member of a Telegram group linked to the Lawrence Bishnoi gang., Arson was carried out following instructions from a 'Boss' ID on Telegram., Ebin received crypto currency and cash for committing arson attacks in Ernakulam and Muvattupuzha., Police are awaiting forensic reports and Telegram chat details for further investigation.