'നീ അങ്കിൾ എന്ന് വിളിച്ച അയാൾ ജയിലിൽ കിടന്ന് മരിക്കും': 10 വയസുകാരിയായ അതിജീവിതയ്ക്ക് സന്ദേശവുമായി ജഡ്ജി

ന്യൂഡൽഹി: നീതിപീഠത്തിന്റെ കർശനമായ നിയമഭാഷകൾക്കപ്പുറം, പീഡനത്തിന് ഇരയായ ഒരു പത്തുവയസുകാരിയുടെ മനസ്സിലെ ഭീതിയകറ്റാൻ നീതിദേവത തന്നെ ആശ്വാസത്തിന്റെയും പ്രത്യാശയുടെയും വചനങ്ങളുമായി ഇറങ്ങിവരുന്ന അപൂർവവും വികാരനിർഭരവുമായ ഒരു സംഭവത്തിനാണ് ഡൽഹി ഹൈക്കോടതി സാക്ഷ്യം വഹിച്ചത്. ഏഴാം വയസിൽ 'അങ്കിൾ' എന്ന് വിളിച്ചിരുന്ന ആളിൽ നിന്ന് അതിക്രൂരമായ ലൈംഗിക അതിക്രമം നേരിടേണ്ടി വന്ന, ഇപ്പോൾ പത്ത് വയസുള്ള പെൺകുട്ടിക്ക് ശിക്ഷാവിധിക്കൊപ്പം വിചാരണക്കോടതി ജഡ്ജി എഴുതിയ വ്യക്തിപരമായ സന്ദേശം നിയമലോകത്തും പൊതുസമൂഹത്തിലും വലിയ ശ്രദ്ധ നേടുകയാണ്.

'അങ്കിൾ വയസനാകുന്നത് വരെ ജയിലിൽ കിടക്കണം' എന്ന ആ കുഞ്ഞിന്റെ അപേക്ഷ കേട്ട രോഹിണി കോടതിയിലെ പോക്സോ ജഡ്ജി രജനി രംഗ, വിധിന്യായത്തിനൊടുവിൽ നിയമത്തിന്റെ സാങ്കേതിക വാക്കുകൾ മാറ്റിവെച്ച് അവൾക്കായി ഒരു സന്ദേശമെഴുതി: 'നീ അങ്കിൾ എന്ന് വിളിച്ചയാൾ ഇനി ഒരിക്കലും സ്വതന്ത്രനായി പുറത്തിറങ്ങില്ല. അയാൾ ആ കൂട്ടിൽ കിടന്ന് തന്നെ മരിക്കും.' പ്രതിയായ സുമിത് ശാക്യയ്ക്ക് ജീവിതകാലം മുഴുവൻ കഠിനതടവ് വിധിച്ച കോടതി, ആ കൊച്ചുകുട്ടിയുടെ സമാനതകളില്ലാത്ത ധൈര്യത്തെ പ്രകീർത്തിക്കുകയും ചെയ്തു.

വിചാരണക്കോടതിയുടെ ഈ അപൂർവമായ കത്ത്, കോടതി വിധിച്ച 10.50 ലക്ഷം രൂപ നഷ്ടപരിഹാരത്തുകയ്ക്കൊപ്പം രണ്ട് ആഴ്ചയ്ക്കുള്ളിൽ പെൺകുട്ടിക്ക് എത്തിച്ചുനൽകാൻ ജസ്റ്റിസ് പ്രതിഭ എം. സിംഗ്, ജസ്റ്റിസ് ദിനേശ് ഭട്ട് എന്നിവരടങ്ങിയ ഡൽഹി ഹൈക്കോടതി ബെഞ്ച് ഉത്തരവിട്ടിരിക്കുകയാണ്. നീതിബോധവും മാനുഷിക മൂല്യങ്ങളും സമന്വയിച്ച ഈ വിധിന്യായം, നിയമവ്യവസ്ഥയോടുള്ള ജനങ്ങളുടെ വിശ്വാസം ഉയർത്തുന്നതിനൊപ്പം അതിക്രമങ്ങൾക്കെതിരെ സംസാരിക്കാൻ ഏതൊരു കുട്ടിക്കും വലിയ ധൈര്യം പകരുന്ന ഒന്നായും മാറിയിരിക്കുകയാണ്.

കത്തിന്റെ പൂർണ്ണരൂപം

'പ്രിയപ്പെട്ട കുഞ്ഞേ,

മോളേ, ഈ കോടതി നിന്റെ വാക്ക് കേട്ടു. 'അങ്കിൾ വയസനാകുന്നത് വരെ അയാളെ ജയിലിൽ തന്നെ ഇടണം' എന്ന് നീ പറഞ്ഞത് ഈ കോടതി ശ്രദ്ധിച്ചു കേൾക്കുകയും നിന്റെ അപേക്ഷയ്ക്ക് ഉത്തരം നൽകുകയും ചെയ്തിട്ടുണ്ട്. നീ 'അങ്കിൾ' എന്ന് വിളിച്ച ആ മനുഷ്യൻ ഇനി ഒരിക്കലും സ്വാതന്ത്ര്യത്തോടെ പുറത്തിറങ്ങി നടക്കില്ലെന്ന് ഇന്ന് ഈ കോടതി ഉത്തരവിട്ടിരിക്കുന്നു.

അയാൾ തടവറയ്ക്കുള്ളിൽ തന്റെ ശേഷിക്കുന്ന ജീവിതം മുഴുവൻ കഴിച്ചുകൂട്ടും. ആ കൂട്ടിൽ കിടന്ന് അയാൾ വയസ്സനാകും; ആ കൂട്ടിൽ കിടന്ന് തന്നെ അയാൾ മരിക്കും. നിന്നെയോ നിന്റെ അനിയത്തിയേയോ, മറ്റൊരു കുട്ടിയെയോ ഉപദ്രവിക്കാൻ ഇനി ഒരിക്കലും അയാൾക്ക് സാധിക്കില്ല.

ഈ കോടതി കണ്ടിട്ടുള്ളതിൽ വെച്ച് ഏറ്റവും ധൈര്യശാലിയായ പെൺകുട്ടിയാണ് നീ. നീ കോടതിയിൽ വന്നു, നിന്നെ ഉപദ്രവിച്ചയാളെ വിരൽ ചൂണ്ടി കാണിച്ചു, സത്യം വിളിച്ചുപറഞ്ഞു. നീ 'അങ്കിൾ' എന്ന് വിളിച്ചയാൾ നിന്നോട് ചെയ്തത് വളരെ മോശമായ കാര്യമാണ്. എന്നാൽ നീ നിശബ്ദയായിരുന്നില്ല. നീ നിന്റെ അമ്മയോട് പറഞ്ഞു.

നീ കാണിച്ച ആ ധൈര്യം കാരണമാണ് മറ്റൊരു കുട്ടിയേയും ഉപദ്രവിക്കാൻ കഴിയാത്ത നിലയിലേക്ക് അയാളെ ഇപ്പോൾ എത്തിച്ചിരിക്കുന്നത്. നിന്റെ ബാല്യം തിരികെ നൽകാൻ ഈ കോടതിക്ക് കഴിയില്ല. പക്ഷേ, നിന്റെ വാക്കുകൾ കേട്ടിട്ടുണ്ടെന്നും നിന്റെ അപേക്ഷ അംഗീകരിച്ചിട്ടുണ്ടെന്നും ഈ കോടതിക്ക് ഉറപ്പുനൽകാൻ കഴിയും.

നിന്നെ ഉപദ്രവിച്ചയാൾ ഒരു സ്വതന്ത്രനായ മനുഷ്യനായി ഇനി ഒരിക്കലും സൂര്യപ്രകാശം കാണില്ല. മോളേ, ഇനി നിന്റെ ജീവിതം ജീവിക്കുക. സ്‌കൂളിൽ പോവുക. നല്ല സൗഹൃദങ്ങൾ സൃഷ്ടിക്കുക. ചിരിക്കുക. കളിക്കുക. സ്വപ്നം കാണുക. നിന്റെ ഈ ധൈര്യം ഈ കോടതി എപ്പോഴും ഓർക്കും.'

കത്ത് കുട്ടിക്ക് എത്തിക്കാൻ ഹൈക്കോടതി ഉത്തരവ്

ഈ സന്ദേശം പ്രിന്റ് ചെയ്ത് കുട്ടിക്കോ കുട്ടിയുടെ കുടുംബത്തിനോ കൈമാറാൻ നോർത്ത്-വെസ്റ്റ് ഡൽഹി ഡിസ്ട്രിക്റ്റ് ലീഗൽ സർവീസസ് അതോറിറ്റിയോട് (DLSA) ഡൽഹി ഹൈക്കോടതി നിർദ്ദേശിച്ചു. പോക്സോ (POCSO) നിയമപ്രകാരമാണ് കേസ് പരിഗണിച്ചത്. നഷ്ടപരിഹാരത്തുകയ്ക്കൊപ്പം രണ്ട് ആഴ്ചയ്ക്കുള്ളിൽ ഈ സന്ദേശം കുട്ടിക്ക് എത്തിക്കണമെന്നാണ് കോടതി നിർദേശിച്ചിരിക്കുന്നത്.

ജസ്റ്റിസ് പ്രതിഭ എം. സിംഗ്, ജസ്റ്റിസ് ദിനേശ് ഭട്ട് എന്നിവരടങ്ങിയ ബെഞ്ചാണ് 2026 സെപ്റ്റംബർ 22-ന് ഈ ഉത്തരവ് പുറപ്പെടുവിച്ചത്. 2023 ജൂലൈ 23-ന് പെൺകുട്ടിക്ക് ഏഴ് വയസുള്ളപ്പോഴാണ് ഈ സംഭവം നടന്നതെന്ന് ഹൈക്കോടതി ചൂണ്ടിക്കാട്ടി. കുട്ടിക്ക് ഇപ്പോൾ പത്ത് വയസുണ്ട്. വിചാരണക്കോടതി കുട്ടിക്ക് നൽകിയ കുറിപ്പിനെ 'ധൈര്യത്തിന്റെ സന്ദേശം' എന്നാണ് ഹൈക്കോടതി ബെഞ്ച് വിശേഷിപ്പിച്ചത്.

സുമിത് ശാക്യ സമർപിച്ച ക്രിമിനൽ അപ്പീലിൽ നിന്നാണ് ഈ കേസ് ഉയർന്നുവന്നത്. 12 വയസിൽ താഴെയുള്ള പെൺകുട്ടിയെ ക്രൂരമായി ലൈംഗികമായി പീഡിപ്പിച്ചതിനും ഭീഷണിപ്പെടുത്തിയതിനുമാണ് വിചാരണക്കോടതി ഇയാളെ ശിക്ഷിച്ചത്.

പോക്സോ നിയമപ്രകാരം, ജീവിതകാലം മുഴുവൻ കഠിനതടവിനും ഒരു ലക്ഷം രൂപ പിഴയുമാണ് കോടതി ഇയാൾക്ക് ശിക്ഷ വിധിച്ചത്. കുട്ടിയെ ക്രിമിനൽ ഭാഷയിൽ ഭീഷണിപ്പെടുത്തിയതിന് അഞ്ച് വർഷത്തെ കഠിനതടവും 20,000 രൂപ പിഴയും കൂടി വിധിച്ചിട്ടുണ്ട്. രണ്ട് ശിക്ഷകളും ഒരുമിച്ച് അനുഭവിച്ചാൽ മതിയെന്നും കോടതി ഉത്തരവിൽ വ്യക്തമാക്കിയിട്ടുണ്ട്.

പെൺകുട്ടിക്ക് 10.50 ലക്ഷം രൂപ നഷ്ടപരിഹാരം

നഷ്ടപരിഹാര തുക 10.50 ലക്ഷം രൂപയായി വിചാരണക്കോടതി നിശ്ചയിച്ചു. കുട്ടിയുടെയും കുടുംബത്തിന്റെയും കഷ്ടപ്പാടുകൾ, കുറ്റകൃത്യത്തിന്റെ സ്വഭാവം, കുട്ടിയിലുണ്ടാക്കുന്ന ദീർഘകാല പ്രത്യാഘാതങ്ങൾ എന്നിവ കണക്കിലെടുത്താണ് തുക തീരുമാനിച്ചത്. ഈ തുക നൽകിയതിന്റെ വിശദാംശങ്ങൾ വിവരിക്കുന്ന റിപ്പോർട്ട് സമർപ്പിക്കാൻ ഡൽഹി ഹൈക്കോടതി ഡിഎൽഎസ്എ (DLSA) സെക്രട്ടറിയോട് ആവശ്യപ്പെട്ടിട്ടുണ്ട്.

പ്രതിയുടെ ശിക്ഷ തടഞ്ഞുവെക്കാനും ജാമ്യത്തിൽ വിടാനുമുള്ള അപേക്ഷയിൽ ഉടനടി ഇളവ് നൽകാൻ ഹൈക്കോടതി വിസമ്മതിച്ചു. ഫോറൻസിക് തെളിവുകൾ ഉൾപ്പെടെയുള്ളവ കണക്കിലെടുക്കുമ്പോൾ ഈ ഘട്ടത്തിൽ ശിക്ഷ തടഞ്ഞുവെക്കാൻ താൽപര്യമില്ലെന്ന് ബെഞ്ച് വ്യക്തമാക്കി. ഡിഎൽഎസ്എ സമർപ്പിക്കുന്ന സ്റ്റാറ്റസ് റിപ്പോർട്ട് അടുത്തതായി 2026 നവംബർ നാലിന് കേൾക്കും. അപ്പീൽ 2027 ജനുവരി 20-ന് വീണ്ടും പരിഗണിക്കും.

Content Highlights: The Delhi High Court witnessed a rare and emotional case where a judge provided a comforting message to a 10-year-old girl who was a victim of sexual abuse, assuring her that the perpetrator would remain imprisoned for life. The trial court sentenced the accused, Sumit Shakya, to life imprisonment and a fine under the POCSO Act, and awarded the girl a compensation of 10.50 lakh rupees, emphasizing the girl's bravery in speaking out.