ചേരാനെല്ലൂർ അപകടം: വീഴ്ചവരുത്തിയ 4 പോലീസുകാർക്ക് സസ്പെൻഷൻ; 17-കാരന്റെ ജാമ്യം റദ്ദാക്കാൻ നീക്കം

കൊച്ചി: ചേരാനല്ലൂർ അപകടത്തിൽ എഫ്.ഐ.ആറിൽ വീഴ്ചവരുത്തിയ നാല് പോലീസ് ഉദ്യോഗസ്ഥർക്കെതിരേ നടപടിയെടുത്ത് ആഭ്യന്തരവകുപ്പ്. സ്റ്റേഷൻ എസ്.എച്ച്.ഒ., എസ്.ഐ., രണ്ട് പോലീസ് ഉദ്യോഗസ്ഥർ എന്നിവരെ സസ്പെൻഡ് ചെയ്തതായി ആഭ്യന്തരമന്ത്രി രമേശ് ചെന്നിത്തല നിയമസഭയിൽ അറിയിച്ചു.

ചേരാനല്ലൂരിൽ അപകടത്തിനിടയാക്കിയ കാർ ഓടിച്ച 17-കാരന്റെ ജാമ്യം റദ്ദാക്കാൻ കോടതിയെ സമീപിക്കും. ജഡ്ജിക്കെതിരേ നിയമപരമായി എല്ലാ സാധ്യതകളും പരിശോധിച്ച് മുന്നോട്ടുപോകുമെന്ന് രമേശ് ചെന്നിത്തല അറിയിച്ചു.

ചേരാനല്ലൂർ വാഹനാപകടവുമായി ബന്ധപ്പെട്ട വിഷയം ചർച്ചചെയ്യാൻ സഭയിൽ അടിയന്തര പ്രമേയത്തിന് അനുമതി തേടിയുള്ള നോട്ടീസായി എത്തിയിരുന്നു. വീഴ്ചവരുത്തിയവർക്കെതിരേ നടപടി ഉണ്ടാകുമെന്ന് വിഷയത്തിൽ സംസാരിക്കുമ്പോൾ ചെന്നിത്തല അറിയിച്ചിരുന്നു. തുടർന്ന് 4.12-ന് നാലു ഉദ്യോഗസ്ഥരെ സസ്പെൻഡ് ചെയ്ത കാര്യം ചെന്നിത്തല സഭയിൽ അറിയിക്കുകയായിരുന്നു.

ചേരാനല്ലൂരിലെ അപകടത്തിൽ പോലീസിനും ആഭ്യന്തരവകുപ്പിനും വൻതോതിൽ വിമർശനങ്ങൾ ഏൽക്കേണ്ടിവന്നിരുന്നു. പ്രതിയെ സംരക്ഷിക്കുന്ന നിലപാടാണ് പോലീസ് സ്വീകരിച്ചത് എന്ന ആരോപണങ്ങളും ഉയർന്നിരുന്നു. തുടർന്ന് അപകടത്തിൽ കൊല്ലപ്പെട്ടയാളുടെ മക്കളും ബന്ധുക്കളും പോലീസ് സ്റ്റേഷനിൽ പ്രതിഷേധമിരിക്കുന്ന സാഹചര്യവും ഉണ്ടായി.

ഇതിന്റെ പശ്ചാത്തലത്തിൽ എഡിജിപി പി.വിജയൻ ഇന്ന് രാവിലെത്തന്നെ ചേരാനല്ലൂരിൽ എത്തിയിരുന്നു. പോലീസ് സ്റ്റേഷനിലും അപകടത്തിൽ മരിച്ച ജയപാലകൃഷ്ണന്റെ കുടുംബത്തെയും കണ്ടിരുന്നു. നീതിപൂർവ്വമായ നടപടികൾ ഉണ്ടാകുമെന്ന് പിന്നീട് മാധ്യമങ്ങളോട് അറിയിച്ചിരുന്നു. പോലീസിന് വീഴ്ച സംഭവിച്ചിട്ടുണ്ടെങ്കിൽ പോലീസുകാർക്കെതിരേയും നടപടി ഉണ്ടാകുമെന്നും അറിയിച്ചിരുന്നു. കൈയടികളോടെയാണ് ഭരണപക്ഷ നിര ചെന്നിത്തലയുടെ തീരുമാനത്തെ കേട്ടത്.

Content Highlights: Four police officers including SHO and SI suspended for FIR lapse in Cheranalloor accident., Home Minister Ramesh Chennithala announced the action in the Kerala Legislative Assembly., Steps initiated to cancel the bail of the 17-year-old minor driver involved in the accident., ADGP P. Vijayan visited the accident site and met the victim's family, assuring fair investigation.