കെ.പി.അപ്പന്റെ ജീവിതം അക്ഷരസ്‌നേഹികള്‍ക്കു മുന്നിലേക്ക്; പുസ്തകവുമായി മാതൃഭൂമി ബുക്‌സ്
കൊല്ലം: മലയാള വിമര്‍ശനത്തിലെ ഏകാന്തപഥികനായിരുന്ന, മണ്‍മറഞ്ഞ കെ.പി.അപ്പന്റെ ജീവിതം അക്ഷരസ്‌നേഹികള്‍ക്കു മുന്നിലേക്ക്. പ്രസന്നരാജന്‍ രചിച്ച 'കെ.പി.അപ്പന്‍ നിഷേധിയും മഹര്‍ഷിയും' എന്ന പുസ്തകം സെപ്റ്റംബര്‍ 25-ന് മാതൃഭൂമി ബുക്‌സ് പ്രസിദ്ധീകരിക്കും. 298 പേജുകളുള്ള പുസ്തകത്തിന് 450 രൂപയാണ് വില.
മരണശേഷം അഥവാ ഞാന്‍ സ്വര്‍ഗത്തില്‍ അകപ്പെട്ടാല്‍ അവിടെ വിമര്‍ശനമില്ലെങ്കില്‍ അത് എനിക്ക് സ്വര്‍ഗമായിരിക്കില്ലെന്ന് നിലപാട് വ്യക്തമാക്കിയ അപ്പന്റെ സാഹിത്യജീവിതവും വ്യക്തിജീവിതവും അനാവരണം ചെയ്യുന്ന കൃതിയാണിത്.
'71-ല്‍ ഞാന്‍ കൊല്ലം എസ്.എന്‍.കോളേജില്‍ പഠിക്കുന്ന കാലത്ത് അധ്യാപകനായി എത്തിയതാണ് അപ്പന്‍സാര്‍. പിന്നെ ആ സാഹിത്യജീവിതത്തെയും വ്യക്തിജീവിതത്തെയും അടുത്തറിഞ്ഞതില്‍നിന്നാണ് ഇങ്ങനെയൊരു കൃതിയുടെ ജനന'മെന്ന് പ്രസന്നരാജന്‍ പറഞ്ഞു. അതിനായി വീണ്ടും അന്വേഷണങ്ങള്‍ നടത്തിയിട്ടുണ്ട്. അദ്ദേഹത്തിന്റെ കൃതികള്‍ പലവട്ടം വായിച്ചും ആധികാരികരേഖകള്‍ പരിശോധിച്ചുമാണ് പുസ്തകം തയ്യാറാക്കിയിരിക്കുന്നത്.
വിഗ്രഹഭഞ്ജകനും പുതിയ ലാവണ്യസങ്കല്പങ്ങളെയും അഗ്‌നിസ്ഫുലിംഗംപോലുള്ള ആശയങ്ങളെയും ഹൃദയത്തില്‍ സ്വീകരിച്ച ആളുമാണ് കെ.പി.അപ്പന്‍. ജീവിതയാഥാര്‍ഥ്യങ്ങളെയും ഈ ലോകത്തെയും ദാര്‍ശനികമായി സമീപിക്കുന്ന ഒരു മഹര്‍ഷിയുമുണ്ട് അദ്ദേഹത്തില്‍. ധ്യാനത്തിന്റെയും പക്വമായ അവബോധത്തിന്റെയും തലങ്ങളില്‍ അലയുന്ന മുനിയുടെ മനസ്സ്. പേനയെ വിശുദ്ധമായ ആയുധമാക്കിയ അപ്പന്‍ എന്തെഴുതിയാലും കവിത നിറയും.
ഗദ്യത്തിലെ ആന്തരിക സംഗീതത്തെ മലയാളികള്‍ക്ക് പരിചയപ്പെടുത്തിയത് ആ രചനാശൈലിയാണ്. കെ.പി.അപ്പന്റെ ജീവിതത്തെ ഗ്രന്ഥകാരന്‍ ഇങ്ങനെയൊക്കെ വായിക്കുന്നു. ഉചിതമായ ശൈലിയിലൂടെ ആ ജീവിതത്തെ അവതരിപ്പിക്കുകയും ചെയ്യുന്നു. കുട്ടിക്കാലംമുതല്‍ മരണംവരെയുള്ള ജീവിതത്തിനിടയിലെ അപ്പനിലെ സാഹിത്യവിമര്‍ശകനെയും വായനക്കാരനെയും രൂപപ്പെടുത്തിയ കാലങ്ങളെല്ലാം പുസ്തകത്തില്‍ അനാവൃതമാകുന്നുണ്ട്.
Content Highlights: K P Appan, Birth anniversary, Book, Mathrubhumi books