മുംബൈയിൽ ടാക്സി ഡ്രൈവർക്ക് ഈ ഭാഷ അറിഞ്ഞിരിക്കണം; ഇനി വാഹനം മാത്രമല്ല ഡ്രൈവറുടെ ഭാഷയും പരിശോധിക്കും
മുംബൈ: മഹാരാഷ്ട്രയിലുടനീളമുള്ള റീജണൽ ട്രാൻസ്പോർട്ട് ഓഫീസുകൾ ടാക്സി, ഓട്ടോറിക്ഷാ ഡ്രൈവർമാരുടെ മറാഠി ഭാഷയെക്കുറിച്ചുള്ള പരിജ്ഞാനം പരിശോധിക്കാൻ ആരംഭിച്ചു. പൊതുഗതാഗത ഡ്രൈവർമാർക്ക് മറാഠിയെക്കുറിച്ച് അറിവ് ഉണ്ടായിരിക്കണമെന്ന് ആവശ്യപ്പെടുന്ന മോട്ടോർ വാഹന നിയമങ്ങൾ ഓഗസ്റ്റ് 12-ന് വിജ്ഞാപനം ചെയ്തതായി അധികൃതർ പറഞ്ഞു.
മറാഠി ഭാഷയിൽ ആവശ്യമായ പ്രാവീണ്യം ഇല്ലാത്ത ഡ്രൈവർമാർക്ക് തുടക്കത്തിൽ ഭാഷ പഠിക്കാൻ അവസരം നൽകുമെന്ന് ഗതാഗത മന്ത്രി സർനായിക് പറഞ്ഞിരുന്നു. ഭാഷാ പരിജ്ഞാനം ഇല്ലെങ്കിൽ അവരുടെ ലൈസൻസും ബാഡ്ജും മൂന്നുമാസത്തേക്ക് സസ്പെൻഡ് ചെയ്യുമെന്നും തുടർന്നും പാലിക്കാത്തതിനാൽ ലൈസൻസും ബാഡ്ജും റദ്ദാക്കാൻ ഇടയാക്കുമെന്നും അദ്ദേഹം പറഞ്ഞു.
മഹാരാഷ്ട്രയിൽ ഓട്ടോറിക്ഷ, ടാക്സി, ആപ്പ് അധിഷ്ഠിത ക്യാബുകൾ എന്നിവ ഓടിക്കുന്ന ഡ്രൈവർമാർക്ക് മറാഠി ഭാഷാ പരിജ്ഞാനം നിർബന്ധമാക്കിയായിരുന്നു സർക്കാർ ഉത്തരവ്. മഹാരാഷ്ട്ര മോട്ടോർ വെഹിക്കിൾസ് (ഭേദഗതി) ചട്ടങ്ങൾ 2026 പ്രകാരമായിരുന്നു നിർദേശം. മറാഠി സംസാരിക്കാനോ കൈകാര്യം ചെയ്യാനോ അറിയാത്ത ഡ്രൈവർമാരുടെ ഡ്രൈവിങ് ലൈസൻസോ പെർമിറ്റോ പ്രാഥമികമായി മൂന്ന് മാസത്തേക്ക് സസ്പെൻഡ് ചെയ്യും. സസ്‌പെൻഷൻ കാലാവധിക്കുശേഷവും ഭാഷ പഠിച്ചില്ലെങ്കിൽ ലൈസൻസ് സ്ഥിരമായി റദ്ദാക്കുമെന്നും ഗതാഗതമന്ത്രി പ്രതാപ് സർനായിക് മുന്നറിയിപ്പ് നൽകിയിരുന്നു.
യാത്രക്കാരുമായി കൃത്യമായി ആശയവിനിമയം നടത്താനും സുഗമമായ യാത്ര ഉറപ്പാക്കാനുമാണ് ഈ ഭേദഗതികൊണ്ടുവന്നതെന്നാണ് സർക്കാരിന്റെ വിശദീകരണം. വാഹനം ഓടിക്കുന്ന ഡ്രൈവർമാർക്കു പുറമേ, പെർമിറ്റ് ഉടമകൾക്കും പെർമിറ്റ് പുതുക്കാൻ അപേക്ഷിക്കുന്നവർക്കും ഈ നിയമം ബാധകമായിരിക്കും. മറാഠി ഭാഷ അറിയാത്തവർ ആളുകളെ തെറ്റിദ്ധരിപ്പിക്കുന്നതും വഴി തെറ്റിക്കുന്നതും സംബന്ധിച്ച് നിരന്തരം പരാതികൾ ലഭിച്ച പശ്ചാത്തലത്തിലാണ് ഈ നീക്കമെന്ന് മോട്ടോർ വാഹന വകുപ്പ് അറിയിച്ചു.
ഉത്തരേന്ത്യൻ സംസ്ഥാനങ്ങളിൽനിന്നും മറ്റ് പ്രദേശങ്ങളിൽ നിന്നും ജോലി തേടി മുംബൈ ഉൾപ്പെടെയുള്ള നഗരങ്ങളിലെത്തിയ ഡ്രൈവർമാരെ ഇത് കാര്യമായി ബാധിക്കുമെന്നായിരുന്നു ഇത് സംബന്ധിച്ച് ആശങ്ക. ഡ്രൈവർമാർക്ക് മറാഠി ഭാഷയിൽ പ്രാഥമിക പരിശീലനം നേടാൻ നിശ്ചിത സമയം അനുവദിക്കുമെന്നും അതിനുശേഷമായിരിക്കും കർശന നിയമനടപടികളിലേക്ക് കടക്കുകയെന്നും അധികൃതർ ഉറപ്പുനൽകിയിരുന്നു.
Content Highlights: Marathi language proficiency is now mandatory for auto, taxi, and app-based cab drivers in Maharashtra., Rules implemented under the Maharashtra Motor Vehicles (Amendment) Rules 2026, notified on August 12., Drivers lacking proficiency face an initial 3-month suspension of license and badge, leading to permanent cancellation if non-compliant., Aim is to ensure smooth passenger communication and prevent passenger misguidance.