റോഡ് സുരക്ഷയ്ക്ക് ഉറപ്പാക്കാൻ സർക്കാർ, ബ്രാന്റ് അംബാസഡറായി മമ്മൂട്ടി, കേരള റോഡ് സേഫ്റ്റി മിഷൻ വരുന്നു

കൊച്ചി: സംസ്ഥാനത്തെ റോഡപകടമരണങ്ങൾ കുറയ്ക്കാൻ രൂപവത്കരിച്ച കേരള റോഡ് സേഫ്റ്റി മിഷന്റെ പ്രഖ്യാപനം 15-ന് രാവിലെ 11-ന് ടൗൺഹാളിൽ നടക്കുമെന്ന് ഗതാഗതമന്ത്രി സി.പി. ജോൺ പത്രസമ്മേളനത്തിൽ പറഞ്ഞു. ബോധവത്കരണവും നിയമങ്ങൾ കർശനമായി നടപ്പാക്കലും സംയോജിപ്പിച്ചുള്ള പ്രവർത്തനങ്ങളിലൂടെ മരണനിരക്ക് ഘട്ടംഘട്ടമായി കുറയ്ക്കുകയാണ് മിഷന്റെ ലക്ഷ്യം. മമ്മൂട്ടി മിഷന്റെ ബ്രാൻഡ് അംബാസഡറായി പ്രവർത്തിക്കും.

സംസ്ഥാനത്ത് പ്രതിവർഷം 3,700-ഓളം പേരാണ് റോഡപകടങ്ങളിൽ മരിക്കുന്നത്. 'എൻലൈറ്റൻ ആൻഡ് എൻഫോഴ്‌സ്' എന്ന ആശയത്തിലൂന്നി വിദ്യാർഥികൾ മുതൽ മുതിർന്ന പൗരന്മാർ വരെയുള്ളവരെ ഉൾപ്പെടുത്തി വിപുലമായ ബോധവത്കരണ പരിപാടികൾ സംഘടിപ്പിക്കും. നിയമലംഘകർക്കെതിരേ കർശന നടപടികളും സ്വീകരിക്കും.

മുഖ്യമന്ത്രി വി.ഡി. സതീശൻ ചെയർമാനും ഗതാഗതമന്ത്രി കോ-ചെയർമാനുമായ മിഷനിൽ എട്ടുവകുപ്പുകളിലെ മന്ത്രിമാർ അംഗങ്ങളായിരിക്കും. ജില്ലാതലത്തിലും തദ്ദേശസ്വയംഭരണ സ്ഥാപനതലത്തിലും പ്രവർത്തനം വ്യാപിപ്പിച്ച് സുരക്ഷിത ഡ്രൈവിങ് ക്ലബ്ബുകൾ രൂപവത്കരിക്കും. അപകടസാധ്യതയുള്ള ബ്ലാക്ക് സ്‌പോട്ടുകൾ കണ്ടെത്തി പരിഹരിക്കൽ, റോഡുകളുടെ നവീകരണം, സുരക്ഷാ അടയാളങ്ങൾ മെച്ചപ്പെടുത്തൽ, സീബ്രാ ക്രോസിങ്ങുകളുടെ വീതി വർധിപ്പിക്കൽ എന്നിവയും പദ്ധതിയുടെ ഭാഗമാണ്.

സ്‌കൂൾ പാഠ്യപദ്ധതിയിൽ റോഡ് സുരക്ഷ ഉൾപ്പെടുത്തുന്നതിനും സ്‌കൂളുകൾ, ആശുപത്രികൾ, ആരാധനാലയങ്ങൾ എന്നിവയ്ക്ക് സമീപം പ്രത്യേക സുരക്ഷാ മേഖലകൾ ഒരുക്കുന്നതിനും നടപടിയുണ്ടാകും. പൊതുജനങ്ങൾക്ക് നിർദേശങ്ങൾ സമർപ്പിക്കാൻ വെബ്‌സൈറ്റും മൊബൈൽ ആപ്പും സജ്ജമാക്കുമെന്നും മന്ത്രി പറഞ്ഞു.

Content Highlights: Kerala Road Safety Mission launch scheduled for the 15th at 11 AM at the Town Hall., Actor Mammootty appointed as the brand ambassador for the safety mission., Aims to reduce annual road accident deaths through awareness and strict law enforcement., Chief Minister VD Satheesan is Chairman and Transport Minister CP John is Co-Chairman., Introduction of safety clubs, school curriculum inclusion, and black spot fixes.