500 എയര്ഹോണുകള്, റോഡ്റോളറിന് പകരം ജെസിബി; മന്ത്രി പറഞ്ഞപോലെ ഹോണുകള് തവിടുപൊടിയാക്കി MVD
കാക്കനാട്: കസ്റ്റഡിയിലെടുത്ത നിരോധിത എയര്ഹോണുകള് റോഡിലിട്ട് തവിടുപൊടിയാക്കി മോട്ടോര് വാഹനവകുപ്പ്. ഒരാഴ്ചക്കിടെ ജില്ലയില്നിന്ന് പിടികൂടിയ 500 ഓളം എയര്ഹോണുകളാണ് ജെസിബി ഉപയോഗിച്ച് നശിപ്പിച്ചത്. ഗതാഗത മന്ത്രിയുടെ നിര്ദേശപ്രകാരം തുടങ്ങിയ പരിശോധനയില് സ്വകാര്യ ബസുകള്, ചരക്ക് ലോറികള്, കാറുകള് തുടങ്ങിയ വാഹനങ്ങളില് ഘടിപ്പിച്ചിട്ടുള്ള എയര്ഹോണുകള് ഉദ്യോഗസ്ഥര് സ്പോട്ടില് പിഴചുമത്തി ഊരിയെടുക്കുകയായിരുന്നു.
ഇതാണ് കഴിഞ്ഞ ദിവസം എറണാകുളം കമ്മട്ടിപ്പാടത്തെ ആളൊഴിഞ്ഞ റോഡില് വെച്ച് യന്ത്രത്തിന്റെ സഹായത്തോടെ നശിപ്പിച്ചത്. പിടികൂടിയ എയര്ഹോണ് മാധ്യമങ്ങള്ക്കു മുന്നില് പ്രദര്ശിപ്പിച്ച്, റോഡ് റോളര് ഉപയോഗിച്ച് നശിപ്പിക്കണമെന്നാണ് മന്ത്രി നിര്ദേശിച്ചത്. എന്നാല്, റോഡ് റോളര് കിട്ടാത്തതിനെ തുടര്ന്നാണ് ഉദ്യോഗസ്ഥര് ജെസിബിയെ ആശ്രയിച്ചത്. ഇതിനു മുന്നില് റോളര് ഘടിപ്പിച്ചാണ് എയര്ഹോണുകള് നശിപ്പിച്ചത്. ഇതിന്റെ അവശിഷ്ടങ്ങള് സംസ്കരിക്കാനുള്ള നടപടികളും ഉദ്യോഗസ്ഥര് സ്വീകരിക്കും.
കഴിഞ്ഞ ആഴ്ച കോതമംഗലത്ത് ഗതാഗതമന്ത്രി കെ.ബി. ഗണേഷ്കുമാര് പങ്കെടുത്ത ഉദ്ഘാടനച്ചടങ്ങിനിടെ അമിത വേഗത്തിലും ഹോണടിച്ചും പാഞ്ഞ ബസുകള്ക്കെതിരേ നടപടിയെടുത്തിരുന്നു. ഇതിന് പിന്നാലെയാണ് വാഹനവകുപ്പ് പരിശോധന ശക്തമാക്കിയത്. നിരോധനമുള്ള എയര്ഹോണുകളാണ് പല വാഹനങ്ങളിലും ഘടിപ്പിച്ചിട്ടുള്ളത്. ടെസ്റ്റ് സമയത്ത് അഴിച്ചുമാറ്റുന്ന ഇവ പിന്നീട് ഘടിപ്പിക്കും. കടുത്ത ശബ്ദമലിനീകരണം ഉണ്ടാക്കുന്ന ഹോണുകളാണ് ഇവ. വരും ദിവസങ്ങളിലും പരിശോധന തുടരും.
ഒക്ടോബര് 13 മുതല് 19 വരെയായിരുന്നു മന്ത്രിയുടെ നിര്ദേശം അനുസരിച്ച് വാഹനങ്ങളിലെ എയര് ഹോണ് കണ്ടെത്തുന്നതിനായി മോട്ടോര് വാഹന വകുപ്പിന്റെ നേതൃത്വത്തില് പരിശോധന നടത്തിയത്. നടപടി പൂര്ത്തിയായതിന് പിന്നാലെയാണ് ഒക്ടോബര് 20 തിങ്കളാഴ്ച പിടിച്ചെടുത്ത ഹോണുകള് എല്ലാം നിരത്തിവെച്ച് ജെസിബി ഉപയോഗിച്ച് നശിപ്പിച്ചത്.
സ്വകാര്യ ബസുകളിലും ലോറികളിലുമായി അനുമതിയില്ലാതെ വയ്ക്കുന്ന എയര്ഹോണുകള് കണ്ടെത്തുക മാത്രല്ല ഉദ്യോഗസ്ഥരുടെ ഉത്തരവാദിത്വം. ഇതിന്റെ ജില്ലാതല കണക്കുകളും നിത്യേന കൈമാറണമെന്ന് മന്ത്രി ആവശ്യപ്പെട്ടിരുന്നു. ഒക്ടോബര് 15,16 ദിവസങ്ങളിലെ കണക്ക് അനുസരിച്ച് എയര്ഹോണ് ഉപയോഗിക്കുന്ന 422 വാഹനങ്ങള്ക്കെതിരേ മോട്ടോര്വാഹന വകുപ്പ് കേസെടുത്തിരുന്നു. 8.21 ലക്ഷം രൂപ പിഴ ചുമത്തുകയും ഇതില് 1.22 ലക്ഷം രൂപ പിഴ ഈടാക്കുകയും ചെയ്തിരുന്നു.
വാഹനങ്ങളിലെ എയര്ഹോണുകള് ഒഴിവാക്കാന് നടപടി സ്വീകരിക്കണമെന്ന് നേരത്തേ ഹൈക്കോടതിയും മോട്ടോര് വാഹന വകുപ്പിന് കര്ശന നിര്ദേശം നല്കിയിരുന്നു. പരിശോധനയില് വീഴ്ചവരുത്തുന്ന ഉദ്യോഗസ്ഥരെ കണ്ടെത്താന് സൂപ്പര് ചെക്കിങ് സ്ക്വാഡിനെയും കമ്മിഷണര് രൂപവത്കരിച്ചിട്ടുണ്ട്. സ്ക്വാഡ് നടത്തുന്ന പരിശോധനയില് വാഹനങ്ങളില് എയര്ഹോണ് കണ്ടെത്തിയാല് ആ പ്രദേശത്തിന്റെ ചുമതലയുള്ള ഉദ്യോഗസ്ഥര്ക്കെതിരേ വകുപ്പുതല നടപടിയുണ്ടാകും.
Content Highlights: Kerala MVD crushed over 500 banned air horns using a JCB as directed by the Transport Minister to curb noise pollution. Inspections continue.