നിരത്ത് നിറഞ്ഞാടാന് ഹ്യുണ്ടായി; പാലിസേഡ് എസ്യുവി ഇന്ത്യയിലെത്തിയേക്കും
ഇന്ത്യന് നിരത്തുകളില് വാഹനനിര ശക്തിപ്പെടുത്താനുള്ള ശ്രമത്തിലാണ് ദക്ഷിണ കൊറിയന് വാഹനനിര്മാതാക്കളായ ഹ്യുണ്ടായി. ഇതിനായി ടൂസോണില് അവസാനിക്കുന്ന ഹ്യുണ്ടായി ഇന്ത്യയുടെ വാഹനനിര പാലിസേഡ് എന്ന ഏഴ് സീറ്റര് എസ്യുവി എത്തിച്ച് കൂടുതല് വിപുലമാക്കാന് ശ്രമിക്കുന്നതായി റിപ്പോര്ട്ട്.
ഹ്യുണ്ടായിയുടെ ഫ്ളാഗ്ഷിപ്പ് മോഡലായായിരിക്കും പാലിസേഡ് ഇന്ത്യയിലെത്തുക. ആഡംബര വാഹനങ്ങളോട് കിടപിടിക്കുന്ന സൗന്ദര്യമാണ് പാലിസേഡിനുള്ളത്. വീതി കുറഞ്ഞ ഫുള് എല്ഇഡി ഹെഡ്ലൈറ്റ്, അതിനോട് ചേര്ന്നുള്ള എല്ഇഡി ഡിആര്എല്, ഹ്യുണ്ടായി രാജ്യാന്തര നിരത്തിലെത്തിച്ചിട്ടുള്ള വാഹനങ്ങളിലുള്ള ഗ്രില്ല്, സില്വര് സ്കിഡ് പ്ലേറ്റ് എന്നിവയാണ് മുന്വശത്തെ ആഡംബരമാക്കുന്നത്.
പ്രീമിയം വാഹനങ്ങളെ പോലും പിന്നിലാക്കുന്ന സൗകര്യങ്ങളാണ് ഇന്റീരിയറിലുള്ളത്. പുതിയ സാങ്കേതിക വിദ്യയിലൂന്നിയുള്ള ഫീച്ചറുകള്ക്കൊപ്പം മൂന്നാം നിരയില് മറ്റ് എസ്യുവികള് നല്കുന്നതിനെക്കാള് കൂടുതല് സ്പേസ് ഒരുക്കുന്നുണ്ടെന്നതും ഈ വാഹനത്തിന്റെ പ്രത്യേകതയാണ്. സാന്റാ ഫേയുടെ ഇന്റീരിയറിലുണ്ടായിരുന്ന മറ്റ് സൗകര്യങ്ങള് ഇതിലും തുടരും.
4980 എംഎം നീളവും 1975 എംഎം വീതിയും 1750 എംഎം ഉയരവും 2900 എംഎം വീല്ബേസുമുള്ള ഈ വാഹനം ഇന്ത്യയില് ടൊയോട്ട ഫോര്ച്യൂണര്, ഫോര്ഡ് എന്ഡേവര്, എംജി ഗ്ലോസ്റ്റര്, സ്കോഡ് കോഡിയാക് എന്നീ വാഹനങ്ങളുമായി ഏറ്റുമുട്ടും. ഏകദേശം 25 ലക്ഷം രൂപ മുതല് 32.5 ലക്ഷം രൂപ വരെയായിരിക്കും ഈ വാഹനത്തിന്റെ എക്സ്ഷോറും വില.
3.8 ലിറ്റര് വി6 ഡയറക്ട് ഇഞ്ചക്ഷന് പെട്രോള്, 2.2 ലിറ്റര് ടര്ബോചാര്ജ്ഡ് ഡീസല് എന്നീ രണ്ട് എന്ജിനുകളിലാണ് പാലിസേഡ് പുറത്തിറങ്ങുന്നത്. പെട്രോള് എന്ജിന് 291 ബിഎച്ച്പി പവറും 355 എന്എം ടോര്ക്കും ഡീസല് എന്ജിന് 200 ബിഎച്ച്പി പവറും 441 എന്എം ടോര്ക്കുമേകും. എട്ട് സ്പീഡ് ടോര്ക്ക് കണ്വെര്ട്ടര് ഓട്ടോമാറ്റിക്കാണ് ട്രാന്സ്മിഷന്.
Content Highlights: Hyundai Is Planning To Introduce Palisade SUV In India
Content Highlights: