ക്ലൈമറ്റ് സ്മാർട്ട് അഗ്രിക്കൾച്ചർ അവാർഡ് 2026; ദേശീയ പുരസ്കാരത്തിന് അപേക്ഷ ക്ഷണിച്ച് ഇസാഫ് ബാങ്ക്
കൊച്ചി: കാലാവസ്ഥ വ്യതിയാനത്തെ പ്രതിരോധിച്ചും സുസ്ഥിര കാർഷിക വികസന രീതികൾ അവലംബിച്ചും മികച്ച കാർഷിക ഉത്പാദനക്ഷമത നേടിയവരെ ആദരിക്കുന്നതിന്റെ ഭാഗമായി ഇസാഫ് സ്മോൾ ഫിനാൻസ് ബാങ്ക് ദേശീയ തലത്തിൽ ഏർപ്പെടുത്തിയ ക്ലൈമറ്റ് സ്മാർട്ട് അഗ്രിക്കൾച്ചർ അവാർഡിന് അപേക്ഷ ക്ഷണിച്ചു. നൂതന കാർഷിക മാതൃകകൾ വിജയകരമാക്കിയ കർഷകർ, കർഷകോല്പാദക സംഘടനകൾ, കൃഷി മേഖലയിലെ സംരംഭകർ, നൂതന ആശയങ്ങൾ നടപ്പാക്കുന്ന ഇന്നവേറ്റർമാർ എന്നിവർക്ക് പുരസ്കാരത്തിന് അപേക്ഷിക്കാം. ആദ്യ സ്ഥാനക്കാർക്ക് 50000 രൂപയും പ്രശസ്തിപത്രവും ഫലകവും റണ്ണർഅപ്പിന് 25000 രൂപയും പ്രശസ്തിപത്രവും ഫലകവും അടങ്ങുന്നതാണ് പുരസ്കാരം. നവീകരണ കൃഷി രീതികൾ, കാലാവസ്ഥ പ്രതിരോധശേഷി, കൃഷി സമൂഹത്തിലുണ്ടാക്കുന്ന സ്വാധീനം, ഉത്പാദനത്തിലെയും വരുമാനത്തിലെയും പുരോഗതി, സുസ്ഥിര കാർഷിക വികസനത്തിനുള്ള അവസരങ്ങൾ എന്നിവ പരിഗണിച്ചാകും വിജയികളെ തെരഞ്ഞെടുക്കുക.
മാറിവരുന്ന കാലാവസ്ഥയ്ക്ക് അനുയോജ്യമായ കാർഷിക രീതികളെ പ്രോത്സാഹിപ്പിക്കുന്നതോടൊപ്പം ഉത്പാദനക്ഷമത വർധിപ്പിച്ച് കർഷകർക്ക് ഉയർന്ന വരുമാനം ഉറപ്പാക്കുകയുമാണ് ഇത്തരമൊരു പുരസ്കാരം ഏർപ്പെടുത്തുന്നതിലൂടെ ഇസാഫ് ബാങ്ക് ലക്ഷ്യമിടുന്നത്. താല്പര്യമുള്ളവർക്ക് https://survey.zohopublic.in/zs/oCDpTe എന്ന ലിങ്ക് മുഖേനയോ, സസ്റ്റൈനബിൾ ബാങ്കിംഗ് ഡിപ്പാർട്ട്മെന്റ്, ഇസാഫ് സ്മോൾ ഫിനാൻസ് ബാങ്ക് കോർപ്പറേറ്റ് ഓഫീസ്, ഇസാഫ് ഭവൻ, മണ്ണുത്തി, തൃശൂർ - 680651, കേരള എന്ന വിലാസത്തിലേക്കോ അപേക്ഷിക്കാവുന്നതാണ്. ദേശീയ കർഷക ദിനമായ ഡിസംബർ 23ന് പുരസ്കാരം നൽകും. അപേക്ഷകൾ ലഭിക്കേണ്ട അവസാന തീയതി സെപ്റ്റംബർ 30.
Content Highlights: Apply for the ESAF Climate Smart Agriculture Award 2026. Win cash prizes for sustainable farming innovations. Submit your entry by September 30, 2026.