പാറശ്ശാല: ഉറ്റവരെ രോഗങ്ങൾ കവർന്നതോടെ അനാഥയായ ആശയ്ക്ക് സ്നേഹവും കരുതലുമായി നല്ല മനസ്സിന്റെ ഉടമകൾ മുന്നോട്ടുവരുന്നു. രാഷ്ട്രീയ-സാംസ്കാരിക രംഗത്തുള്ളവരും സന്നദ്ധസംഘടനകളും എൻ.എസ്.എസുമാണ് ആശയ്ക്കു കരുതലായി രംഗത്തെത്തിയിട്ടുള്ളത്. ആശയുടെ അവസ്ഥ ‘മാതൃഭൂമി’ വാർത്തയിലൂടെ ശ്രദ്ധയിൽപ്പെട്ടതിനെ തുടർന്നാണിത്.

ആശയുടെ സംരക്ഷണവും വിദ്യാഭ്യാസവുമടക്കമുള്ള എല്ലാ സഹായങ്ങളും എൻ.എസ്‌.എസ്. നെയ്യാറ്റിൻകര താലൂക്ക് യൂണിയൻ പ്രസിഡന്റ് കോട്ടുകാൽ കൃഷ്ണകുമാർ ബന്ധുക്കൾക്കു വാഗ്ദാനം ചെയ്തു. കാരോട് എൻ.എസ്.എസ്. കരയോഗ ഭാരവാഹികൾക്കൊപ്പം അദ്ദേഹം വെള്ളിയാഴ്ച ആശയുടെ വീടു സന്ദർശിച്ചു.

ash
മാതൃഭൂമി പ്രസിദ്ധീകരിച്ച വാർത്ത

പത്തനംതിട്ട കേന്ദ്രീകരിച്ചു പ്രവർത്തിക്കുന്ന സന്നദ്ധസംഘടനാ പ്രവർത്തകർ ഫോണിൽ ആശയുമായി സംസാരിച്ചിരുന്നു. എല്ലാ സഹായങ്ങളും അവർ വാഗ്ദാനംചെയ്തു. മുത്തച്ഛന്റെയും അമ്മയുടെയും വേർപാടിന്റെ ദുഃഖത്തിലായതിനാൽ ഒരാഴ്ചയ്ക്കു ശേഷം നേരിട്ടെത്തി ബന്ധുക്കളോടും ആശയോടും കാര്യങ്ങൾ ചർച്ചചെയ്യുമെന്ന് സംഘടനാ ഭാരവാഹികൾ അറിയിച്ചു. പട്ടാമ്പി കേന്ദ്രമായി പ്രവർത്തിക്കുന്ന മറ്റൊരു സന്നദ്ധസംഘടനയും ആശയ്ക്കു സഹായങ്ങൾ വാഗ്ദാനം ചെയ്തിട്ടുണ്ട്. ഈ സംഘടനയുടെ പ്രതിനിധികൾ രണ്ടു ദിവസത്തിനുള്ളിൽ ആശയുടെ വീടു സന്ദർശിക്കും.

Read More: പ്രിയപ്പെട്ടവരെ കവർന്ന് അർബുദവും കോവിഡും; ആശ്രയം നഷ്ടപ്പെട്ട് ആശ

തിരുവനന്തപുരത്തെ ഒരു മനുഷ്യാവകാശ സംഘടനയും സഹായം നൽകാമെന്നറിയിച്ചിട്ടുണ്ട്. സർക്കാരിൽനിന്നു സഹായം ലഭ്യമാക്കുമെന്ന് കെ.ആൻസലൻ എം.എൽ.എ. അറിയിച്ചു.

കെ.എസ്.ആർ.ടി.സി.യിൽ എംപ്ലോയ്‌മെന്റ് ജീവനക്കാരനായിരുന്ന ആശയുടെ അച്ഛൻ മാർച്ചിൽ ക്യാൻസർ ബാധിച്ചു മരിച്ചു. തുടർന്ന് മുത്തച്ഛന്റെയും അമ്മയുടെയും സംരക്ഷണയിലായിരുന്നു. ഒരാഴ്ച മുൻപാണ് ആശയുടെ അമ്മ കോവിഡ് ബാധിച്ചു മരിച്ചത്. പിന്നാലെ മുത്തച്ഛനും മരണപ്പെട്ടതോടെ ആശ ഒറ്റയ്ക്കായി.

NSS offers to take care of Asha who was orphaned due to death of father mother and grandfather