ബാ​ഗുകളിൽ വ്യത്യസ്തത ആ​ഗ്രഹിക്കുന്നവരുണ്ട്. ചിലർ വിലയേക്കാൾ കാഴ്ച്ചയിലെ ഭം​ഗിക്കാണ് മുൻ​ഗണന കൊടുക്കുന്നതെങ്കിൽ ചിലർക്ക്  വില എത്രയായാലും ​ഗുണമാണ് മുഖ്യം. ഇപ്പോൾ സമൂഹമാധ്യമത്തിൽ വൈറലാകുന്നതും ഒരു ബാ​ഗിന്റെ വിശേഷമാണ്. ലോകത്തിലെ ഏറ്റവും വില കൂടിയ ബാ​ഗ് അവതരിപ്പിച്ചിരിക്കുകയാണ് ഇറ്റലിയിലെ ഒരു പ്രമുഖ ബ്രാൻ‍ഡ്. 

ഒന്നും രണ്ടുമല്ല 53 കോടിയാണ് ബാ​ഗിന്റെ വില. ഒരു ബാ​ഗിനെങ്ങിനെ ഇത്ര വില വരും എന്നു ചിന്തിക്കുന്നവരുണ്ടാവും. വജ്രം, ഇന്ദ്രനീലം തുടങ്ങിയ വിലപിടിപ്പുള്ള കല്ലുകളാണ് ബാ​ഗിന്റെ വിലയ്ക്കു പിന്നിൽ. പ്രശസ്ത ബ്രാൻഡായ ബോറിനി മിലാനെസി ആണ് ലോകത്തിലെ തന്നെ ഏറ്റവും വിലപിടിപ്പുള്ള ഈ ബാ​ഗ് നിർമിച്ചിരിക്കുന്നത്. 1000 ത്തോളം മണിക്കൂറുകളെടുത്താണ് ബാ​ഗിന്റെ നിർമാണം പൂർത്തിയാക്കിയത്. 

ചെറുതായി തിളക്കമുള്ള മുതലയുടെ തൊലി ഉപയോ​ഗിച്ചാണ് ബാ​ഗ് നിർമിച്ചിരിക്കുനന്ത്. ബാ​ഗിന്റെ മോടി കൂട്ടാനായി വൈറ്റ് ​ഗോൾഡ് കൊണ്ടുള്ള പത്ത് ചിത്രശലഭങ്ങളെയും ഡിസൈൻ ചെയ്തിരിക്കുന്ന് കാണാം. അവയിൽ നാല് ചിത്രശലഭങ്ങളിൽ വജ്രക്കല്ലുകളും മൂന്നെണ്ണത്തിൽ ഇന്ദ്രനീലവും പതിച്ചിട്ടുണ്ട്. 130ഓളം കാരറ്റുള്ള കല്ലുകളാണ് ബാ​ഗിലുള്ളത്. 

കൃത്രിമ നിർമിത വസ്തുക്കൾക്ക് പകരം മൃ​ഗത്തോൽ, ചെമ്മരിയാടിന്റെ രോമം തുടങ്ങിയവ കൊണ്ടാണ് ബാ​ഗിന്റെ ഉൾഭാ​ഗം നിർമിച്ചിരിക്കുന്നത്. വാങ്ങുന്നയാൾക്ക് പ്രത്യേക പരി​ഗണനയും ലഭിക്കും. ഉപഭോക്താവിന്റെ പേര് കൊത്തുപണി ചെയ്താണ് ബാ​ഗ് ലഭിക്കുക. 

ഇനി നീലനിറത്തിൽ സുന്ദരമാർന്ന ഈ ബാ​ഗിനു പിന്നിൽ മറ്റൊരു ആശയം കൂടിയുണ്ട്. കടൽക്കാഴ്ച്ചകളെ അനുസ്മരിപ്പിക്കും വിധമാണ് ബാ​ഗ് ഡിസൈൻ ചെയ്തിരിക്കുന്നത്. നീലക്കല്ലുകൾ കടലിന്റെ ആഴത്തേയും വജ്രം ജലത്തിന്റെ നൈർമല്യത്തെയും സൂചിപ്പിക്കുന്നു. 

Content Highlights: Italian brand launches handbag set with diamonds and rare gems