മേപ്പാടി: പ്രിയപ്പെട്ട സന്തോഷിനെ (കുട്ടന്‍) അവസാനമായി കാണാന്‍ നാട്ടുകാര്‍ ഓടിയെത്തിയത് കുന്നമ്പറ്റ ജുമാമസ്ജിദ് അങ്കണത്തിലേക്കായിരുന്നു. സൗഹൃദങ്ങളില്‍ മതവും ജാതിയും പരിഗണിക്കാതെ ജീവിച്ച കുന്നമ്പറ്റക്കാര്‍ക്ക് സന്തോഷിനോടുള്ള അവസാനകരുതലായിരുന്നു അത്. കുന്നമ്പറ്റ ഒമ്പതാം നമ്പര്‍ എന്ന റോഡുസൗകര്യമില്ലാത്ത പ്രദേശത്തായിരുന്നു സന്തോഷിന്റെ വീട്. മരണാനന്തരച്ചടങ്ങുകളില്‍ പങ്കെടുക്കാനെത്തുന്നവര്‍ക്കുള്ള അസൗകര്യങ്ങള്‍ തിരിച്ചറിഞ്ഞാണ് കുന്നമ്പറ്റ ജുമാമസ്ജിദ് അങ്കണത്തില്‍ മൃതദേഹം പൊതുദര്‍ശനത്തിനുവെച്ചത്. അവിടെ മതവും ജാതിയും വിലക്കായില്ല.
കുന്നമ്പറ്റ കൊല്ലിയില്‍ പരേതനായ കരുണാകരന്റെയും ഭാര്‍ഗവിയുടെയും മകനായ സന്തോഷ് (39) മെഡിക്കല്‍ കോളേജില്‍ ചികിത്സയിലിരിക്കെ ചൊവ്വാഴ്ചയാണ് മരണപ്പെട്ടത്. മൃതദേഹം വീട്ടിലേക്കെത്തിക്കുന്നതിനുള്ള പ്രയാസമറിഞ്ഞാണ് കുന്നമ്പറ്റ ജുമാമസ്ജിദ് ഭാരവാഹികള്‍ മസ്ജിദ് അങ്കണത്തില്‍ മൃതദേഹം വെക്കുന്നതിനുള്ള സൗകര്യങ്ങള്‍ ചെയ്തുനല്‍കിയത്. വിവരം മസ്ജിദില്‍നിന്നുതന്നെ മഹല്ലിലെ വിശ്വാസികളെ അറിയിച്ചു.
തുടര്‍ന്ന് മഹല്ല് സെക്രട്ടറി ഇ.ടി. അബൂബക്കറിന്റെയും പ്രസിഡന്റ് എസ്. അബ്ബാസിന്റെയും നേതൃത്വത്തില്‍ സൗകര്യമൊരുക്കി. പൊതുദര്‍ശനത്തിനുശേഷം കുന്നമ്പറ്റ ഹിന്ദുശ്മശാനത്തില്‍ മൃതദേഹം സംസ്‌കരിച്ചു. ഷാനിലയാണ് സന്തോഷിന്റെ ഭാര്യ. മക്കള്‍: അബിന്‍ ദേവ്, ആദിദേവ്.
പ്രാദേശിക ആഘോഷങ്ങളും എല്ലാവരും സഹകരിച്ചുതന്നെയാണ് ആഘോഷിക്കുന്നത്. കഴിഞ്ഞ മണ്ഡലകാലത്ത് മഹല്ല് കമ്മിറ്റിയുടെ നേതൃത്വത്തില്‍ അയ്യപ്പഭക്തന്മാര്‍ക്ക് അന്നദാനവും ഒരുക്കിയിരുന്നു. നബിദിനത്തില്‍ പ്രദേശത്തെ കുന്നമ്പറ്റ ഭഗവതി ശാസ്താക്ഷേത്രസമിതി മധുരവും വിളമ്പിയിരുന്നു.
