ടിക് ടോക് വീഡിയോ സാനിയ കണ്ടെന്നറിഞ്ഞതോടെ ഉള്ളൊന്നു കാളി, ബിനീഷ് പറയുന്നു
May 14, 2020, 05:10 PM IST
കേരളത്തിലെ ലോക്ഡൗണും ബീവറേജ് ഔട്ട്ലെറ്റും അങ്ങ് ഹൈദരാബാദില്‍ വിശ്രമിക്കുന്ന സാനിയ മിര്‍സയും തമ്മില്‍ എന്ത് ബന്ധമെന്ന് ശങ്കിക്കുന്നവരുണ്ടാവും. ബന്ധമുണ്ട്. ഈ ലോക്ഡൗണ്‍ കാരണമാണ്, കോഴിക്കോട് കരിക്കാംകുളത്തെ ബീവറേജസ് കോര്‍പ്പറേഷന്റെ മദ്യശാല താത്കാലികമായി അടച്ചത്. അതുകൊണ്ട് മാത്രമാണ് അവിടുത്തെ ഉദ്യോഗസ്ഥനായ കട്ടിപ്പാറക്കാരന്‍ എം.കെ. ബിനീഷിന് സഹോദരന്‍ ജോബിനൊപ്പം ഒരു ടിക്ക്ടോക്ക് വീഡിയോ ചെയ്യാന്‍ നേരംകിട്ടിയത്. ബിനീഷിന്റെ ഈ ടിക്ക്ടോക്ക് വീഡിയോ കണ്ട് സാനിയക്ക് ചിരിയടക്കാന്‍ കഴിയാതിരുന്നതില്‍ അത്ഭുതമില്ല. കാരണം മലയാളത്തിലുളള ഈ വീഡിയോയില്‍ ഒരു കഥാപാത്രം സാനിയയാണ്. മറ്റൊന്ന് സാനിറ്റൈസറും.
