ഐ.സി.സി. അംഗീകൃത പാനലില്‍ ഇടം നേടിയ മലയാളി സ്‌കോററാണ് തൃശ്ശൂര്‍ സ്വദേശിയായ രമേശ് മന്നത്ത്. പ്രവാസി മലയാളിയായ രമേശ് ഇക്കഴിഞ്ഞ ഐ.പി.എല്ലില്‍ സ്‌കോററായിരുന്നു. "സ്‌കോറിങ് മനോഹരമായ അനുഭവമാണ്. ക്രിക്കറ്റിനെ കൂടുതല്‍ അടുത്തറിയാനും ഉത്തരവാദിത്വത്തോടെ കളി കാണാനും സാധിക്കുന്നു എന്നതാണ് ഈ ജോലിയെ വ്യത്യസ്തമാക്കുന്നത്. വളരെയധികം ശ്രദ്ധവേണ്ട ജോലിയാണിത്. ട്വന്റി 20 മത്സരത്തില്‍ എറിയുന്ന 120 ബോളുകളും ശ്രദ്ധയോടെ വീക്ഷിച്ച് ഓരോ പന്തിലും പിറന്ന സംഭവവികാസങ്ങളെ കൃത്യമായി രേഖപ്പെടുത്തുക എന്നത് ശ്രമകരമായ ജോലിയാണ്" - രമേശ് പറയുന്നു.

"ഈ ഫീഡുകള്‍ ഉടന്‍ തന്നെ ബി.സി.സി.ഐയുടെയും ഐ.പി.എല്ലിന്റെയും വെബ്സൈറ്റുകളില്‍ എത്തും. മത്സരം നേരിട്ടുകാണുന്നതിനേക്കാള്‍ എത്രയോ ഇരട്ടി കാണികളാണ് സമൂഹമാധ്യമങ്ങളിലുള്ളത്. അവര്‍ക്ക് കൃത്യമായി വിവരങ്ങളെത്തിക്കുക എന്നതാണ് ജോലി" - ഇതു പറയുമ്പോള്‍ രമേശിന്റെ വാക്കുകളില്‍ ക്രിക്കറ്റ് ആവേശം നിറയുന്നു. നിലവില്‍ ട്വന്റി 20 ലോകകപ്പില്‍ സ്‌കോററായി പ്രവര്‍ത്തിക്കുന്ന രമേശ് തന്റെ ജോലി വിശേഷങ്ങള്‍ മാതൃഭൂമിയുമായി പങ്കുവയ്ക്കുന്നു.