ആധികാരികമായി പഠിച്ചിട്ടൊന്നുമില്ലെങ്കിലും കുഞ്ഞുന്നാള്‍ മുതലേ എവിടെ ചിത്രരചനാ മത്സരം കണ്ടാലും പങ്കെടുക്കാന്‍ വലിയ ആവേശമായിരുന്നു മുര്‍ഷിദയ്ക്ക്. മൈലാഞ്ചിയിടാന്‍ ഇത്താത്തയെ തേടി എത്തിയവരുടെ കൈകളില്‍ സ്വന്തം ഡിസൈനുകള്‍ പരീക്ഷിച്ചുകൊണ്ടാണ് മുര്‍ഷിദ ചിത്രരചനയുടെ പാഠങ്ങള്‍ പഠിച്ചത്. വരയോടുള്ള ആ ഇഷ്ടം ഇന്നിതാ ഇന്ത്യാ ബുക്ക് ഓഫ് റെക്കോഡ്‌സില്‍ വരെ ഇടം നേടിക്കൊടുത്തിരിക്കുന്നു മുര്‍ഷിദയ്ക്ക്.

ഇരുകൈകള്‍ കൊണ്ടും ഒരേ സമയം ചിത്രം വരച്ചാണ് മുര്‍ഷിദ റെക്കോഡിട്ടത്. നടന്‍ സൂര്യയുടെ അഞ്ച് ചിത്രങ്ങളായിരുന്നു മുര്‍ഷിദ ഇതിനായി വരച്ചത്. ഈ ചിത്രങ്ങളെ അഭിനന്ദിച്ച് സാക്ഷാന്‍ സൂര്യ തന്നെ മുര്‍ഷിദയെ വിളിച്ചു. തീര്‍ന്നില്ല, ഇനി രണ്ട് കൈകള്‍ കൊണ്ടും രണ്ട് കാലുകള്‍ കൊണ്ടും ഒരേ സമയം ചിത്രം വരച്ച് ഏഷ്യന്‍ ബുക്ക് ഓഫ് റെക്കോഡ്‌സില്‍ ഇടം നേടാനുള്ള ഒരുക്കത്തിലാണ് ഈ കുറ്റിച്ചിറക്കാരി.