പന്ത് ഡ്രിബ്ൾ ചെയ്ത് എതിരാളിയെ വെട്ടിച്ച് നീട്ടിയടിച്ച് മനു വിളിച്ചു- ‘‘അപ്പുവേ പിടിച്ചോ...’’ ആ പാസ് ജീവിതത്തിലേക്കാണ്. കോവിഡ് പ്രതിസന്ധിയിൽ പാതിയിൽ പഠനം നിർത്തിയവരും തൊഴിലിടങ്ങളിൽ എത്താത്തവരുമായ യുവാക്കളെ ‘ക്ലിയർ’ ചെയ്താണ് ഈ ഫുട്ബോൾ ഉരുളുന്നത്. കോക്കുഴി പണിയകോളനിയിലെ 15 യുവാക്കളാണ് ഫുട്ബോൾ പരിശീലനത്തിലൂടെ പഠനത്തിലേക്കും തൊഴിലിലേക്കും തിരികെയെത്തുന്നത്.
എം.എസ്. സ്വാമിനാഥൻ റിസർച്ച് ഫൗണ്ടേഷന്റെ ‘എവരി ചിൽഡ്രൻ ഈസ് എ ഹീറോ’ പദ്ധതിയുടെ ഭാഗമായാണ് പന്തുകളിയിലൂടെ ഇവരുടെ തിരിച്ചുപോക്കിനു വഴിയൊരുങ്ങിയത്. ചെറിയ കുട്ടികളുടെ ഓൺലൈൻ പഠനസഹായ പദ്ധതിയുടെ ഭാഗമായി കോളനിയിലെത്തിയ പ്രോജക്ട് കോ-ഓർഡിനേറ്റർ റോബിൻ വർഗീസാണ് ഇവരുടെ താത്പര്യങ്ങളറിഞ്ഞ് ഇടപെട്ടത്. ഈ ഇടപെടലുകൾ ഇവരുടെ ജീവിതത്തിന് പുതിയ വസന്തത്തിന്റെ നിറവും മണവുമായി.
‘‘പരിശീലനംവഴി ചിട്ടയായ ആരോഗ്യശീലങ്ങൾ ഇവരിൽ ഉറപ്പിച്ചു. വിദ്യാർഥികൾ ഓൺലൈൻ ക്ലാസുകളിൽ സജീവമായി. മറ്റുള്ളവർ തുല്യതാപരീക്ഷയ്ക്കു തയ്യാറെടുക്കുന്നു. തൊഴിലധിഷ്ഠിത പരിശീലനങ്ങൾ നൽകാനുള്ള ശ്രമത്തിലാണിപ്പോൾ’’-പദ്ധതിയുടെ സീനിയർ ഡെവലപ്മെന്റ് കോ-ഓർഡിനേറ്റർ ഗിരിജൻ ഗോപി പറഞ്ഞു.
