സുപ്രീം കോടതി ഉള്‍പ്പടെ രാജ്യത്തെ എല്ലാ കോടതികളിലും വനിത ജഡ്ജിമാരുടെ എണ്ണം കൂട്ടണം എന്ന് അറ്റോര്‍ണി ജനറല്‍ കെ.കെ വേണുഗോപാല്‍. വനിതകള്‍ക്ക് എതിരായ പീഡനക്കേസ്സുകളില്‍ സന്തുലിതവും, ഇരകളുടെ വികാരങ്ങളും മനസിലാക്കിക്കൊണ്ടുള്ള തീരുമാനം എടുക്കാന്‍ ഇത് സഹായകരമാകുമെന്നും അറ്റോര്‍ണി ജനറല്‍ കെ.കെ വേണുഗോപാല്‍ ചൂണ്ടിക്കാട്ടി.
പീഡനക്കേസിലെ പ്രതിക്ക് ജാമ്യം ലഭിക്കുന്നതിനായി ഇരയുടെ കൈയില്‍ രാഖി കെട്ടി നല്‍കണമെന്ന് മധ്യപ്രദേശ് ഹൈക്കോടതി ഉത്തരവിനെതിരെ എഴുതി നല്‍കിയ ഹര്‍ജിയിലാണ് അറ്റോര്‍ണി ജനറല്‍ നിലപാട് വ്യക്തമാക്കിയത്.
സുപ്രീം കോടതിയില്‍ അനുവദനീയമായ ജഡ്ജിമാരുടെ എണ്ണം 34 ആണ്. രണ്ട് വനിതാ ജഡ്ജിമാര്‍ മാത്രമാണ് നിലവിലുള്ളത്. സുപ്രീംകോടതിക്ക് ഇതുവരെ ഒരു വനിതാ ചീഫ് ജസ്റ്റിസിനെ ലഭിച്ചിട്ടില്ലെന്നും അറ്റോര്‍ണി ജനറല്‍ ഓര്‍മ്മിപ്പിച്ചു.
രാജ്യത്ത് ആകെയുള്ള 1113 ജഡ്ജിമാരില്‍ വെറും 80 പേര്‍മാത്രമാണ് വനിതകള്‍. ഇതില്‍ 78 പേരും ഹൈക്കോടതി ജഡ്ജിമാരാണ്. 11 വനിതാജഡ്ജിമാരുള്ള പഞ്ചാബ് -ഹരിയാന ഹൈക്കോടതിയിലാണ് ജഡ്ജിമാര്‍ക്കിടയിലെ പ്രാതിനിധ്യം ഏറ്റവും കൂടുതലെന്നും അറ്റോര്‍ണി ജനറല്‍ വ്യക്തമാക്കി.
