അന്വേഷണ ഏജന്‍സികള്‍ ദുരുപയോഗം ചെയ്യപ്പെടുന്നതായും ഭരണഘടനയുടെ അന്തസത്ത ലംഘിക്കപ്പെടുന്നതായും മുഖ്യമന്ത്രി പിണറായി വിജയന്‍. പതിവ് വാര്‍ത്താ സമ്മേളനത്തിലാണ് കേന്ദ്ര അന്വേഷണ ഏജന്‍സികള്‍ക്കെതിരെ മുഖ്യമന്ത്രി ആഞ്ഞടിച്ചത്.
അന്വേഷണ ഏജന്‍സികള്‍ പൊതുവില്‍ സ്വീകരിക്കേണ്ട പ്രൊഫഷണല്‍ മാനദണ്ഡങ്ങള്‍ അട്ടിമറിക്കപ്പെടുന്നതായും ഇന്ത്യന്‍ ഭരണഘടനയുടെ അടിസ്ഥാന തത്വങ്ങളും അതിന്റെ അന്തസത്തയും ക്രമാതീതമായി ലംഘിക്കപ്പെടുകയും ചെയ്യുന്നതായി മുഖ്യമന്ത്രി അഭിപ്രായപ്പെട്ടു.
ഏതെങ്കിലും ഏജന്‍സിയേയോ ഉദ്യോഗസ്ഥനെയോ കുറ്റപ്പെടുത്തണം എന്ന ഉദ്ദേശത്തോടെയല്ല സംസാരിക്കുന്നത് എന്ന് പറഞ്ഞ മുഖ്യമന്ത്രി തുടക്കത്തില്‍ അന്വേഷണം അതിന്റേതായ രീതിയിലാണ് നടന്നതെന്നും പിന്നീട് ഏജന്‍സികളുടെ ഭാഗത്തുനിന്നും ഉണ്ടായ ചില ഇടപെടലുകള്‍ പ്രതീക്ഷകള്‍ അസ്ഥാനത്താക്കിയെന്നും പറഞ്ഞു.
