നിയമസഭാ തിരഞ്ഞെടുപ്പ് പ്രചാരണത്തിനായി പ്രിയങ്കഗാന്ധി കേരളത്തിലേക്ക്. മധ്യകേരളത്തിലെ റാലികളില്‍ പ്രിയങ്ക പങ്കെടുക്കും. തോട്ടം മേഖലയും തീരപ്രദേശങ്ങളും സന്ദര്‍ശിക്കും. താര പ്രചാരകരെ കോണ്‍ഗ്രസ് ഉടന്‍ പ്രഖ്യാപിക്കും.
നിയമസഭാ തിരഞ്ഞെടുപ്പ് നടക്കുന്ന അഞ്ചിടങ്ങളിൽ ഭരണ പ്രതീക്ഷയുള്ള കേരളത്തിൽ രാഹുൽ ഗാന്ധിക്ക് പുറമേ പ്രിയങ്കാ ഗാന്ധിയേക്കൂടി ഇറക്കി പ്രചാരണം കൊഴുപ്പിക്കാനാണ് ഹൈക്കമാൻഡ് തീരുമാനം. അനാരോഗ്യം കാരണം അധ്യക്ഷ സോണിയാ ഗാന്ധി പ്രചാരണത്തിൽ നിന്ന് വിട്ടുനിൽക്കുന്നതിനാൽ പ്രിയങ്കയെ രംഗത്തിറക്കണമെന്ന് കെ.പി.സി.സി ആവശ്യപ്പെട്ടിരുന്നു.
കേരളത്തിലെ ജനങ്ങൾക്കിടയിൽ പ്രിയങ്കയ്ക്കുള്ള സ്വീകാര്യത വോട്ടാക്കി മാറ്റാനാകുമെന്നാണ് കണക്കുകൂട്ടൽ. രാഹുൽ സംസ്ഥാനത്തിന്റെ തെക്ക്, വടക്ക് മേഖലകൾ കേന്ദ്രീകരിച്ച് പ്രചാരണം നടത്തുമ്പോൾ പ്രിയങ്ക മധ്യദേശത്ത് റാലികളുടെ ഭാഗമാകും.
