താരമാണീ മാണിക്യം
വൈക്കത്തു നടക്കുന്ന മാതൃഭൂമി കാര്‍ഷിക മേളയുടെ മൂന്നാം ദിനമായ വെള്ളിയാഴ്ച താരമായത് മാണിക്യം എന്ന കുഞ്ഞന്‍ വെച്ചൂര്‍ പശുവാണ്. മേളയിലെത്തുന്നവര്‍ക്ക് കുഞ്ഞന്‍ പശുവിനെ കാണാനായിരുന്നു തിടുക്കമേറെയും. കുഞ്ഞന്‍ പശു എവിടെ എന്ന് അന്വേഷിച്ചാണ് ആളുകള്‍ മാണിക്യത്തിന് അരികിലെത്തിയത്. തൊട്ടും തലോടിയും ഒപ്പം നിന്ന് ഫോട്ടോസ് എടുത്തും അവര്‍ മാണിക്യത്തിന് ഒപ്പം കൂടി. കോഴിക്കോട് അത്തോളി സ്വദേശി ബാലകൃഷ്ണന്‍ നമ്പുക്കുടിയുടെ കാമധേനു നാച്ചുറല്‍ ഫാമിലെ വെച്ചൂര്‍ പശുവാണ് മാണിക്യം. 9 വയസ് പ്രായമുണ്ട് മാണിക്യത്തിന്. 61.5 സെന്റീമീറ്റര്‍ ഉയരമുള്ള ലക്ഷണമൊത്ത വെച്ചൂര്‍ പശുവാണ് മാണിക്യം. ലോകത്തിലെ ഏറ്റവും ഉയരം കുറഞ്ഞ പശു എന്ന ഖ്യാതിയുമായി 2014ലാണ് ഗിന്നസ് ബുക്ക് ഓഫ് റെക്കോര്‍ഡ്‌സില്‍ മാണിക്യം ഇടം പിടിക്കുന്നത്. 2015ല്‍ ലിംക ബുക്ക് ഓഫ് വേള്‍ഡ് റെക്കോര്‍ഡ്‌സിലും മാണിക്യം ഇടം നേടി.
