.jpg?$p=efb1ff6&f=16x10&w=852&q=0.8)
പ്രതീകാത്മക ചിത്രം
മലബാറില്‍ ആദ്യമായി കോഴിക്കോട്ട് നഗരം ചുറ്റികാണാന്‍ സര്‍വീസുമായി കെ.എസ്.ആര്‍.ടി.സി. തിരുവനന്തപുരത്ത് നഗരക്കാഴ്ചകള്‍ കാണാന്‍ ആരംഭിച്ച ഡബിള്‍ ഡെക്കര്‍ ബസ് സര്‍വീസ് മാതൃകയിലാണ് ഫെബ്രുവരി ഒന്നിനു ഇവിടെയും യാത്ര ആരംഭിക്കുന്നത്. തുടക്കത്തില്‍ കെ.എസ്.ആര്‍.ടി.സി.യുടെ ഓര്‍ഡിനറി ബസിലായിരിക്കും കോഴിക്കോട്ടെ യാത്ര. ഇവിടെയും ഡബിള്‍ഡെക്കര്‍ ബസ് കൊണ്ടുവരാന്‍ ആലോചനയുണ്ടെങ്കിലും വിശദമായ പഠനത്തിന് ശേഷമേ തുടങ്ങാനാവൂ.
'കോഴിക്കോടിനെ അറിയാന്‍ സാമൂതിരിയുടെ നാട്ടിലൂടെ ഒരുയാത്ര' എന്ന പേരില്‍ ആരംഭിക്കുന്ന സര്‍വീസ് കെ.ണ്ടഎസ്.ആര്‍.ടി.സി. ബസ്സ്റ്റാന്‍ഡില്‍നിന്ന് തുടങ്ങി പ്ലാനറ്റോറിയം, തളിക്ഷേത്രം, കുറ്റിച്ചിറ മിശ്കാല്‍ പള്ളി, കുറ്റിച്ചിറ കുളം, കോതി ബീച്ച്, നൈനാംവളപ്പ്, സൗത്ത് ബീച്ച്, ഗാന്ധി പാര്‍ക്ക്, ഭട്ട്‌റോഡ് ബീച്ച്, ഇംഗ്ലീഷ് പള്ളി, മാനാഞ്ചിറ സ്‌ക്വയര്‍ എന്നിവ വഴിയാണ് കടന്നുപോവുക. 200 രൂപയായിരിക്കും ചാര്‍ജ്. ഉച്ചയ്ക്ക് ഒന്നുമുതല്‍ രാത്രി എട്ടുവരെ നഗരം ചുറ്റിക്കാണാം. ദിവസവും ഒരു സര്‍വീസാണുണ്ടാവുക. ഓരോ സ്ഥലങ്ങളിലും ഇറങ്ങി കാണാനും ഫോട്ടോയെടുക്കാനും സൗകര്യമുണ്ടാകും. എന്നാല്‍, സര്‍വീസ് തുടങ്ങിയാല്‍ ഇടയ്ക്കുള്ള സ്റ്റോപ്പുകളില്‍വെച്ച് ബസില്‍ കയറാനാവില്ല. മ്യൂസിക് സിസ്റ്റം ഉള്‍പ്പെടെയുളള ബസ്സായിരിക്കും സര്‍വീസ് നടത്തുക.
ഓര്‍ഡിനറി ബസ് സര്‍വീസിനിടെ യാത്രയുടെ സാധ്യതകള്‍പഠിച്ച് അടുത്തഘട്ടത്തില്‍ കോഴിക്കോട് ബീച്ച്, സരോവരം തുടങ്ങി കൂടുതല്‍ സ്ഥലങ്ങള്‍ ഉള്‍പ്പെടുത്താനും പദ്ധതിയുണ്ട്. കോഴിക്കോട്ടെ ചെറിയറോഡുകളില്‍ ഡബിള്‍ഡെക്കര്‍ ബസുകള്‍ ഓടിക്കാന്‍ ഏറെ വെല്ലുവിളികളുണ്ടെന്ന് ബജറ്റ് ടൂറിസം സെല്‍ ജില്ലാ കോ ഓര്‍ഡിനേറ്റര്‍ പി.കെ. ബിന്ദു പറഞ്ഞു. വൈദ്യുതലൈനുകള്‍ മരങ്ങള്‍ എന്നിവയില്‍ തട്ടാതെ ബസിന് പോവാനാകുമോയെന്ന് പരിശോധിക്കേണ്ടതുണ്ട്. ഇതിനായി കെ.എസ്.ഇ.ബി., വനംവകുപ്പ് എന്നിവയുമായി ചര്‍ച്ചനടത്തുമെന്നും അവര്‍ പറഞ്ഞു. വീതികുറഞ്ഞ റോഡുകളിലൂടെ ബസിന് പോവാനാകുമോയെന്നും പരിശോധിക്കും.
മറ്റു ജില്ലകളില്‍നിന്ന് ട്രെയിനിലും മറ്റും നഗരത്തിലെത്തുന്നവര്‍ക്ക് കുറഞ്ഞ ചെലവില്‍ നഗരംകാണാന്‍ അവസരമൊരുക്കുകയാണ് യാത്രയുടെ ലക്ഷ്യമെന്നും ബിന്ദു പറഞ്ഞു. രാവിലെ 9.30 മുതല്‍ രാത്രി ഒമ്പതുവരെ 9544477954, 9846100728 എന്നീ നമ്പറുകളില്‍ ട്രിപ്പുകള്‍ മുന്‍കൂട്ടി ബുക്കുചെയ്യാം.
വനിതകള്‍ക്കും വിദ്യാര്‍ഥികള്‍ക്കും യാത്ര
അന്താരാഷ്ട്ര വനിതാദിനത്തോടനുന്ധിച്ച് ബജറ്റ് ടൂറിസം സെല്‍ കോഴിക്കോട് ജില്ലയില്‍നിന്ന് സ്ത്രീകള്‍ക്ക് മാത്രമായി ഉല്ലാസയാത്ര സംഘടിപ്പിക്കുന്നു.
മാര്‍ച്ച് ആറുമുതല്‍ 22 വരെ നടത്തുന്ന യാത്രയില്‍ വനിതകള്‍ക്ക് ഒറ്റയ്ക്കും കൂട്ടായും പങ്കെടുക്കാം. മാമലകണ്ടം മൂന്നാര്‍, വാഗമണ്‍ കുമരകം, ഗവി പരുന്തുംപാറ, നെല്ലിയാമ്പതി, മലക്കപ്പാറ, വിസ്മയ അമ്യൂസ്‌മെന്റ് പാര്‍ക്ക്പറശ്ശിനിക്കടവ്, വണ്ടര്‍ലാ, പെരുവണ്ണാമൂഴി ജാനകിക്കാട് കരിയാത്തന്‍പാറ, വയനാട് ജംഗിള്‍ സഫാരി, കൊച്ചിയില്‍ ആഡംബരക്കപ്പലായ 'നെഫ്രിറ്റി'യില്‍ യാത്ര, മലമ്പുഴ, തൃശ്ശൂര്‍ മ്യൂസിയം എന്നിവിടങ്ങളിലേക്കെല്ലാം യാത്രകളുണ്ടാവും.
വിദ്യാര്‍ഥികള്‍ക്കായുള്ള കെ.എസ്.ആര്‍.ടി.സി.യുടെ വിനോദയാത്രകള്‍ ആരംഭിച്ചുകഴിഞ്ഞു. ഇത്തരം യാത്രകള്‍ക്ക് വിദ്യാഭ്യാസസ്ഥാപനങ്ങള്‍ക്ക് 9961761708 എന്ന നമ്പറില്‍ വിളിക്കാം.
Content Highlights: ksrtc city ride bus service kozhikode
Also Watch
RELATED STORIES
.jpg?$p=8b480bb&f=1x1&w=100&q=0.8)
.jpg?$p=8b480bb&f=1x1&w=100&q=0.8)
.jpg?$p=8b480bb&f=1x1&w=100&q=0.8)
IN CASE YOU MISSED IT
%20(1).jpg?$p=6221210&q=0.8&f=16x11&w=104)
.png?$p=0e70431&q=0.8&f=16x11&w=104)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..