ഓളപ്പരപ്പ് കണ്ടാൽ ശാന്തം, പതിയിരിപ്പുണ്ട് അപകടം

ചെറുതോണി: ഇടുക്കിയിലേക്ക് വിനോദ സഞ്ചാരികൾ എത്തിത്തുടങ്ങിയതോടെ ജലാശങ്ങളിൽ യുവാക്കൾ ഇറങ്ങുന്നതും കുളിക്കുന്നതും അപകടഭീഷണി ഉയർത്തുന്നു. കഴിഞ്ഞ ദിവസം മലങ്കര ജലാശത്തിൽ സിനിമാനടൻ അനിൽ നെടുമങ്ങാട് മുങ്ങിമരിച്ചതാണ് അപകടങ്ങളിൽ അവസാനത്തേത്. എന്നിട്ടും, ജലാശയങ്ങളിൽ ഇറങ്ങുന്നത് നിയന്ത്രിക്കാൻ സംവിധാനം ഒരുക്കാൻ അധികാരികൾ മടിക്കുന്നു.

ഇടുക്കി അണക്കെട്ട് തുറന്നുവിട്ടതിന് ശേഷം ചെറുതോണി പുഴയിലും പെരിയാറ്റിലും പാറക്കൂട്ടങ്ങൾക്കിടയിൽ വൻ കയങ്ങളാണ് രൂപപ്പെട്ടിരിക്കുന്നത്. ഇവിടങ്ങളിലാണ് യുവാക്കൾ കുളിക്കാൻ ഇറങ്ങുന്നത്.

തെളിഞ്ഞതും തണുപ്പുള്ളതുമായ വെള്ളം കണ്ടാണ് യുവാക്കൾ ഇവിടങ്ങളിൽ കുളിക്കാനിറങ്ങുന്നത്. ഇത്തരം കയങ്ങളുടെ ആഴവും അള്ളും മനസ്സിലാക്കാതെ ഇറങ്ങുന്നവർ അപകടം ക്ഷണിച്ചുവരുത്തുകയാണ്.

ആറ് മാസം മുമ്പ് ചെറുതോണി പുഴയിലെ കയത്തിൽ കുളിക്കാൻ ഇറങ്ങിയ നാരക്കാനം സ്വദേശി മുങ്ങിമരിച്ചിരുന്നു. എന്നാൽ, ഇതേസ്ഥലത്ത് വീണ്ടും യുവാക്കൾ കുളിക്കാനിറങ്ങുന്ന സാഹചര്യമാണ് നിലനിൽക്കുന്നത്.

പ്രദേശവാസികൾ ഇത്തരം കയങ്ങളിൽ ചാടി കുളിക്കുന്നത് കണ്ടുകൊണ്ടാണ് വിനോദ സഞ്ചാരികളും കുളിക്കാൻ ഇറങ്ങുന്നത്.

Content Highlights: Idukki Tourism, Cheruthoni River, Periyar, Anil Nedumangad Death